Filisteo lhayis inachaj Arca tä Õt'amajchet tä Lhawuk lhämtes ihi
1Häp Arca tä Õt'amajchet tä Lhawuk lhämtes ihi, siete iwel'as tä ihi Filisteo lhayis laka honhat. 2Wet Filisteo lhayis t'änehen p'ante häp lhamel laka sacerdotes lhäy'e n'ältshantses, wet y'ätshanehen tä yok:
–¿Atsi m'ak tä olhamel owoyneje häp arca tä Israel laka dios lhämtes lehi? Fwenay n'oho m'ak tä olhamel owoye yämlek oyachaje häp lew'et.
3Lhamel ichulho, yok:
–Chik lhachajay häp arcatso, yej ts'ilhkat tä lethattshi. Mat is chik lew'enayho m'ak häp Israel laka dios yämlek itäyhat amel ates. Nech'e amel lechesenla wet lehanhiyeja m'ak tä tumenej tä nileyayej letasnhayaj tä iti amejen.
4Wet Filisteo lhayis y'ätshane lhamel tä yok:
–¿Atsi m'ak tä olhamel oyen lahaya otes?
Sacerdotes ichulho, yok:
–Is chik lhenay lahaya cinco õlhenhay tä oro tä letech'aynej amostas, lhäy'e cinco amalis tä oro, elh weihalha tumlä niyat tä Filisteo. Tsi õt'inhayajtso häp tä ilänhen amel lhäy'e aka niyatey. 5Tä mälhyejtso, enaylhi m'ak tä letech'aynej häp amos lhäy'e amalis tä ikänchi häp honhat, wet wujyenay Israel laka dios. Elat ilehiyeja letasnhayaj tä iti amejen, lhäy'e aka dios lhayis, lhäy'e aka honhat. 6Yej t'unthen ahusey, yej tenay Egipto lheley p'ante lhäy'e laka niyat. Tsi Israel laka dios iwoyeje p'ante lhamel m'ak tä äytajche, wet nech'e lhamel hich'anlhaye p'ante Israel lhayis tä yikhen.
7“Tä mälhyejtso, enaylhi kaletaj tä nech'ayek, wet chumaye täkwfwas w'asetas tä leles ihi tä kamaj nhanayej ichäj lelhukw'et, wet äytej kaletaj tä lethatpe lelhukw'et. Mat yej wahnej w'asetaj chik lelesas yikche, is chik imälhehi lehi. 8Wet chumaye häp arca tä Israel laka dios lhämtes lehi, wet thatho kaletaj. Wet tihi lhip elh häp m'ayhay tä oro chik lhenay lahaya amel ates. Chik wak'alh, ch'anlhaye kaletaj chik w'asetas yikchufwi. 9Mat tetshanay: Chik kaletaj itshupiye tä itaye Fwala Wukwe, tä häpe laka honhat lhip, wet häpe Israel laka dios lham tä iti n'amejen lhawit'äy tä wuj tä äytajche. Chik nimälhyayejtso, y'ahanhiyeja tä lhamhit'a tä iti n'amejen letasnhayaj, mat elat häpe chik n'amel lhawit'äy t'at.”
10Tä hin'ol iläte sacerdotes lhämet, wet lhamel iwoye t'at. Ichuma p'ante w'asetas wet hip'ohiche lelesas tä ithatho lehi. Tä ileyej, wet ithatpe lelhukw'et tä yäytej kaletaj. 11Wet nech'e ithatho kaletaj häp Arca tä Lhawuk lhämtes ihi, lhäy'e lehifwaj tä amalis tä oro ihi, lhäy'e õlhenhay tä häte iwoye amostas. 12Tä wak'alh, w'asetas yikhen, tiyäjche n'äyij tä itaye Fwala Wukwe. Wet y'ipthä tä yikhen wet ihän t'at n'äyij tä itshupihchä, tek itsaye lhip elh. Wet yikhen p'ante Filisteo lhayis, ihänphä lhamel yäk tott'aye tä ichätyaye Fwala Wukwe.
Arca tä Õt'amajchet tä Lhawuk lhämtes ihi ichäte Fwala Wukwe
13Wet Fwala Wukwe lheley lhamel ihi p'ante lhiptso tä ilanhi yachuyaj. Tä iyahinchephä, wet hiw'enlä häp Arca tä Õt'amajchet tä Lhawuk lhämtes lehi, wuj tä kästhä p'ante lhamel. 14-15Häp tä kaletaj ichäte p'ante hin'o tä lhey Josué laka honhat tä ihi Fwala Wukwe, wet ikasthi. Lhiptso iche p'ante tunte tä wuj tä ihi. Wet iche wichi tä tälhe letes Leví, lhamel itihchä häp Arca, lhäy'e lehifwaj tä m'ayhay tä oro ihi, wet lhamel iti'pe tuntetso tä wuj. Wet Fwala Wukwe lheley nech'e iwasthi kaletaj tä yen lhetesa lhipey, wet hip'ohen w'asetas wet yen Lhawuk lew'ayhata. Wet häte iche iyhäj m'ayhay tä lhamel hiw'enho Lhawuk. 16Wet tä cinco niyatey tä Filisteo lhayis hiw'en, lhamel yäple Ekrón.
17Häp cinco õlhenhay tä oro tä õ'tech'aynej amostas tä Filisteo lhayis yen Lhawuk lew'ayhata yämlek itäyhat lhamel letes, häp õlhenhaytso tumlä hupuy tä Asdod, Gaza, Askalón, Gat lhäy'e Ekrón. 18Wet häte iwoye amalis tä oro, w'awulhlä ilhokej häp hupuy tä Filisteo lhayis lew'et tä lewuhuy cinco niyatey. Wet elh weihalhapej hupuytso iche lelafwek tä tuntey tä õ'lafwejlhi, häte iche wichi lew'etesas tä i'alhoye. Wet häp tunte tä wuj tä õ'tip'ante'pe häp Arca tä Õt'amajchet tä Lhawuk lhämtes lehi, kamaj ihi Josué laka honhat tä ihi Fwala Wukwe yäk fwalasna.
19Mat Lhawuk ilänhen iyhäjfwas p'ante Fwala Wukwe lheley, häpe tä lhamel iyahnho häp Arca. Isoyej lew'atshancheyaj setenta hin'ol, wet iyhäj tä ihi hupuytso lhamel tafwchehchä tsi wuj p'ante õlänyaj tä Lhawuk iwoyeje häp lhamel. 20Wet nech'e Fwala Wukwe lheley yop'antekwe:
–¿Atsihila tä ikalhi tä ikasitwhäye Lhawuk tä häpe Dios tä t'amajchet? Tek iche. ¿Atsihila tä ochene yämlek ile n'amejen?
21Wet ithate p'ante lhämet häp wichi tä lew'et Kiriat-jearim wet yok:
–Häp Filisteo lhayis lhamel inachaj häp Arca tä Õt'amajchet tä Lhawuk lhämtes lehi. Is chik amel lenämhen yäk lechäjay.
