1-2Wet tä olhamel n'am tumlä otichunhayaj tä ot'uhläk ohanej chik aisen p'iya, häp tä tamenej tä oyenek is tä ochennaj amehen ot'unfwa Timoteo, lhapuhfwa tä tach'ote Dios lechumet tä yen Silätyaja Cristo. Olham omälhehi Atenas, wet lham iho amehen yämthilek aikhajyenhen wet letujlhache achayaj, 3häpkhilek newache elh chik häpe chik y'elej leteläythayajay tä wichi iyhäj itiyej, wet ileyej Lhawuk. Tsi lehanej tä n'amel tä Dios n'aleles, lhan'äyij häpe t'at lhateläythayaj. 4Täjte olhamel oi'amejen, ofwel amhohen tä nämlat n'amehen m'ayhay tä n'ailhaklitlawethä. Wet y'aw'en athana tä mälhyej tä oyämetso. 5Häp tä tamenej tä ochennaj amehen Timoteo yämthilek ohanej chik kamaj lewo achayaja. Tsi äytaj otichunhayaj tä onowayhläk n'olhelhtshayajwo yelhat amehen wet noj achayajay. Wet chik mälhyejtso, nemhit laha ihi olhamel ochumet tä owoyej amehen.
6Mat athana tä tapil Timoteo tä tälh amehen, ihanhat n'oyejen tä aisen t'at, kamaj lechaye Lhawuk, lhäy'e ahumnhayaj tä i'amejen. Häte yäme tä wuj tä letichunpejch'oye olhamel, wet lhäy'e lhip tä let'uhläk lew'en n'ohen, mälhyej tä olhamel wuj tä ot'uhläk ow'en atapehen. 7Tä mälhyejtso, ipuhfwas, tej tä atha olhamel on'äyij lhäy'e tä wuj oteläythayaj, mat tä ohanej tä amel letujlhache t'at tä lechaye Lhawuk, häp tä ikhajyen n'ohen. 8Tä olhamel oläte tä alet'amkatayej Lhawuk, nem koyhyaj tä okhajyhayaj ihi.
9Tä mälhyejtso, ¡lajit lepesa wet lajit whäya olhamel oka gracias tä oyachaje lhaka Dios atapehen, tsi lhäy'e lhip okäjyaj tä ihi amejen tä oihi tä lham tatache! 10Ifwalapej honajchepej, mälhewek ohusek tä olhaip'altsene Dios yämlek iwahin n'oyejen chik ow'en atapehen, häpkhilek oy'isej lhip m'ak tä kamaj tatäyej achayaj, wet wak'alh.
11Is chik Dios Lhajcha lhäy'e Lhawuk Jesús yen häpeya olhamel on'äyij yämlek oho amehen. 12Is chik Lhawuk ichihelit ahumnhayaj tä leti amejen, lhäy'e nilhokej iyhäj, yämlek lhäy'e lhip, mälhyej tä olhamel oaihumnhen. 13Wet is chik ikhajyen ahusey wet ayen t'amajchetesa tä laj atesa tä lheyayhi tä Dios Lhajcha tatache, chik Lhawuk Jesús tapil honhatena, lhäy'e nilhokej laka wichi tä t'amajchetes. Amén.
