Salomón t'alhe Hiram lech'otyaj yämthilek õyenlhi Lhawuk Lewukwe tä isilataj
1Salomón nech'e t'uhläk yenlhi p'ante häp Lhawuk Lewukwe lhäy'e häp rey lewukwe tä lham lew'et. 2Wet Salomón tachuma setenta mil (70.000) hin'ol tä itshupyene tä talhunej m'ayhay, wet ochenta mil (80.000) hin'ol tä yisthen tuntey tä chenaj lhipey, wet tres mil seiscientos (3.600) hin'ol tä t'uye chumhas.
3Tä tajyäme täja, wet Salomón ichene lhämet häp Hiram, Tiro laka rey, wet yok:
“Chik lewoye m'ak tä ot'alhej ame, mälhyej tä lewoye p'ante tä ojcha David t'alhej ame häp pino tä yenejlhi lewukwe. 4Olham ot'uhläk oyenhoplhi Owuk Dios häp Lewukwe häpkhilek oyen t'amajchetayej lhey. Õ'wunhihena häp incienso tä lenij akäjche tä õ'wujyenej häp lham. Wet nilhokej ifwalas tä õ'tihipeja pan tä t'amajchet tä lham tatache. Äpte õyenla n'okhayajayej itshätäy tä õ'wunhomche tä nech'e fwalapej lhäy'e tä honajpej, wet ifwalas tä n'ot'elakw'etpej, lhäy'e n'okäjyajay tä iwel'a nech'ayek, lhäy'e häp ifwalas iyhäj tä Owuk Dios lham tä ifwenho p'ante Israel lhayis tä is chik yen lakäjyajw'etesa häpkhilek õ'wujyenej häp lham.
5“Häp Lewukwe tä olham ot'uhläk oyenlhi, is chik õyäm matche tä wuj, tsi olhamel oka Dios häpe Dios tä lewujyaj ihi, inu'pe dios lhayis iyhäj. 6¿Mat atsi tä ihanej iwoyneja chik yenlhi häp Owuk Dios Lewukwe, tä pule wet tsajo tha kamaj Owuk Dios niw'awulhiyaho t'at? Wet olham niwohiyat m'ak chik ohäpe, w'et om'akfwaj t'at, tä ofwetaj oyenlhipa häp Owuk Dios Lewukwe, tajlhamat p'i tä w'et owun at incienso tä oihi tä lham tatache.
7“Athana is chik lechen n'oye häp hin'o tä nitäfwelej lakey tä yenlhi häp oro, plata, bronce, lhäy'e lechinaj, lhäy'e häp wesaj tä n'oyik tä y'it, lhäy'e tä ichät, lhäy'e tä ifwak'an, lhäy'e tä chik ihanej tä ilesaynhiche lechinhas. Is chik hin'o tä letatshupiyena tach'ote wichi tä in'oyej tä ihanej n'ochumetna tä lhamel tälhe Judá lhäy'e Jerusalén tä ojcha David lechumyenhay p'ante.
8“Äpte is chik lechen n'oye häp pino lhäy'e hal'äy iyhäj tä pänhichetek lhäy'e sándalo tä tälhe häp Líbano. Tsi häp tä ohanej tä aka wichi wuj tä ihanej tä yiset hal'äy tä ihi Líbano. Wet okawos tach'othiyela häp akawos tä tachumwethä, 9häpkhilek yäm wuj hal'äy tä yiset n'oho. Tsi hup tä õyenhilhila häp hup tä õyämla wuj wet isilataj. 10Ochenla ame n'olhäk tä akawos tä yisthen hal'äy lhäk: dos millones doscientos mil (2.200.000) kilos häp trigo, wet cebada tä ochen ame w'awulhi kilos häp trigo tä ochen ame. Wet cuatrocientos cuarenta mil (440.000) litros häp hat'es, wet aceite äp w'awulhi litros hat'es tä ochen ame.”
11Häp täjtso Salomón lhämet tä ichene rey Hiram. Wet tä Hiram hiw'en Salomón lhämet, wet nichulho, ichene lhämet wet yok:
“Awuk Dios ayen niyatayej häp Israel lhayis, tsi häp tä ihumin laka wichi.”
12Wet Hiram y'isej elh lhämet wet yok:
“Lewujyaj ihi Israel lhayis Lewuk Dios tä lhenek pule lhäy'e honhat, tsi häp tä hiw'enho David häp lhäs tä wuj tä ihan honhatej wet lechowej ihi wet is lechumyaj tä iwoye. Wet yenhihoplhila Lewuk Dios häp Lewukwe, lhäy'e lham lewukwe tä rey lew'et.
13“Ochen ame hin'o tä wuj tä ihanej lechumet lhäy'e tä lechowej ihi, wet häpe olheyfwa Hiram. 14Wichi tä tälhe letes Dan häp tä laka'tsinha lhäs, wet lajcha häp tä lew'et t'at Tiro. Lham wet wuj tä ihanej tä yenlhi häp oro, plata, bronce, lechinaj, tunte, hal'ä, lhäy'e wesaj tä n'oyik tä y'it, lhäy'e tä ichät, lhäy'e tä ifwak'an, lhäy'e lino tä wuj tä is. Nilhokej t'at m'ak tä ihanej tä yenlhi, lhäy'e lechinaj tä ilesaynhi chik itihi m'ayhay peykas. M'ak chik häpe chik let'uhläk yenlhi, yenhilhila t'at. Wet matche tä tach'othiyela häp akawos lhäy'e häp owuk David tä ajcha lakawos p'ante.
15“Athana, iwuk, is chik lechen n'oyehen tä akawos n'ohen häp n'olhäk tä lefwel n'oye tä let'uhläk lechen n'oyehen: häp trigo, cebada, aceite, wet hat'es. 16Olhamel oyisthihena hal'äy tä ihi Líbano tä am lewatlä, wet otlhunhiyeja pajla'tha nichäte lewomekitaj. Wet oskonla inäte wet oyäythilawek wet oyikhilachufwi, ohänhiyela Jope, wet nech'e amel tä lehänhiyela Jerusalén.”
17Häp täjtso rey Hiram lhämet tä ichene Salomón. Wet Salomón nech'e itetshanlä nilhokej häp wichi tä kahäpeya Israel lhayis tä ihi honhat tä Israel, mälhyej tä lajcha David iwoye p'ante tä itetshanlä wichi tä kalew'eta Israel. Wet Salomón nilhoka ciento cincuenta y tres mil seiscientos (153.600) häp wichi tä kahäpeya Israel lhayis tä iyej Israel lhayis. 18Wet Salomón itshupyene setenta mil (70.000) wichi tä talhunej m'ayhay, wet ochenta mil (80.000) hin'ol tä yisthen tuntey tä chenaj lhipey, wet tres mil seiscientos (3.600) hin'ol tä t'uye lhamel häpkhilek matche tä tachumwethä.
