1~Tes 5

₁Ipuhfwas, häpet fwala wok lewhäy che mälhhiyejatso, tek iwatläk oyämej amehen. ₂Tsi amel wuj tä lehanej fwala tä Lhawuk tapinla, mälhhiyejat etantsaj tä näm tä honatsi tä wichi tek iniwhich'oye. ₃Che wichi yohlak, “Is t'at, lhatamsekis ihi t'at”, wet nech'e letäyhyaj iselkatla lhamel che nichätpe, mälhyej leteläythayaj tä nichätpe atsinha tä hich'otshan tä takapuhtshanej lhäs. Wet lhamel ihanhiyejt'ala che lhaifwayhtej.

₄Mat amel, ipuhfwas, tek lheyayhi honataj. Tä mälhyejtso, fwalatso che näm tek aiselkatla mälhyej iwoye etantsaj tä näm. ₅Tsi nilhokej amel ahäpehen isi leles wet äp fwala leles. N'ahäpkhihent'a honatsi lheley wok iyhäj tä ihumin honataj. ₆Häp tä tamenej tä isit'ak y'amähen, mälhyej iwoye wichi iyhäj, mat is che y'an'omhen t'at wet y'anukwe lhan'äyij tä häpe m'ak tä is alhoho. ₇Tsi wichi tä imähen, imähen tä honatsi, wet lhamel tä lhayen w'oknhasa, tä honatsi häp tä iyäyej hat'es. ₈Mat häp n'amel tä y'ehi isi, is che y'anukwe t'at lhan'äyij tä häpe m'ak tä is alhoho. Wet is che y'atw'uyhi lhat'okwep'ot tä häpe lhat'ekhahyaj lhäy'e lhahumnhayaj, wet n'ap'oyejpe lhalhethey häp lhaniwhayaj tä ihlat n'amejen lhafwayhyaj. ₉Tsi Dios tek tatshupi n'amehen yämthilek iti n'amejen lewäk, mat t'uhläk y'asakanej lhafwayhyaj häp tä isej Lhawuk Jesucristo. ₁₀Lham y'il lhatapehen, yämthilek tej che y'at'inhen wok kamaj y'aläyhen che näm, mat y'ehiyeja t'at yämthilek tiyäj'attsiy. ₁₁Wet häp tä oyok, Akhajyenhen wet ch'ot amehen, mälhyej tä lewoye athana.

₁₂Ipuhfwas, olhaip'altsen amehen yämthilek tek lhen w'et m'ayhaya häp lhamel tä tachumwethä tä i'amejen, tä t'uyehen ahusey wet ipäyen amehen Lhawuk len'äyij. ₁₃Is chik wuj tä lhenay hin'ola wet lhäy'e lhip tä lehumnhen lhamel, häp lechumet tä iwoye tä tamenej. Wet ti amejen atamsek.

₁₄Häte ipuhfwas, nityeneje lechumet aiyhäj tä n'etäjwethä. Khajyenhen lhamel tä nem lhay'amkatwethä, ch'otehen lhamel tä laj lakhajyhayaja, wet teläytej elh at chik häpe.

₁₅Isit'a chik aelh chik häpe iwo hayahlä elh tä iwoyeje m'ak tä ni'isa. Mat woyaypej yiya m'ak tä is tä lewoyej amehen, lhäy'e nilhokej iyhäj.

₁₆Is chik lajit lepesa tä a'akäswethä. ₁₇Yej leyayej tä lewopej alhyaja, ₁₈wet m'ak at chik häpe chik iche, w'enho gracias Dios. Tsi häp tähestso m'ak tä Dios ihuminche chik lewoye tä ahäpehen wichi tä ichaye Cristo Jesús.

₁₉Yej t'omatay Dios laka Espíritu tä i'amhiche. ₂₀Yej lhen w'et m'ayeka häp n'osilätyaj tä tälhe iyhäj tä yäme tä iwo siläta m'ak tä Dios laka Espíritu ifwenhomche wichi. ₂₁Mat is chik letetshan wet lhelhtaye nilhokej m'ayhay tä mälhyejentso, wet chik kalelhäj tä häpe m'ak tä is, ti amejen. ₂₂Tiyej kanhi m'ak at chik häpe tä ni'isa.

₂₃Is chik Dios tä n'otamsek tälhe, imälhetwek tä ayen t'amajchetesa, wet t'amajej ahusey, lhäy'e asanis, lhäy'e atichunhayajay, yämthilek newache ates chik häpe chik näm Lhawuk Jesucristo. ₂₄Häp lham tä t'än amehen häpe elh tä yäm matche lhämet, wet iwohiyela t'at tähestso.

₂₅Ipuhfwas, häte alhyen n'oyehen Dios.

₂₆N'okwi amejen, tsufwel amejen tä lhen atetneka tä ahäpehen Dios leles.

₂₇Tä Lhawuk lhämet n'oyej, one'tek leyahyenho nilhokej apuhfwas häp cartana.

₂₈Is chik Lhawuk Jesucristo lep'altsenyaj i'amejen.