Ezequías t'äne wichi yämlek iwo lakäjyaja tä itichunche Pascua
1-5Rey Ezequías yämhopthä p'ante leniyatfwas lhäy'e wichi tä ihi Jerusalén, wet lhamel yen tichunhayaja tä is chik iwo lakäjyaja tä itichunche Pascua wet iwujyen Lhawuk tä Israel laka Dios. Wet lhamel yok:
–Is chik n'enlhi Pascua chik iwel'a tä itay alhoho.
Tsi lhamel ihanej tä nikalhahi tä yenlhi Pascua häp iwel'a tä ihi lewhäytso, häp tä niwuja'pe sacerdotes tä lhaiwaklhathen tä lhayen t'amajchetesa, wet wichi kamaj tek lhaihutwek tä ihi Jerusalén.
Wet tä rey lhäy'e wichi ihumin chik yenlhi Pascua, wet rey nech'e iwo siläta ilhokej Israel lhäy'e Judá, tälhe Beerseba tä ihi lhip tä tapinhiye yäk ichäte Dan tä ihi lhip tä tafwojhiye. Häte ithate cartas Israel lhayis tä tälhe letes Efraín lhäy'e iyhäj tä tälhe letes Manasés, wet ne'tek ihoye Lhawuk Lew'et tä ihi Jerusalén tä iwo lakäjyaja'pe Lhawuk tä Israel laka Dios laka Pascua. Tsi pajche tä wichi nemhit lhaihutwek tä yenlhi Pascua mälhyej tä Dios lhämet p'ante yäme.
6Mälhyej p'antetso tä yikhen rey silätwos tä lhamel ichäj cartas tä tälhe rey lhäy'e leniyatfwas tä lhamel iwo siläta ilhokej Israel lhäy'e Judá. Wet rey lhämtes tä õ'lesayen yok:
“Israel lhayis, äple Lhawuk tä Abraham laka Dios, wet Isaac laka Dios, wet Israel laka Dios. Wet lham ihla amejen lhäy'e aiyhäj tä tefwayej Asiria lhayis laka niyatey. 7Wet yej amälhyej achätilis lhäy'e aiyhäj tä apuhfwas tä lhamel itayhlä p'ante Lhawuk Dios, tä lham yachaje lhamel lewit'äy yäk täylhi, mälhyej tä amel lew'enay. 8Yej alet'unthen, mälhyej achätilis. A'achajaye Lhawuk wet lhuyay, hoyaye Lew'et tä lham yen t'amajcheta yämlek tiyäj'attsiy. N'okwiyayej Lhawuk Dios, wet ilehiyeja tä iti amejen lewäkw. 9Wet chik amel lhäple Lhawuk, wet athana atayhfwas hip'altsenla apuhfwas tä yen lakwenkaya, lhäy'e amel alesay, wet hich'anlhahiyela lhamel chik yäple laka honhat. Tsi Lhawuk Dios leteläythayaj ihi wet p'altsentsaj, wet tek aitihiyeja kanhi chik lhäplaye lham.”
10Wet silätwos tiyäjche p'ante honhates tä lewuhuy wichi tä tälhe letetsel Efraín lhäy'e Manasés, wet lhamel tiyäjomche hupuy yäk ichäte wichi tä tälhe letes Zabulón laka honhat. Mat wichi tä lhamel hiw'en ischeyejen wet iläkwlhi lhamel. 11Mat iche iyhäjfwas hin'ol tä tälhehen wichi tä tälhe letetsel Aser, Manasés lhäy'e Zabulón, tä lhamel hich'ahuye rey lhämet wet lhay'ayhatchä, wet lhamel ihoye p'ante Jerusalén. 12Hätej wichi tä ihi Judá Dios hip'ajtitwek yämlek weihalhahchä letichunhayaj tä lhamel iwoye rey silät lhäy'e leniyatfwas, mälhyej Lhawuk lhämet tä ne'tek lhamel iwoye.
Wichi iwo lakäjyaja tä itichunche Pascua
13Mälhyej p'antetso tä ihi lewhäy iwel'a dos, wujpe wichi tä lhaihutwek tä ihi Jerusalén yämlek iwo lakäjyaja tä tuj pan tä levadura newayej. 14Häp lhamel ichunkat tä inachuhen ilhokej altares lhäy'e lhipey tä õ'wunej incienso lew'et tä ihi Jerusalén, wet lhamel ithate tewok lhäsaj tä lhey Cedrón.
15Häp ifwala tä catorce tä ihi iwel'a dos tä õ'län p'ante tson'ataj les tä õtuj tä Pascua. Häp sacerdotes lhäy'e Leví lhayis lhamel len'äfwlhi ihi tä n'äfwel letapehen. Wet lhamel lhaiwaklhathen tä lhayen t'amajchetesayej Lhawuk wet ichäje Lhawuk Lew'et tshätäy yämlek lhamel ilänhen wet iwunhomche wet hiw'enho Lhawuk. 16Wet lhamel itshupiye lew'etes, mälhyej tä Ley p'ante tälhe Dios lakawo Moisés yäme. Wet Leví lhayis hiw'enho sacerdotes häp tshätäy tä õ'länhen lew'oyis, wet sacerdotes itsäype altar. 17Wet tä wuj wichi tä lhaihutwek tä lhamel lhaknena t'amajchetesa, häp tä tumenej tä Leví lhayis tä itetshan, wet lhamel tä ilänhen tshätäy yämlek wichitso isej wet nech'e lhayen t'amajchetesayej Lhawuk wet iwo lakäjyaja'pe häp Pascua. 18-19Mat wujpe wichi tä tälhehen lhamel tä tälhe letetsel Efraín, Manasés, Isacar, lhäy'e Zabulón, tä lhamel tuj t'at lhäk tä Pascua tä kamaj lhaknena t'amajchetesa. Wet häp tä lhamel inäk'äs Dios lhämet p'ante. Mat Ezequías iwo let'alhyaja'pe lhamel wet yok:
–Iwuk, ahäpe Elh tä is. Olhaip'altsen ame, täyhat letes ilhokej lhamel tä wak'alh lehusey yämlek t'u amche wet ayen Lewuka tä ahäpe lhamel letetsel laka Dios, tej tä lhamel lhaknena amajchetesa mälhyej tä t'uhawetej chik iwoye tä ihoye Haw'et.
20Wet Lhawuk ichulho p'ante Ezequías let'alhyaj tä iwoye, wet itäyhat letes wichi. 21Mälhyejtso p'ante, ihi siete ifwalas tä Israel lhayis tä ihi Jerusalén lhamel iwo lakäjyaja tä tuj pan tä levadura newayej, wet wuj tä kästhä lhamel. Häp sacerdotes lhäy'e Leví lhayis ilhokej häp ifwalas tä lhamel ichoythä tä iwujyen Lhawuk tä lhamel y'aji laka música tä äytaji.
22Wet Ezequías käjejlhi Leví lhayis wet yok:
–Wuj tä is amel achumet.
Tsi lhamel hin'älit tä wuj tä ihanej tä hich'ote wichi yämlek n'okwiyej Lhawuk. Wet ihi siete ifwalas tä wichi t'ekhen tä tuj lhäk tä iwo lakäjyaja, lhäy'e tä iwujyen Lhawuk tä lhamel letetsel laka Dios, lhäy'e tä ilänhen tshätäy tä hiw'enho Lhawuk yämlek lha'isyene.
Wichi tujlhache lakäjyaj
23Wet ilhokej wichi tä lhaihutwek tä iwatläk lhamel kamaj tujlhache siete ifwalas tä iwo lakäjyaja. Wet lhamel iwo lakäjyaja siete ifwalas wet wuj tä kästhä. 24Tsi rey Ezequías hiw'enho wichi mil w'asetaj les lhäy'e siete mil tson'atas. Wet leniyatfwas lhamel hiw'enho wichi mil w'asetaj les lhäy'e diez mil tson'atas. Wet wujpe sacerdotes tä lhayen t'amajchetesayej Lhawuk.
25Wet ilhokej wichi tä ihi Judá tä iwo lakäjyaja, hätej sacerdotes lhäy'e Leví lhayis, lhäy'e ilhokej häp wichi tä tälhe Israel, lhäy'e häp wichi tä w'enha lhamej tä lhamel yen lew'eta Israel tä nämhen tä tälhe Israel, lhäy'e wichi tä w'enha lhamej tä yen lew'eta Judá tä nämhen. Ilhokej lhamel tä kästhä, 26wet wuj õkäjyaj tä ihi Jerusalén. Tsi tälhe p'ante ifwalas tä rey Salomón tä David lhäs ihi leniyatyaj, ihichet'a m'ak tä wuj lhäy'e õkäjyaj tä ihi Jerusalén. 27Wet Leví leles tä häpehen sacerdotes ikasthen tä t'alhe Lhawuk chik ikäpfwaye wichi. Wet Lhawuk iläte lhamel tsi let'alhyaj yäk ichäte Lew'et tä T'amajchet tä ipuleye.
