1~Sam 8

₁Täjp'ante hich'ut Samuel, yen Israel kaniyateya häp leles. ₂Häp lhäs tä lechunkatsek lhey Joel wet elh lhey Abías, wet lhamel yenlhi niyat lechumet tä ihi Beerseba. ₃Mat lhamel tek häte iwoye lajcha, tsi lhayen nech'ethantsesa wet lhaiwomejpe m'ak tä ni'isa tä iyhäj tiskan letape, wet iwohiyet'a lakalelhthayaj tä is alhoho.

₄Tä mälhyejtso, ilhokej häp hin'ol tä thänhäy tä ihi Israel lhaihutwek p'ante, wet lhamel ihoye Samuel tä ihi Ramá ₅wet ifwenho, yok:

–Am ahäp hin'o tä hich'ut wet ales tek häte iwoye am. Tä mälhyejtso, tshupyene niyat tä rey häpkhilek lhayen niyatayej olhamel, mälhyej tä iyej wichi tä ihi honhates iyhäj.

₆Tä Samuel iläte, tek käjejlhi tä lhamel t'alhch'oye rey. Wet lham iwo let'alhyaja tä t'alhe Lhawuk. ₇Wet Lhawuk ichulho, yok:

–Ch'ahuye wichi ilhokej m'ak tä ifwen amho. Tsi tek am tä lhamel aitiyej kanhi, mat olham tä lhamel iwomn'o yämlek nemhit Olewuk lhamel. ₈Tälhe häp fwalahte otonphä lechätilis tä ihi Egipto yäk häp athana, lhamel iwompejn'o wet yen lewuhuya dios lhayis tä kamatachehen. Wet mälhyejtso m'ak tä lhamel iwoyej ame fwalana. ₉Is chik lech'ahuye m'ak tä lhamel yäme. Mat wo peyeka lhamel häp ämet tä äytajche tä lefwenho ilhokej m'ak tä rey iwohiyejela lhamel chik lhayenla niyatayej.

₁₀Tä Samuel iläte Lhawuk lhämet, wet ifwenho wichi tä yok:

₁₁–Häp täjna m'ak tä rey iwohiyela chik lhayenla lewuka häp amel. Ichumhiyela ales tä hin'ol wet yenla laka sip'älisa. Ne'tehlak iyhäj lhamel yikche lham laka kaletas tä laka'tshayajchal, wet iyhäj iche'pe yel'atas, wet iyhäj t'uye häp lham. ₁₂Ne'tehlak iyhäj niyatej mil sip'älis wet iyhäj niyatej cincuenta. Wet elhpej amel ne'tehlak isaji häp lham laka honhates lhäy'e tä ilanhi laka yachuyaj lhay, wok yenlhi laka'tshayajchal lhäy'e m'ayhay tä õ'watejlä häp kaletas tä laka'tshayajchal. ₁₃Wet hätej ichumyenlathä amel ales tsinhay, yenla häpeya õpenekwos lhäy'e panwos, lhäy'e iyhäj tä yenlhi m'ak tä lenij akäjche. ₁₄Wet lhayenla lewuka aka honhates tä isis lhäy'e alafwey tä isis, wet yachajiyela lakawos. ₁₅Wet isohla amejen lhip aka yachuyaj lhay, wet yachajiyela lech'otfwas lhäy'e lakawos. ₁₆Hätej isohla amejen häp akawos tä hin'ol lhäy'e tä atsinhay, wet lhäy'e aläy w'asetas tä isis lhäy'e asnolis, wet lham tä ichumyenlathä. ₁₇Lhayenla lewuka lhip häp aläy tson'atas lhäy'e kayla lhayis, wet amel t'at tä ayenla lakawosa. ₁₈Chik ichäte lewhäytso, häpkhilek lech'oläyej reytso tä letshupyen amehen. Mat Lhawuk tek hich'ahuhla amehen.

₁₉Häp täjtso m'ak tä Samuel ihantej lhamel. Mat lhamel tek itetshan, yok:

–Kha, olhamel owatlä rey ₂₀häpkhilek ohätet iwoye wichi tä ihi honhates iyhäj. Olhamel ot'uhläk rey lhayen lewuka olhamel wet ichunla och'oyahen tä iwo ka'tshayaja.

₂₁Tä Samuel ileyej tä iläte wichi lhämtes, lham ifwenho Lhawuk. ₂₂Wet Lhawuk ichulho, yok:

–Ch'ahuye lhämtes wet enhoplhi lhamel laka rey.

Wet nech'e Samuel ifwenhomche häp Israel lhayis chik yäple lew'et.