1~Tim 5

₁Yej fwone hin'o tä thaläkw, mat tech'aynej chik ajcha, fwenho m'ak tä is chik iwoye. Häp mamses tech'aynej chik hach'inhis, ₂wet atsinhay tä thänhäy tech'aynej chik ako, wet atsinha lhutshay tech'aynej chik hach'inhälis wet ts'ilkat atichunhayaj tä is tä letiyej.

₃Ch'otehen atsinhay tä tesalis, häp lhamel tä newache elh chik tach'otehen. ₄Mat elh chik leles ihi wok lechetsos, is chik lhamel ichun tä lhaichufwenej yämthilek iwoyeje m'ak tä t'uhawetej lew'et lheley, tsi häp tä hin'älit tä matche tä ihumin Lhawuk. Chik iwoye täjtso, wet hätet iwoye chik yachajlä lhokwey t'uhyaj tä iwoyeje p'ante lhamel. Häp tä is wet Dios ihuminche.

₅Häp atsinha tesa tä matche, häpe elh tä newache leles wok lechetsos chik tach'ote, mat lham leniwhayaj iyeji Dios wet ilehiyejt'a tä lhaip'altsene wet iwo t'alhyajaye ifwalapej honatsipej. ₆Mat atsinha tesa tä lhayachaje m'ak tä lham lenech'ethayajay, tej tä kamaj iläy mat lehusek tatäy.

₇Fwenho wichi m'ayhay tä oyämetso, yämlek najit letesa. ₈Tsi elh chik nitch'otaye iyhäj, wok lew'et lheley tä lhäy'e lhip tä t'uhawetej chik tach'otehen, mathichet'a tä t'ekhaye Lhawuk wet isit'a m'ak tä iwoye, inu'pe wichi tä kachuhantses.

₉Chik atsinha lech'efwa ileyej honhat, wet õt'uhläk hap'akej tesalis iyhäj, is chik häpe elh tä inu'pe sesenta nekchämes, wet weihalha t'at lech'efwatso. ₁₀Iwohiyet'ak kahäpeya atsinha tä wichi hiw'en tä is m'ak tä iwoye, wok oyok, t'uyehen leles, wet ihuminpejlä Dios leles tä t'uhläk takastej ayej lew'et, wet ilejen lhamel lepach'ol, wet tach'otehenpej iyhäj tä leteläythayaj iyej, wet lhay'amkatej nilhokej lechumtes tä isen.

₁₁Mat tesalis tä nich'utahen yej p'ajtej iyhäj. Tsi chik nitumahlä lenech'ethayajay wet ileyej Cristo tä ihänlhi, wet t'uhläk yachajo tä iwo lech'efwaya, ₁₂wet tamen lhamejen tä letes ihi tsi inäk'äs lhämet tä ichun p'ante tä iwoyeje Cristo. ₁₃Häte ilunche wichi lew'etes wet tek t'uhläk yenlhi m'ak chik häpe. Nitajlhamaye täjtso, mat lhayen fwotkantsesa, lhay'uytho m'ak chik häpe, yämepej m'ak tä nit'uhawetayej. ₁₄Häp tä tamenej tä oyok, Atsinha tä tesa tä nich'uta, is chik iwo lech'efwaya, wet iwo lelesa, wet t'uye lew'et, häpkhilek naj lew'eta lhatayhfwa sitäyhyajay. ₁₅Tsi iche iyhäj tesalis tä pajche yikch'oye Lhawuk len'äyij wet lhaip'ajtej Satanás.

₁₆Chik iche atsinha tä Dios leles elh, wet iche atsinhay tä tesalis tä iyej lew'et, t'uhawetej tä lham t'at tä tach'otehen iyhäjtso, häpkhilek niwuja Dios leles iyhäj lechumet, wet lhamel ihanej iwoyneje tä tach'otehen tesalis tä matche tä newache elh chik tach'otehen.

₁₇Häp Dios leles tä lhamenya tä is alhoho lechumet tä iwoye tä tach'otehen iyhäj, t'uhawetej chik lhäy'e lhip lakaha tä ikalhi. Lhamel tä yen lechumeta tä yen lhämeta Dios lhämet wet iwo lechufwenyaja, nem koyhyaj tä t'uhawetej chik õhw'enho. ₁₈Tsi Dios lhämet tä ihi Lehi yok, “Yej wo t'aka lenhus häp weyis tä let'äsyenhi trigo.” Häte iche lhip elh tä yok, “Hin'o tä chumaj t'uhawetej chik ikalhi lakaha.”

₁₉Yej tach'ahuye m'ak chik õyen tesayej elh chik häpe Dios leles tä lhamenya, chik newache dos wok tres iyhäj chik hiw'enej tä iwoye m'ak tä ni'isa. ₂₀Mat häp lhamel tä matche tä iwoye lech'isukyaj, tihi tä nilhokej Dios leles tatache wet fwoneje m'ak tä iwoye, häpkhilek iyhäj hiw'en täjtso wet lenowayhyaj ihi.

₂₁Tä oihi tä Dios lhäy'e Cristo Jesús lhäy'e laka ángel lhayis tä t'amajchetes tatache, one'tek lewoye tähestso. Yej wo ulhneka wok ts'ilak elh chik häpe tä lehumin. ₂₂Yej lhak'ale chik leti'pe akweyey elh chik häpe, häpkhilek katan'isayej chik iwoye lech'isukyaj. Yej tach'anlhayej ame m'ak at chik häpe tä ni'isa.

₂₃Wet äp oyok, Tä hats'e äytajpej wet anhayaj ihi, yäyej inät mat häte yäyejpej lhiphaj vino.

₂₄Iche wichi tä n'äl t'at lech'isukyajay tä iwoye tä kamaj nichätaye Ifwala tä N'okalelhthayaj. Wet iche iyhäj tä n'änhit'a lech'isukyajay, mat n'änhila chik paj. ₂₅Wet häp tä mälhyej'attso, n'ochumtes tä isen n'äl t'at, wet n'ochumtes tä nin'äla, häte iwohiyet'ak nin'äla, ihanhiyejt'a lhaiwoyneje chik lhaiskathen.