2~Crón 15

₁Dios laka Espíritu nichätpe Azarías, Oded lhäs, ₂wet yik tä t'ukwe häp rey Asa. Tä hiw'en, wet yok:

–Rey Asa lhäy'e nilhokej Judá lhayis, wet lhäy'e nilhokej häp Benjamín lhayis, ch'ahuyay n'oye. Lhawuk i'amejen chik amel kamaj lheyayej lham. Chik amel let'ukwe, lelhokhiyela, mat chik leleyayej, wet lham ilehla amejen. ₃Tsi wujpey ifwalas tä Israel lhayis nem p'ante laka Dios tä matche ihi, wet nemhit sacerdote tä matche iyej lhamel chik ichufwen, wet nemhit lhamel lhaichufwenej Dios lhämet. ₄Mat tajlhama chik iche m'ak tä ni'isa chik iyej lhamel, wet häp tä lhamel t'ukwe Lhawuk tä laka Dios, wet lhamel nilhoka t'at. ₅Wet ifwalastso newache elh chik letamsek ihi. Nilhokej wichi tä ihiche honhatil iyhäj tä lenowayhyaj ihi. ₆Lhamel tatache lahilähen, tsi häp tä Dios t'at tä iwo lelhakliya pajpejthä matche tä lenowayhyaj ihi. ₇Mat amel akhajyenhen, yej alet'ayhatchehchä, häpkhilek laha ihi häp m'ak tä lewoye.

₈Tä Asa iläte häp Dios lhämtestso tä Azarías yen lhämeta, wet lhaikhajyen, iwo chumeta, iwasthiche n'ocheyälis tä Lhawuk n'äyihomche tä ihiche Judá lhayis kahonhat lhäy'e häp Benjamín lhayis kahonhat, lhäy'e häp honhates tä hupuy ihiche tä lham ikalhiche p'ante tä ihi chenhas tä ihi honhat tä lewuk wichi tä tälhe letes Efraín. Wet inech'aynhi Lhawuk laka altar tä ihi tä Lhawuk Lewukwe tatache.

₉Tä tajyäme täja, wet ihutwek nilhokej Judá lhayis lhäy'e Benjamín lhayis, lhäy'e häp wichi tä kalew'eta honhat tä lhamel tälhe honhat tä lewuk Efraín lhayis, lhäy'e honhat tä lewuk Manasés lhayis, lhäy'e honhat tä lewuk Simeón lhayis. Tsi wuj p'ante wichi tä yikch'oye lew'etes tä ihi Israel wet ihoye häp Asa, häp tä lhamel hiw'en tä Lhawuk Dios iyej. ₁₀Wet tä quince nekchämis tä Asa ihi leniyatyaj, häp iwel'a tres, lhamel lhaihuthiwek p'ante häp Jerusalén. ₁₁Wet lhamel yen n'okhayajayej Lhawuk häp letayhfwas lakäywet tä ikalhi: setecientos w'asetas wet siete mil tson'atas tä lhamel ilänhen tä yen t'awayhata Lhawuk. ₁₂Wet lhamel iwoye lhämet tä yäm kalelhäj wet yok:

–Olhamel matche tä ot'uhikwela häp Lhawuk tä lhatetsel laka Dios, imälhewek otichunhayaj wet imälhewek ohusek. ₁₃Oelh chik häpe tä nit'uyakwe häp Lhawuk tä Israel laka Dios, is chik õ'län t'at, chik thaläkw wok han'äfwaj, chik hin'o wok atsinha.

₁₄Wet nech'e lhamel ifwitsenej lechoslis tä hit'untejche lhämetna tä iwoyeje häp Lhawuk, wet yafwutchehen lefwolis lhäy'e tson'ataj ch'ul. ₁₅Wet nilhokej Judá lhayis tä akäjejlhi häp lhämet tä matche tä iwoyeje Lhawuk. Tsi imälhewek lehusek tä lhamel iwoyeje lhämet Lhawuk wet imälhewek letichunhayaj tä lhamel t'ukwe Lhawuk. Wet lhamel nilhoka wet Lhawuk hiw'enho letamsek, wet nemhit letayhfwas iyhäj tä iwhäye lhamel.

₁₆Wet äpte rey Asa isoyej lakatela Maaca len'ohyaj tä häpe niyat tsinha, tsi häp tä ne'tep'antek õyenlhi häp dios tsinha Asera lepeyak. Wet Asa iwasthi, iwo lhipeya wet ihäne tewok lhäsaj tä lhey Cedrón wet hip'ohen lhipey. ₁₇Wet tej tä Asa niwastahiche n'on'okhayajw'etes tä i'pe chenhas tä ihi Israel, tha akalelhäj tä wuj tä t'ifwtiyej Lhawuk nilhokej ifwalas tä iläy. ₁₈Wet itichufwi Lhawuk Lewukwe häp oro lhäy'e plata, lhäy'e nilhokej m'ayhay tä lajcha yen p'ante t'amajchetesayej Lhawuk, lhäy'e m'ayhay tä lham yen t'amajchetesayej Lhawuk. ₁₉Wet nemhit iche p'ante n'oka'tshayaj pajtha treinta y cinco nekchämis tä Asa ihi leniyatyaj.