Ezequías niyatej Judá
1Ezequías hiw'en p'ante veinticinco nekchämis tä iwo tesa leniyatyaj, wet veintinueve nekchämis tä ihi Jerusalén tä iwoye niyat lechumet. Wet lako atsinha tä lhey Abi, häp Zacarías tä lhäse. 2Wet Ezequías is alhoho m'ak tä iwoye, mälhyej iwoye lechäti David, wet Lhawuk käjejlhi.
Ezequías ne'tek yachajo tä õyen t'amajcheta Lhawuk Lew'et
3Häp nekchäm tä ichun wet iwel'a tä ichun tä Ezequías ihi leniyatyaj, ifwoyenchehen Lhawuk Lew'et lepelis wet ne'tek õ'kanchä. 4Wet t'änehen sacerdotes lhäy'e Leví lhayis, wet ihutwek tä ihi plaza tä tumej tä ifwala tälhche. 5Wet ifwenho lhamel tä yok:
–Ch'ahuyay n'oye, Leví lhayis. Amaj amejen wet alhen t'amajchetesayej Lhawuk, wet en t'amajcheta Lhawuk Lew'et tä atetsel laka Dios. Tonchephä ilhokej m'ayhay tä kok'aye tä ihi. 6Tsi lhachätilis itayhlä Lhawuk Dios wet iwoye m'ak tä ni'isa. Lhamel ileyej häp lham wet yen w'et m'ayeka Lew'et, nemhit iyahin. 7Wet lhamel hip'ohiche lepelis wet y'omathen lechäkwis, wet ileyej tä iwunej incienso wet nemhit yenlhi lew'ayhat tshätäy tä õ'wunhomche tä hiw'enho Israel laka Dios tä ihi Lew'et. 8Häp tä tumenej tä Lhawuk tawäkwäye Judá lheley lhäy'e Jerusalén lheley wet yachaje m'ak tä ni'isa yämlek itech'aynej m'ak tä nhoch'ay. Wet wichi iyhäj inuhat lhamhohen tä hiw'en wet itiyej leläkwyhanyaj, mälhyej tä amel atey tä hiw'en. 9Häp tä tumenej tä lhajchalis y'inhen tä ihi laka'tshayaj, wet lhales lhäy'e lhach'efwas tä õyen kwenkaya.
10“Athana olham owatläk y'alhayäm islä Lhawuk tä Israel laka Dios yämlek itiyej kanhi lewäkw tä iti n'amejen. 11Yaiyhäj, akhajyenhen. Tsi Lhawuk lham tä itshupi amehen yämlek ahäpehen lakawos wet lech'otaye lechumet wet lewunej incienso tä lew'enho.”
Sacerdotes lhäy'e Leví lhayis iwoye rey lhämet tä lhamel yachajo tä yen t'amajcheta Lhawuk Lew'et
12Wet Leví lhayisna tä õ'wo lheyisa lhamel lhaikhajyenhen tä iwoye m'ak tä rey Ezequías ne'tek iwoye:
Häp lhamel tä tälhe letes Coat:
Mahat tä Amasay lhäs lhäy'e Joel tä Azarías lhäs.
Wet iyhäj tä tälhe letes Merari:
Cis tä Abdi lhäs lhäy'e Azarías tä Jehaleel lhäs.
Wet iyhäj tä tälhe letes Gersón:
Joa tä Zima lhäs lhäy'e Edén tä Joa lhäs.
13Wet lhamel tä tälhe Coat lecheyäs p'ante Elisafán:
Simri lhäy'e Jehiel.
Wet iyhäj tä lechäti p'ante Asaf:
Zacarías lhäy'e Matanías.
14Wet iyhäj tä lechäti p'ante Hemán:
Jehiel lhäy'e Simey.
Wet iyhäj tä lechäti p'ante Jedutún:
Semaías lhäy'e Uziel.
15Häp Leví lhayistso lhamel ichunkat tä ihutwek iyhäj tä lepuhfwas wet ilhokej tä lhayen t'amajchetesayej Lhawuk. Tä ileyej, wet lhamel tiyäjchufwi Lhawuk Lew'et yämlek ilejchufwi wet yen t'amajcheta, mälhyej m'ak tä rey ne'tek lhamel iwoye lhäy'e tä Lhawuk lhämet tä ne'tek lhamel yen t'amajcheta Lew'et.
16Wet sacerdotes nech'e tiyäjchufwi p'ante Lhawuk Lew'et yämlek ilejchufwi wet yen t'amajcheta. Wet lhamel itonchephä ilhokej m'ayhay tä kok'aye tä ka'õt'amajchetesa tä ichufwi Lhawuk Lew'et, tä lhamel itihi Lhawuk Lew'et lhip tä i'alhotaje. Wet Leví lhayis tä lhamel ichuma, ihäne tewok lhäsaj tä lhey Cedrón. 17Häp lhamel iwo tesa tä ilejchufwi Lhawuk Lew'et ifwala tä ichun tä ihi iwel'a tä ichun. Wet tä tiyäme ocho ifwalas, lhamel ichäte lech'o elh tä ihi Lhawuk Lew'et lepe. Wet ocho ifwalas tä lhamel ilej häp lhip tä imälhehi tä ihi Lhawuk Lew'et, wet tä ichäte dieciséis ifwalas lhamel nech'e ihämit lechumet.
18Wet lhamel ihoye rey Ezequías lew'et tä lhamel ifwenho tä yok:
–Pajchene olhamel oyen t'amajcheta ilhokej Lhawuk Lew'et, lhäy'e altar tä tshätäy tä õ'wunhomche tä lew'et, lhäy'e ilhokej m'ayhay tä iyej, lhäy'e mesa tä õ'ti'pe pan tä õyen t'amajcheta, lhäy'e ilhokej m'ayhay tä iyej. 19Häte olhamel okanchä wet oyen t'amajcheta ilhokej m'ayhay tä rey Acaz itiyejche kanhi tä ihi naji leniyatyaj. Tsi lham iwoye m'ak tä ni'isa wet itayhlä Lhawuk. Wet athana m'ayhaytso ihi tä Lhawuk laka altar itayche.
Õyachaje Lhawuk häp Lew'et yämlek häpe t'at lham t'amajchet
20Wet rey Ezequías inuphä tä nech'e nämtaj wet ihutwek niyatey tä ihi Jerusalén wet ihoye Lhawuk Lew'et. 21Wet lhamel ichäj siete w'asetaj les, lhäy'e siete tson'atas, lhäy'e siete tson'ataj les, lhäy'e siete kayla les tä hin'ol, yämlek Lhawuk itäyhtejen lesukyajay häp rey lhäy'e lew'et lheley, lhäy'e ilhokej Judá lheley, lhäy'e tä yen t'amajcheta lham Lew'et. Wet rey ne'tek sacerdotes tä tälhe letes Aarón yenlhi Lhawuk lew'ayhat tshäwet tä õ'länhen tä iti'pe lham laka altar. 22Wet sacerdotes lhamel ilänhen w'asetaj les wet ichuma lew'oyis wet itsäype altar. Häte ilänhen tson'atas lhäy'e leles wet itsäype lew'oyis altar.
23Wet nech'e lhamel ihäne kayla les häp rey lhäy'e wichi, wet lhamel iti'pe lakweyey. 24Wet sacerdotes lhamel ilänhen tshätäy wet itsäype lew'oyis häp altar yämlek Lhawuk itäyhtej lesukyajay ilhokej Israel lhayis. Tsi rey tä lhämet tä ne'tek õ'länhen tshätäy yämlek täy ilhokej lhamel lesukyajay.
25Häte Ezequías ithatho Leví lhayis Lhawuk Lew'et tä lhamel ichäjthä arpas lhäy'e chinaj lhipey tä y'ajwek, mälhyej m'ak tä rey David p'ante ne'tek õ'woye, lhäy'e Gad, profeta tä hich'otejlhi p'ante rey, lhäy'e profeta Natán. Häpe täjtso Lhawuk lhämet tä ifwenho p'ante laka profetas. 26Wet Leví lhayis lhamel ikasthen tä ichäjthä músicas tä hätet iwoye David laka músicas p'ante, wet sacerdotes lhamel ichäjthä lefwolis trompetas. 27Wet Ezequías ne'tek õ'wunhomche tshätäy tä i'pe altar. Wet häpet tä iwo tesa, wet nech'e wichi iwo tesa tä ichoythä tä iwujyen Lhawuk. Wet sacerdotes yafwutche lefwolis wet Leví lhayis ithatlä laka músicas tä hätet iwoye Israel laka rey David laka músicas p'ante. 28Häp ilhokej wichi tä n'okwiyej Lhawuk, wet iyhäj tä õchoswos lhamel ichoythä wet sacerdotes yafwutche lefwolis. Häp ilhokej täjtso yäk noj, w'awulhej tshätäy tä õ'wunhomche.
29Wet nech'e rey Ezequías lhäy'e ilhokej iyhäj tä iyej tä lhamel lakamchetey itsinen tä n'okwiyej Lhawuk. 30Wet rey lhäy'e niyatey lhamel ne'tek Leví lhayis iwujyen Lhawuk tä lhamel iten David lhämtes p'ante lhäy'e profeta Asaf lhämtes p'ante. Wet lhamel iwoye p'ante wet wuj tä lakäjyaj ihi, wet lhamel lakamchetey itsinen tä n'okwiyej Lhawuk.
31Wet Ezequías tahuyej wichi tä yok:
–Athana tä amel alhen t'amajchetesayej Lhawuk, ämay alhoho wet chäjaye Lew'et tshätäy tä lelänhen lhäy'e häp Lhawuk lew'ayhat yämlek lewoyay graciasayej.
Wet wichi iwoye, lhamel ichäje tshätäy tä ilänhen lhäy'e häp Lhawuk lew'ayhat yämlek lhamel iwo graciasayej. Wet lhamel tä ihuminche, häte iwo lew'ayhata tshätäy tä õ'wunhomche. 32Häp tshätäy tä wichi ichäj tä õ'wunhomche ihi p'ante setenta w'asetas, lhäy'e cien tson'atas, lhäy'e doscientos tson'ataj les. Häp ilhokej tä õ'wunhomche wet õhw'enho Lhawuk. 33Häp tä ilhokej tshätäy tä õyen Lhawuk lew'ayhata ihi seiscientos w'asetas lhäy'e tres mil tson'atas.
34Mat tä niwuja'pe sacerdotes, tek w'awulhpe tä ilanhi t'ähes ilhokej tshätäy tä õ'länhen yämlek õ'wunhomche. Wet häp tä lepuhfwas Leví lhayis tä lhamel hich'ote tä ihämit lhamel lechumet, yämlek sacerdotes iyhäj lhaiwaklhathen tä lhayen t'amajchetesa. Tsi wujpe Leví lhayis tä pajche lhaiwaklhathen tä lhayen t'amajchetesa, lhamel hin'älit tä inu'pe sacerdotes. 35Iche t'at wujpe tshätäy tä õ'länhen tä õ'wunhomche, lhäy'e tshätäy t'alhäs tä õhw'enho Lhawuk yämlek wichi lha'isyene, lhäy'e õw'ayhtes tä hat'es tä õhp'ajtej tshätäy tä õ'wunhomche.
Mälhyej p'antetso tä wichi yachajo tä n'okwiyej Lhawuk tä ihi Lew'et. 36Wet Ezequías lhäy'e ilhokej wichi tä wuj tä käjejlhi m'ak tä Dios iwoyeje, tsi iläfwel ilhokej m'ak tä lhamel iwoye.
