1~Sam 1

₁Iche p'ante hin'o tä lhey Elcana tä tälhe wichi tä tälhe letes Efraín p'ante. Häp lajcha lhey Jeroham wet lechäti lhey Elihú. Elihú lajcha lhey Tohu tä häpe hin'o tä lhey Suf tä lhäs. Wet Elcana lew'et häpe hupuy tä niwuja tä lhey Ramá tä ihi chenhas tä ihi honhat tä lewuk Efraín lhayis. ₂Wet Elcana hiw'en lech'efwas täkwfwas, häp elh tä lhey Ana wet elh Penina. Penina leles ihi mat Ana häpe tä naj lelesa.

₃Wet nekchämpej nekchämpej Elcana lhäy'e lew'et lheley lhamel yikch'oye laka hupuy wet ihoye õn'okhayajw'et tä ihi Silo yämlek n'okwiyej Lhawuk tä laj letumfwaya wet iwo w'ayhata häp tshäwet tä ilän. Wet iche p'ante Lhawuk laka sacerdotes tä ihi täja, lhamel lheyes Ofni wet Finees, häpehen t'at sacerdote Elí tä leles. ₄Wet tä ichätepej häp ifwalatso tä Elcana iwo w'ayhata häp tshäwet tä ilän, lham hiw'enho lech'efwa Penina t'isan lhipey wet ilhokej lham leles tä hin'ol lhäy'e tä atsinhay. ₅Mat hiw'enho Ana häp lhip tä lhäy'e lhip tä is, tsi wuj tä ihumin, tej tä Lhawuk tek hich'anlhaye chik iwo lhäsa thayej. ₆Mat häp letayhfwa Penina ilhaklitlhipej häp Ana wet iläkwlhi yämlek yen w'et m'ayeka, tsi Lhawuk tek hiw'enho tä lhäs ihi. ₇Wet mälhyejpejtso nekchämpej nekchämpej. Tä Ana ihoye häp Lhawuk lew'et, Penina ilhaklitlhipej yäk tafwlhi t'at wet tek tufw häp lhäk. ₈Wet häp lech'efwa Elcana yok:

–Ana, ¿chihäte tä letafwlhi? ¿Chihäte tä katufwa häp äk? ¿Chihäte tä afwitajayaj ihi? ¿Hät n'am nu'pe diez ales tä hin'ol laha?

₉Häp lhamel ihi p'ante Silo, wet tä ileyejen tä t'ekhen wet iyä, Ana nephä wet yik tä iwo t'alhyaja. Wet häp Elí tä sacerdote itayphä t'at, i'pe laka silla tä iwhäye lepe tä Lhawuk lew'et. ₁₀Wet Ana iwo t'alhyaja tä t'alhe Lhawuk, häp wuj tä lefwitajayaj ihi wet lhäy'e lhip tä tafwlhi. ₁₁Wet yäm kalelhäj lhämet, yok:

–Iwuk tä naj atumfwaya, is chik letetshann'o tä ohäpe akawo wet letichun n'okwe tä wuj tä ofwitajayaj ihi. Yej p'ethet ohilä, häm is chik lew'en n'oho olhäs. Wet olham nech'e oyachajila ame yämlek hich'otla ame ilhokej ifwalas tä ihonhate. Wet tek õyisthichela lew'ole tä ihi lhetek, tä õyenla letetneka tä häpe elh tä amajchet.

₁₂Tä taje tä Ana iwo t'alhyajaye Lhawuk, Elí itetshan t'at häp lhayhi. ₁₃Tsi tä iwo t'alhyaja, ts'ilak lepästey tä iläylhi, tek tsaje. Wet Elí yenek häpe atsinha tä w'oknaj, ₁₄wet tahuyej, yok:

–¡Leyej tä alhen w'oknaja! ¡Tiyej kanhi hat'es!

₁₅Mat Ana ichulho wet yok:

–Kha, iwuk, olham ohäpe atsinha tä wuj tä lefwitajayaj ihi. Tek oyäyejne hat'es wok vino, mat owo ot'alhyaja, ofwenho Lhawuk ofwitajayaj. ₁₆Yej fwitaj tä ohäpe atsinha tä naj lehuseka. Ilhokej lewhäy tä oyämlhi t'at yäk athana, tsi wuj tä olhakli ihi wet naj otamseka.

₁₇Elí ichulho wet yok:

–Mäh, atamsek ihi, wet is chik Israel laka Dios hiw'en amho m'ak tä let'alhe.

₁₈Ana yok:

–Is tä lep'altsenn'o.

Wet yäpil wet t'ek, nemhit lefwitajayaj ihi.

₁₉Tä nech'e fwamlafwaj lhamel inechephä wet n'okwiyej häp Lhawuk. Tä ileyej, wet yäple lew'et tä ihi Ramá. Wet Elcana imäyej lech'efwa Ana, wet Lhawuk itichunche ₂₀wet Ana nech'e hich'otshan, wet tä ichäte lewhäy iwo lhäsa. Wet iwo lheya Samuel, häp õlhey tä hätet iwoye õlhämet tä yok, Ot'alheje Dios. Tsi pajche t'alheje Lhawuk.

₂₁Tä nekchäm elh, wet Elcana ihoye Silo, lhäy'e lew'et lheley, yämlek iwo w'ayhata häp tshäwet tä ilän tä hiw'enho häp Lhawuk, mälhyej tä iwoye nekchämpej, wet yäm matche lhämet. ₂₂Mat Ana tek yik, tsi ifwenho lech'efwa, yok:

–Otaye chik olehtej ot'aate han'äfwaj. Wet ochäjiyela Lhawuk wet is chik tajlhame tä imälheyej.

₂₃Wet Elcana ichulho, yok:

–Woye t'at m'ak tä lefwitaj is alhoho. Mälhehchä yämlek lelehtej hat'aate. Wet is chik Lhawuk yäm matche lhämet.

Häpe tä Ana imälhehchä wet ichihelit häp lhäs yäk ilehtej let'aate. ₂₄Tä ichäte lewhäy, ichäje häp Lhawuk lew'et tä ihi Silo, ithatlä w'asetaj tä asnak tä hiw'en tres nekchämes, lhäy'e harina, lhäy'e vino. Wet Samuel kamaj han'äfwaj t'at. ₂₅Tä lhamel ileyej tä ilän w'asetaj, ihäne han'äfwaj häp Elí. ₂₆Wet Ana yok:

–Iwuk, mälhyej tä matche olhämet, olham ohäpe atsinhahte ikana tä i'awhäye tä iwo t'alhyajaye Lhawuk. ₂₇Häpe han'äfwajna tä ot'alheje Lhawuk, wet hiw'en n'oho. ₂₈Tä mälhyejtso, oyachaje häp Lhawuk häpkhilek t'amajchet ilhokej ifwalas tä iläy.

Wet lhamel n'okwiyej p'ante häp Lhawuk.