1~Sam 12

₁Samuel ifwenho ilhokej Israel lhayis tä yok:

–Amel lew'enay tä olham och'ahunaj amehen ilhokej häp m'ak tä let'alhay n'oye wet ow'en amhohen rey, ₂wet lhamlak niyatej amel. Häp olham och'ut wet ow'oley wuj tä pelaj, wet oles i'amejen. Pajchey tä oniyatej amel, tälhe tä n'am thaläkw yäk ifwalana. ₃Wet athana lhek tetshann'o. Chik iche m'ak tä ni'isa tä owoye, en tesa n'oyej tä ihi tä Lhawuk itayche lhäy'e tä ihi tä rey itayche, häp rey tä Lhawuk itshupiye. Chik ot'etane alä w'asetaj wok asno, is t'at, oatis t'at. Chik okan amejen wok oaiwit'äynhen, wok olhaiwompe m'ak tä ni'isa tä iyhäj tiskan letape, is t'at, otiskanla'pe.

₄Lhamel ichulho tä yok:

–Ihichet'a chik lekan n'oyejen, tek lewit'äyen n'ohen wet ihichet'a chik alewompe m'ak tä ni'isa tä iyhäj tiskan letape.

₅Samuel yok:

–Häp Lhawuk lhäy'e rey tä lham itshupiye, häpehen tä iläte tä amel kalhokaye otes chik häpe ifwalana.

Lhamel yop'antekwe:

–Matche täjtso.

₆Wet nech'e Samuel ifwenho lhamel tä yok:

–Häp Lhawuk tä itshupiye Moisés lhäy'e Aarón tä itonphä p'ante amel achätilis tä ihi Egipto. ₇Tä mälhyejtso alewaklhathen, tsi tä y'ehi tä Lhawuk itayche oyenla lhämeta ilhokej m'ak tä amel aisej tä lham iwoyej amehen lhäy'e tä iwoyeje achätilis p'ante.

₈“Häp atetsel Jacob lhäy'e leles lhamel ihoye p'ante Egipto. Tä tiyäme wujpey nekchämes, wet Egipto lheley yen lakawosa häp wichi tä tälhe lhamel, wet lhamel lhaip'altsene Lhawuk yämlek hich'ote. Wet lham ichene Moisés lhäy'e Aarón, häpehen tä itonphä p'ante achätilis tä ihi Egipto wet itihi p'ante honhatna tä lhamel yen lew'eta. ₉Mat lhamel hip'ethetlä p'ante häp Lewuk Dios, wet lham yachaje Sísara, häp sip'ä tä niyatej nifwotas tä ihi hupuy tä Hasor. Häte yachaje Filisteo lhayis lakhajyhayaj, lhäy'e Moab laka niyat, wet lhamel itayhlä ajchalis. ₁₀Mat ajchalis lhaip'altsene Lhawuk yämlek hich'ote, wet yok, Osukyaj ihi olhamel, tsi ole amej wet oyen owuhuya Ba'al lhayis tä häpe dios lhayis tä kamatachehen, lhäy'e Astarté lhayis tä häpe dios tsinhay tä kamatachehen. Athana olhaip'altsen ame, ¡fwayhat n'oyejen otayhfwas lakhajyhayaj, wet oayenla Owuka!

₁₁“Häp tä tumenej tä Lhawuk ichen amehen Gedeón, lhäy'e Barac, lhäy'e Jefté, lhäy'e olham Samuel, yämlek olhamel ofwayhat amejen atayhfwas lakhajyhayaj, wet atamsekis ihi tä lheyayhi honhatna. ₁₂Mat tä amel lehanayej tä Nahas, Amón lhayis kaniyat, fwitaj inu amehen, let'alhay n'oye rey chik lhayen aka niyata, tej tä lehanayej at thayej tä Awuk Dios tä häpe amel aka Rey. ₁₃Wet ikana rey tä letshupyene. Häp Lhawuk hiw'en amhohen rey tä let'alhaye. ₁₄Athana ot'alh amehen chik lewujyen Dios, enay Awuka, ch'ahuyaye lhämtes wet yej letayhlä. Wet amaj amejen, lhäy'e amel aka rey, mälhyej m'ak tä Awuk Dios ihuminche. Chik mälhyejtso, aisenla. ₁₅Mat chik kawoyaye lhämtes, chik letiyayej kanhi, lham itihla amejen letasnhayaj amel lhäy'e aka rey.

₁₆“Tä mälhyejtso, yej lets'inhen tä lheyayhitsi, häpkhilek lew'enay Lhawuk letetnek tä wuj tä yenlhi. ₁₇Athana häpe lewhäy õlanyaj häp yachuyaj tä trigo, wet tek iwomchä, ¿hä matche? Mat olham ot'alhiyela Lhawuk wet lham ichenla kana fwitsek lhäy'e waj, yämlek amel lehanayej tä Lhawuk y'ulhan amejen m'ak tä wuj tä ni'isa tä lewoyaye tä let'alhaych'oye rey.”

₁₈Wet Samuel t'alhe Lhawuk, wet ifwalatso ichen fwitsek wet iwomchä. Wet nech'e ilhokej wichi wuj tä nowaye Lhawuk lhäy'e Samuel, ₁₉wet ifwenho Samuel tä yok:

–¡Alep'altsene Awuk Dios, alhyen n'oyehen yämlek tek oy'inhen! Tsi wujpe olhamel osukyajay, wet oy'isej m'ak tä ni'isa tä olhamel owoye tä ot'alhch'oye rey.

₂₀Samuel ichulho lhamel tä yok:

–Matche tä amel lewoyaye m'ak tä wuj tä ni'isa. Mat yej lenowayhen. Athana yej lhekaych'oye Lhawuk, enay häpeya Awuk tä matche. ₂₁Yej lehänay dios lhayis tä kamatachehen, häp tä nhanayej tä hich'ot amehen wet tek aifwayhthen, tsi tek matchehen. ₂₂Mat häp Lhawuk tek aiwomlathä, tsi lhamyaj t'at, lewujyaj ihi, wet matche tä iwatlä chik amel ahäpehen laka wichi. ₂₃Wet olham, chik oleyej tä oy'alhyen amehen Lhawuk, otes ihihlä häp lham. Oyok, ¡olehiyejt'ala tä oy'alhyenpej amehen! Wet ochufwenla amejen chik wuj tä let'amaj amejen wet lewoyaye m'ak tä is alhoho. ₂₄M'ak tä is chik lewoyaye, ch'ahuyaye Lhawuk, mälhewek ahusey, wet enay Awuka tä matche. Yej lep'ethetlä ilhokej m'ak tä wuj tä lham iwoyeje häp amel. ₂₅Mat chik letujlhayache häp m'ak tä ni'isa, õ'aitäyhthenla, lhäy'e aka rey.