Häp m'ak tä t'uhawetej che hin'o lhäy'e lech'efwa iwoye
1-2Häte amel tä atsinhay tä hach'efwas ihi, en awuhuya hach'efwas, häpkhilek elh che nit'ekhayaye Lhawuk lhämet, ileyej lakachuhanyaj. Tsi tej che newache ämet che lefwenho hach'efwa, mat isila amej tä hiw'en m'ak tä is tä lewoye lhäy'e tä ka'ena w'et m'ayeka. 3Is che m'ak tä alesilatyenej häpkhit'a m'ayhay tä tumphä, mälhyej tä lesilatyen haw'oley tä lesit, wok amsilis tä oro, wok häp haw'uyis tä wuj tä isis. 4Mat is che asilatyaj tälho ahusek, häp asilatyaj tä nittäya tä ahäpe elh tä nifwtsaja lhäy'e tä letamsek ihi. Häp n'osilatyajna lhäy'e lhip tä laha ihi, wet Dios akäjejlhi. 5Tsi häp lewhäy tä pajchehen, atsinhay tä matche tä t'ekhaye Dios wet itiyej leniwhayaj, lhamel lhaisilatyenejen tä yen at lewuhuya lech'efwas. 6Häp tä mälhyej p'antetso Sara, lham iwoye lech'efwa Abraham lhämet wet häp tä yok, “Owuk t'at”. Wet amel ahäpehen t'at Sara leles tsinhay, che lewoye m'ak tä is wet tek lenowaye m'ak at che häpe.
7Häte amel tä ahin'ol tä hach'efwas ihi, yej p'ethatlä m'ak tä häpe atsinhay tä hach'efwas wet ch'otehen lhamel. Tiyej ahumnhayaj lhäy'e tä lewunit, mälhyej tä t'uhawetej, tsi lhamel lakhajyhayaj inuhit'a'pe amel akhajyhayaj, wet lhamel ayen at lewuhuya. Häte Dios ifwenho lhamel t'awayhat tä häpe lew'atshancheyaj, mälhyej iwoye amel. Che mälhyejtso tä lewoyeje lhamel, ihichet'ala m'ak che inuhlä häp alhyajay.
Häpet Dios leles tä leteläythayaj ihi'pe m'ak tä is tä iwoye
8Tä lepese, nilhokej amel aw'awlhatchä, ap'ajtejwek ahusey, wet ahumnhen tä alepuhfwaswek. Is che achowhal lenuhtej amehen m'ak at che häpe. Yej alechäjwethä, 9wet yej wo ahayahlä m'ak tä ni'isa wok n'oläkwyhanyaj tä elh iwoyej amehen, mat tiyej akäpfwayaj tä is, tsi häp tä Dios t'änej amehen. Che lewoye tä mälhyejtso, häte Dios takäpfwayhla amehen. 10Tsi lhämet tä ihi Lehi yok:
“Elh che ihumin lew'atshancheyaj
wet t'uhläk nilhokej ifwalas lakäjyaj ihi,
is che t'amajej lhämtes tä iwoye
wet newache m'ak tä kamatachehen che tälhche lhayhi.
11Is che ileyej m'ak tä ni'isa
wet iwoye m'ak tä is.
Is che t'ukwe letamsek, wet ihänlhi t'at.
12Tsi Lhawuk t'uye wichi tä isen
wet tach'ahuye t'alhyajay,
mat tatayhlä iyhäj tä iwoye m'ak tä ni'isa.”
13Che lewo yiya m'ak tä is alhoho, ¿atsihilak ihanej iwoyneje yämthilek aiwit'äyen? 14Mat tej che nichät atapehen ateläythayaj tä lewoye m'ak tä is alhoho, Dios lakäpfwayaj tä is i'amejen. Yej nowaye elh che häpe, wet yej wo alhakliya, 15mat en Awuka Cristo wet tihi ahusey tä lewunit. Awaklhatpejlä elh che häpe tä tay'ätshanej amehen m'ak tä tamenej tä aniwhayaj ihi, 16mat yej alechäjejwethä tä lechulho wet yej welkatejlhi ämet. Is che newache ates che häpe che ihihlä Dios lhäy'e wichi, häpkhilek lhamel tä ailäkwethä wet yämwethä amejen tä fwetaj ni'isa m'ak tä lewoye, n'äfwelhihena che hiw'en tä lhäy'e lhip tä is achumyaj tä lehänlhi Cristo.
17Tsi che häpe Dios lenech'ethayaj, is t'at che ateläythayaj ihi tä lewoye m'ak tä is alhoho, wet häpkhit'a m'ak tä ni'isa tä tamen amej. 18Tsi Cristo leteläythayaj ihi'pe wichi lesukyajay, weihalhache wet tajlhame. Lham häpe t'at Elh tä is, mat y'ilpe wichi tä ni'isahen yämthilek ichäj amehen häp Dios. Wet tä hin'o t'at, tä wichi ilän y'il t'at, mat Dios iläyteji husek. 19Wet tä häpe husek, ihoye n'ohusey tä õhp'ohiche wet iwo lhämetayej lhamel. 20Häp lhamelna häpehen wichi p'ante ihi häp ifwalas tä Noé ihi. Lhamel tach'ahuhiyet'a p'ante Dios, mat lham iteläytej t'at pajtha wak'alh häp barca tä Noé yenlhi. Mat nitäkwit'a lhamel tä tiyäjo p'ante lehitso, ocho t'at, wet lhamel tafwayhen häp tä isej inät tä ichäjlhi lehi.
21Wet inättso, häp tä n'otetnekej bautismo, häp m'ak tä aisej tä letafwayhen athana. Mat bautismo häpkhit'ak ilej och'ohle tä iyej ot'isan, mat häpe t'at tä ot'alheje Dios häp ohusek tä laj lech'ohleya. Wet n'aifwayhthen tä n'aisej häp Jesucristo tä inuphä tä tälho n'op'itseyhay, 22wet iho puleye, wet ihi Dios lhip tä lefwomkat, wet niyatej ángeles, lhäy'e n'okhajyhayajay tä iche tä kaphä, lhäy'e n'owujyajay.
