Häp lakey tä iwatläk líderes tä t'uyehen Dios leles iwoye
1Matche n'olhämetna: Elh chik itihi lehusek tä ihumin chik lhayen häpeya líder yämthilek t'uyehen Dios leles, wuj tä is lechumettso tä t'uhläk iwoye. 2Häp tä tamenej tä iwatläk häpe elh tä naj letesa, lhäy'e tä weihalha atsinha tä lech'efwa, wet is lechumyaj, iwelkathiyet'a m'ak tä iwoye mat chunkat itetshanpej. Häpe hin'o tä ihuminlä elh chik takastej ayej lew'et, wet häpe hin'o tä ihanej tä ichufwen iyhäj. 3W'oknajit'a wet äkleyhtsajit'a, mat hap'altsentsaj wet iwo letamseka, wet tek lehumnhayaj itiyej kolhki. 4Häpe hin'o tä ihanej iwoyneje m'ak tä is chik iwoyeje lew'et lheley, yämthilek leles tach'ahuye wet yenhit'a w'et m'ayeka. 5Tsi chik häpe elh tä nhanayej m'ak tä is chik iwoyeje lew'et lheley, ihanhiyejt'ala iwoyneje chik fwetaj t'uyehen Dios leles.
6Tä mälhyejtso, elh chik t'uhläk lhayen häpeya líder yämthilek t'uyehen Dios leles, is chik häpe elh tä pitaj len'äyij tälhe täjp'ante iwo lehusek elha. Tsi chik häpe elh tä nech'e, elat lhaichäjlhi, wet mälhyej iwoye ahättaj tä nichätho lewit'äyhyaj tä lhaichäjlhi p'ante. 7Häte is chik häpe hin'o tä wichi tä kahäpeya Dios leles yäme tä is, häpkhilek newache n'ot'ulhnhayaj chik õ'tiyej wet nichätaho ahättaj kaniyäkw.
Häp lakey tä iwatläk líderes lech'otfwas iwoye
8Häte iyhäj tä lech'otfwas tä tach'ote Dios lechumet, is chik häpe hin'ol tä is lechumyaj, wet tek itäkwyen lhämet tä iwoye, wet ikänhit'a hat'es, wet iwohit'a t'akanyaja yämthilek ikalhi kolhki. 9Häte is chik lhaip'ajtej m'ak tä matche tä y'antäfwelej wet y'at'ekhaye, tek ilhahtej letichunhayaj tä ni'isa. 10Chunkat iwatläk õ'tetshan elhpej, wet chik kalelhäj tä najit letesa, häp tä t'uhawetej chik häpehen iyhäj tä líderes lech'otfwas.
11Häte atsinhay tä tach'ote Lhawuk lechumet, iwohiyet'ak kahäpeya atsinhay tä is lechumyaj, sufwkantsesit'a, mat itetshanpej m'ak tä iwoye wet häpehen atsinhay tä t'uhawetej tä õt'ekhayeje m'ak at chik häpe tä is.
12Oyachajo tä oyäme ayej hin'ol tä líderes lech'otfwas, oyok, Iwatläk häpehen elhpej tä weihalha atsinha tä lech'efwa, wet ihanej iwoyneje tä t'amajej leles lhäy'e lew'et lheley iyhäj. 13Wet chik yäm is alhoho lechumet tä iwoye, Dios leles iyhäj iwujyen lhamel, wet nem koyhyaj tä takhajayhen tä yen lhämeta Cristo Jesús.
M'ak tä y'en lhachayaja
14Ot'uhläk oho ame'thahya, mat ochen ame olhämetna 15tsi elat opajlä, mat lehanej lhachumyaj tä is chik y'awoye tä n'ahäpehen Dios lew'et lheley, wok oyok, Dios tä n'ilataj leles. Tsi Dios n'ayen laka ch'uteyayej lhämet tä matche, wet y'alhaiti'pe. 16Kalelhäj tä lhachayaj häpe m'ak tä wuj. Tsi Dios hin'älit n'amejen m'ak tä nitäfwnhatayej p'ante wichi tä pajche, oyok:
Cristo tä lhain'älit, lhayen hin'oya,
wet tä Dios inuhatphä tä tälho n'op'itseyhay,
kalelhäj tä häpe Lhawuk,
wet ángeles hiw'enpe,
wet õ'wo silätayej wichi tä i'pe honhat,
wet lhamel ichaye,
wet tä õ'hän puleye,
nech'e ikatej lewujyaj tä isi.
