Sisac iwo laka'tshayajayej Judá
1Tä Roboam hiw'en häp leniyatyaj tä wuj tä takhajay wet ilät lhame tä häpe hin'o tä matche tä lakhajyhayaj ihi, wet ileyej tä iwoye Lhawuk lhämtes. Wet nilhokej Israel lhayis tä iten m'ak tä iwoye, lhamel ileyej Lhawuk. 2Wet tä lhamel nemhit t'ifwtiyej Lhawuk, wet tä Roboam leniyatyaj nichäte cinco nekchämis, Sisac, Egipto laka rey, lham iwo ka'tshayajayej Jerusalén. 3Wet mil doscientos (1.200) kaletas tä laka'tshayajchal tä yikche, wet lhäy'e sesenta mil (60.000) sip'äl tä iche'pe yel'atas. Wet õ'hanhiyejt'a õ'woyneje chik õ'tetshanlä p'ante häp nifwotas iyhäj tä yikche tä tälho Egipto: häp Libia lheley, Sukí lhayis, wet Etiope lhayis. 4Wet lhamel ikalhi häp honhates tä takhajayhen tä hupuy ihiche tä ihi Judá lhayis kahonhat. Wet tä paj nichäte Jerusalén.
5Tä kamaj Sisac ninuyaye Jerusalén, wet profeta Semaías ihoye häp Roboam lhäy'e nilhokej Judá lhayis kaniyatey tä lhamel lhaihutwek tä ihi Jerusalén. Wet ifwenho tä yok:
–Lhawuk lhämet yok, “Tä amel lele n'oyej, wet äpte olham ole amejen. Wet oyachaj amehen häp Sisac tä atayhfwa.”
6Wet Israel lhayis kaniyatey lhäy'e rey Roboam, tä lhamel iläte, ihan at lhamejen tä matche tä yikch'oye Lhawuk. Wet lhamel lhay'ayhatchä wet yok:
–Matche, is alhoho Lhawuk lhämet.
7Wet tä Lhawuk hiw'en tä lhamel lhay'ayhatchä, Lhawuk tahuyej Semaías wet yok:
–Tä lhamel lhay'ayhatchä, tek otäyhthihena lhamel. Ofwayhthihena t'at iyhäj wet tek ochumyenhiyejlhila häp owäkw Sisac tä ofwetaj otiyej Jerusalén, tsi oleche oka'tshayaj tä owoyeje. 8Mat Sisac laka wichihla t'at häpkhilek lhamel ihanej tä isiyejt'a reyes tä ihonhatena, tajlhama olham tä is n'oyej.
9Wet Sisac, Egipto laka rey, inuye Jerusalén wet tachuma nilhokej m'ak tä laha ihi tä ichufwi Lhawuk Lewukwe lhäy'e häp rey lewukwe. Nilhokej tä ichäj lew'ete, wet äpte ichäj n'oka'tshayajchal tä oro tä õ'tumtejlä n'och'ähal, tä rey Salomón ne'tek lakawos yenchelhi p'ante. 10Wet häp tä rey Roboam ne'tek õyenlhi iyhäj tä bronce tä õ'cheyäjänet lew'etho iyhäj tä letayhfwas ichäj, wet y'uhyene sip'äl tä t'uye rey lewukwe lepelis. 11Nilhokej ifwalas tä rey ihoyepej Lhawuk Lewukwe, wet sip'ältso yikche wet ichäj n'oka'tshayajchaltso tä bronce. Wet tä lhamel tälhe Lhawuk Lewukwe wet yäple häp rey lewukwe, wet tä nichäte, lhamel yachajo lhip tä yen lew'eta, häp hupch'o elh tä lhamel ichufwi.
12Häp tä mälhyej p'antetso tä rey Roboam lhay'ayhatchä tä ihi tä Lhawuk tatache, wet Lhawuk ileche lewäkw tä itiyej, wet tek itäyhat lham. Wet nech'e is t'at häp m'ayhay tä ihi Judá.
13Roboam t'aylhatshi t'at leniyatyaj tä takhajay tä ihi Jerusalén wet kamaj tujlhache t'at leniyatyaj. Hiw'en p'ante cuarenta y un nekchämis tä iwo tesa leniyatyaj, wet diecisiete nekchämis tä iwoye niyat lechumet tä ihi Jerusalén, häp honhat tä Lhawuk tatshupiye p'ante tä ihi Israel häpkhilek lew'et t'at. Wet Roboam lako lhey Naama, Amón lhayis ka'tsinha. 14Matche tä ni'isa Roboam lakeyis, wet yäm matche tä nit'uyakwe häp Lhawuk.
15Wet m'ayhay tä Roboam iwoye, tälhe tä iwo tesa leniyatyaj pajtha äp lepes leniyatyaj, ihi t'at n'olesaynekhi tä yäme häp profeta Semaías lechumet, lhäy'e profeta Ido lechumet, tsi häpe wichi lheyis lehi. Wet Roboam lhäy'e Jeroboam nilhokej ifwalas tä ihi lew'atshancheyaj lhamel tachum t'at.
16Wet Roboam y'il p'ante tä nech'e ihoye lechätilis, wet tä õtjänlä, õ'tihi David laka Hupuy. Wet lhäs tä lhey Abiam häp tä icheyäjo lajcha leniyatyajw'et.
