2~Crón 11

₁Tä Roboam nichäte Jerusalén, t'äne sip'äl tä tälhe Judá lhayis lhäy'e häp Benjamín lhayis, ciento ochenta mil (180.000) hin'ol tä wuj tä ihanej tä iwo laka'tshayaja, wet ihutwek häpkhilek tatayhlä häp Israel lhayis. Tsi t'uhläk inachaj lhame leniyatyaj. ₂Mat Lhawuk yämhoplhi häp lakawo Semaías, yok:

₃–Fwenho Roboam, Salomón lhäs, Judá laka rey, lhäy'e nilhokej Judá lhayis, lhäy'e häp Benjamín lhayis: ₄Olham on'äyejo, isit'ak tatayhlä häp lepuhfwas Israel lhayis. Is chik lhamel yäpnhomche lew'etes, tsi olham t'at tä onech'ethayaj tä lhaich'esaj naji n'oniyatyaj.

Tä lhamel iläte Lhawuk lhämet tä õ'fwenho, wet lhamel yäpnhomche lew'etes, ileche tä fwetaj tatayhlä Jeroboam.

_5-10Roboam yen lew'eta häp Jerusalén, wet ikhajyenhen honhates tä hupuy ihiche tä ihi Judá lhayis kahonhat lhäy'e Benjamín lhayis kahonhat. Ikhajyen häp Belén, Etam, Tekoa, Bet-sur, N'olafwek, Adulam, Gat, Maresa, Zif, Adoraim, Lakis, N'ojäkw, Sora, Ajalón, lhäy'e Hebrón. ₁₁Roboam yäm matche tä ikhajyenhen wet yenchelhi lelafwey tä tuntey tä tach'opwayhen. Wet itihiche sip'al kaniyatey, lhäy'e n'olhäk, lhäy'e hat'es, lhäy'e aceite. ₁₂Wet hiw'enho n'ohunis lhäy'e n'oka'tshayajchal tä õ'tumtejlä häp n'och'ähal, wet nech'e matche tä takhajayhen honhatiltso. Wet häp tä mälhyej'attso, Roboam lhayen lewukwa häp Judá lhayis kahonhat lhäy'e Benjamín lhayis kahonhat.

₁₃Wet sacerdotes lhäy'e Leví lhayis lhamel tälhomche lew'etes tä ihi imälhewek Israel lhayis kahonhat, wet ihoye Judá wet lhaip'ajtej Roboam. ₁₄Leví lhayis yikch'oye honhates tä leläy t'ekhawtes wet iwom katsi. Lhamel ileyej nilhokej m'ak tä lewuk wet ihoye Jerusalén lhäy'e honhates iyhäj tä ihi Judá. Tsi häp tä Jeroboam tä Israel kaniyat lhäy'e leles lhamel n'äyejo Leví lhayis chik tujlhache chik tachuma Lhawuk lechumet. ₁₅Wet Jeroboam yenlhi lham laka sacerdotes tä yen lewosa häp n'on'okhayajw'etes tä i'pe chenhas, häpkhilek n'okwiyej ahät lhayis lhäy'e w'asetas les peykas tä n'ocheyälis tä lham tä yenchelhi.

₁₆Wet tä Leví lhayis t'aye Jerusalén, wet Israel lhayis tä matche tä akalelhäj tä t'ukwe Lhawuk tä Israel laka Dios, lhamel iten m'ak tä iyhäj iwoye. Yikhen tä ihoye Jerusalén wet yen n'okhayajayej Lhawuk tä letetsel laka Dios häp itshätäy tä õ'länhen. ₁₇Häp m'ak tä lhamel iwoyena, ikhajyen häp Roboam, Salomón lhäs, leniyatyaj tä ihi Judá, wet tach'ote tres nekchämis. Tsi tres nekchämis lhamel matche tä iten m'ak tä rey David lhäy'e Salomón iwoye p'ante.

₁₈Roboam tachuma häp atsinha tä lhey Mahalat tä lajcha häpe Jerimot, David lhäs, wet lako häpe Abihail, Eliab lhäse wet äp Isaí lecheyä. ₁₉Wet Roboam lhäy'e Mahalat leles Jehús, Semarías, wet Zaham. ₂₀Tä tajyäme täja, wet Roboam äp iyej Maaca, Absalón lhäse, wet lhamel leles Abiam, Atay, Ziza, wet Selomit. ₂₁Roboam lech'efwas ihi p'ante dieciocho, wet atsinhay iyhäj tä w'et imäyej'atwethä häp tä ihi sesenta. Wet häp tä tamenej leles tä hin'ol ihi veintiocho wet leles tsinhay häp tä ihi sesenta. Wet atsinha elh tä Roboam matche tä ihumin p'ante häpe Maaca. ₂₂Wet Roboam tachuma p'ante Abiam, Maaca lhäs, wet yen leles iyhäj laka niyata tsi häp tä t'uhläk yen häpeya rey. ₂₃Wet lehusek ihi, tsi tachuma leles iyhäj wet ichene honhates iyhäj tä takhajayhen tä hupuy ihiche tä ihi Judá lhayis kahonhat lhäy'e Benjamín lhayis kahonhat, häpkhilek lhamel yen lew'etesa. Wet hiw'enho lhäk tä naya, lhäy'e m'ayhay iyhäj tä iwatlä, lhäy'e wujpe atsinhay yämlek yen lech'efwasa.