1~Sam 30

₁Tiyäme fwalas tres tä David lhäy'e laka hin'ol tä lhamel ichäte hupuy tä Siklag. Wet lhamel ilhokpe tä Amalek lhayis pajche tiyäjo honhat tä Négueb wet itayhlä Siklag, tä lhamel iwasthi wet iwunej. ₂Hätej lhamel ichäjen atsinhay tä yen lakwenkaya wet ilhokej lhamel tä ikatsi, y'aje nä'tshas lhäy'e tä thänhäy. Mat tek wo elh chik lhamel ilän, ts'ilak tä yen lakwenkaya, wet lhamel tujlhache len'äyij tä yikhen.

₃Wet tä David lhäy'e laka wichi ichäte hupuy, wet lhamel hiw'en tä õ'wunej wet pajche õ'chäjen laka'tsinhay lhäy'e leles tä õyen kwenkaya. ₄Wet David lhäy'e laka hin'ol lhamel iwo lechosa tä tafwchehchä yäk noj lakhajyhayaj. ₅Hätej õyen kwenkaya atsinhay tä David lech'efwas, häp Ahinoam tä tälhe Jezreel, lhäy'e Abigail, atsinha tä tesa, Nabal tä tälhe Carmel tä lech'efwa p'ante. ₆Wet David wuj tä lelhakli ihi tä wichi iwatläk ithatejlhi tuntey, tsi ilhokej lhamel y'ulhanche m'ak tä õyenehen leles wet wuj tä lhamel lefwitajayaj ihi. Mat David ichaye Lewuk Dios tä ikhajyen lham. ₇Wet David tahuyej sacerdote Abiatar tä Ahimelec lhäs wet yok:

–Chäj n'oye efod.

Wet Abiatar ichäje efod David, ₈wet David t'alhe Lhawuk wet yok:

–¿Hä ohän itäyestso? ¿Elak ofwithen?

Wet Lhawuk ichulho tä yok:

–Hänhen, lefwithenla wet lesakanhiyejena õkwenkay.

₉Wet David yik, lhäy'e seiscientos hin'ol tä iwo let'unfwaya, wet lhamel ichäte tewok lhäsaj tä lhey Besor. ₁₀Wet doscientos lhamel tä imälhehi, tsi wuj tä y'enhen, tek ikalhi tä inuho tewok lhäsaj. Mat David tujlhache tä yik, lhäy'e cuatrocientos hin'ol tä yikche. ₁₁Wet lhamel ilhokpe hin'o tä Egipto lhele tä ihi honhattso. Wet lhamel ihäne David wet lhamel hiw'enho lhäk tä tufw lhäy'e waj tä iyäyej. ₁₂Hätej lhamel hiw'enho lhip higos tä tamchäy lhäy'e uvas tä tamchäy letsankay. Tä ileyej tä t'ek, wet yachajo tä khajay, tsi fwalas tres lhäy'e honatsis tres tä nit'eka lhäy'e tä niyäya. ₁₃Wet David y'ätshane tä yok:

–¿Am, atsi tä häpe awuk? ¿Wet chi tä letälhi?

Wet manse ichulho tä yok:

–Olham ohäpe Egipto lhele, owuk Amalek lhayis elh. Wet owuk iwomn'o, ot'inhayaj tä tumen n'oyej. Wet fwalana tres ifwalas tä oikana. ₁₄Olhamel otiyäjo häp Négueb tä Keret lhayis kahonhat lhip, lhäy'e tä ihi Judá, lhäy'e Caleb kawichi kahonhat. Hätej olhamel owunej hupuy tä Siklag.

₁₅Tä David iläte, wet y'ätshane tä yok:

–¿Hä iwoyek am tä lehän n'oye itäyestso?

Wet Egipto lhele ichulho tä yok:

–W'en n'oho ämet tä lewoyeje Dios tä tek lelänlan'o, hätej tek lhachajila n'oye owuk, wet olham ohänla ame wichitso.

₁₆Wet ihäne t'at lhip tä itäyestso ihi, wet lhamel itsatpe honhat wet t'ekhen, iyähen, wet iwo lakäjyaja'pe ilhokej m'ayhay tä lhamel ichumahen tä tälho Filisteo lhayis kahonhat lhäy'e honhat tä Judá. ₁₇Wet David ilänhen, tälhe tä nech'e nat yäk honaj, tek wo elh chik imanthi, tajlhame cuatrocientos hin'ol manses tä iche'pe camellos tä yikhen wet häpe tä lhamel yämhen.

₁₈Wet David ichumahen ilhokej m'ayhay tä Amalek lhayis t'etanehen, wet hätej ichuma lech'efwas tsinhay. ₁₉Wet tek wo m'ak chik täy tä wuj wok lhämsaj. Hätej tek täy elh leles, lhäy'e thänhäy, tsi ilhokej tä David ichumahen.

₂₀Hätej ichumahen ilhokej tshätäy, tson'atas lhäy'e w'asetas, wet lhamel tä yokos tshätäy ichunkat wet lhamel yok:

–¡Häpe täjna m'ak tä David ichuma!

₂₁David ihoye doscientos hin'ol tä imälhehi tewok lhäsaj tä lhey Besor tsi wuj tä y'enhen wet lhamel nekache p'ante David. Tä lhamel hiw'enlä David lhäy'e wichi tä nekche, lhamel ihoye. Wet tä David ichäte hin'oltso, wet n'okwiyej tä yok:

–Atamsekis ihi.

₂₂Mat iche hin'ol tä ni'isahen wet fwitses tä lhayej iyhäjnaj yikche David, wet lhamel yämthä tä yok:

–Häpet iyhäjnaj ninekahen tä olhamel oyikhen, tek olhamel ow'enhola m'ak tä olhamel okatej, tajlhamhiyela laka'tsinhay lhäy'e leles chik ichäjen. Wet is chik yikhen.

₂₃Mat David ichulho tä yok:

–Kha, yaiyhäj, yej woyaye täjtso. Häpe m'ak tä Lhawuk hiw'en n'amho, lhäy'e tä t'amajej lhaw'atshancheyaj, wet yachaj n'amehen itäyestso tä tiyäjon'aj lhaw'etes. ₂₄Tä mälhyejtso, ¿atsihila tä hich'ahu amehen? Tsi m'ayhayna y'aje iyhäjnaj ihoye õka'tshayaj lhäy'e iyhäjnaj imälhehchä tä t'uyehen õkhäy. Hätej lhamel w'awulhchä, t'uhawetej tä ow'entejchehen.

₂₅Wet mälhyejtso m'ak tä Israel lhayis iwoyepej. Tälhe ifwalatso tä lhamel yen lakeya yäk fwalasna.

₂₆Tä David ichäte Siklag, wet ithate lhip m'ak tä ichuma iyhäj tä thänhäy tä ihi Judá. Wet lhämet yok:

–Häpe täjna m'ak tä ochen amehen, häpe amel awayhatna tä osoyejnaj Lhawuk letayhfwas.

₂₇Ichene lew'ayhtes lhamel tä ihi Betel, lhäy'e lhamel tä lew'et Ramot tä ihi Négueb, lhäy'e tä ihi hupuy tä lhey N'owujyaj, ₂₈lhäy'e Aroer, Sifmot, Estemoa, ₂₉lhäy'e Rakal. Hätej ichene Jerameel lhayis, lhäy'e Ken lhayis, ₃₀lhäy'e wichi tä ihi hupuy tä lhey N'otäyhyaj, lhäy'e tä ihi Korasán, Atak, ₃₁Hebrón, lhäy'e ilhokej lhipey tä David lhäy'e laka hin'ol pajche inukwe.