2~Crón 34

₁Josías hiw'en p'ante ocho nekchämis tä iwo tesa leniyatyaj tä ihi Judá, wet treinta y un nekchämis tä ihi Jerusalén tä iwoye niyat lechumet. ₂Wet Josías is alhoho m'ak tä iwoye wet Lhawuk käjejlhi. Wet ihän t'at m'ak tä lechäti David iwoye wet nemhit ileyej.

₃Ihi ocho nekchämis tä Josías ihi p'ante leniyatyaj, tä kamaj häpe manse, wet nech'e iwo tesa tä t'ukwe lechäti David laka Dios. Wet ichäte doce nekchämis tä ihi leniyatyaj tä iwo tesa tä ilejphä Judá lhäy'e Jerusalén, lhäy'e õn'okhayajw'etes tä ihi lhipey tä toschephä, lhäy'e hal'äy tä dios tsinha tä lhey Asera lepeykas, lhäy'e õcheyälis tä chinhas. ₄Wet Josías ne'tek õ'wasthiche ilhokej altares tä wichi ihoyepej tä n'okwiyej dios lhayis tä kamatachehen tä lhey Ba'al lhayis lepeykas tä w'enhahiche. Hätej Josías ne'tek õ'wo lhipeya altares tä incienso lew'et tä iche'pe iyhäj altarestso. Wet õyisthen hal'äy tä Asera lepeykas, wet õ'wasthiche õcheyälis tä chinhas. Wet õ'wo lhipeya yäk lemok wet õ'tsäype letseyhay häp wichi tä n'okwiyej lhamel. ₅Häp häte iwunhomche lhamel laka sacerdotes lhiley, iti'pe laka altares. Wet mälhyej p'antetso tä ilejphä Judá lhäy'e Jerusalén. ₆Häte ithatlä p'ante hupuy tä ihi honhates tä lewuk wichi tä tälhe letes p'ante Manasés, lhäy'e tä tälhe letes Efraín, lhäy'e tä tälhe letes Simeón, wet yäk ichäte iyhäj tä letes p'ante Neftalí, lhäy'e tä ihi ilhokej lhipey tä ischephä tä iwhäye hupuy. ₇Iwasthiche altares tä ihi ilhokej honhat tä Israel, wet yisthen hal'äy tä Asera lepeykas, lhäy'e õcheyälis tä iwasthiche, wet iwo lhipeya yäk lemok. Häte iwasthiche ilhokej altares tä incienso tä lew'et tä õ'wunej. Häp tä ileyej p'ante, wet yäple Jerusalén.

₈Ihi p'ante dieciocho nekchämis tä rey Josías ihi leniyatyaj, wet tä ileyej tä ilejphä honhat lhäy'e Lhawuk Lew'et, wet ichene Safán tä Asalías lhäs, lhäy'e Maasías tä iyhäj kaniyat tä ihi Jerusalén, lhäy'e õlesaynekwo tä lhey Joa tä Joacaz lhäs, yämlek lhamel ikanchä Lhawuk Lew'et. ₉Wet lhamel ihoye Sacerdote tä Lhamya tä lhey Hilcías wet lhamel yachaje kolhki tä pajche õ'hänchufwi Lhawuk Lew'et. Häp Leví lhayis tä lepewos lhamel tä pajche ichumlä kolhkina tä tälhe wichi tä Manasés lhayis lhäy'e Efraín lhayis, lhäy'e wichi tä imälhehi p'ante Israel, lhäy'e ilhokej lhamel tä ihi honhates tä lewuhuy Judá lhayis lhäy'e Benjamín lhayis, lhäy'e wichi tä ihi Jerusalén. ₁₀Wet õyachaje kolhki häp hin'ol tä itetshan õchumyaj tä ihi Lhawuk Lew'et, yämlek lhamel tische häp iyhäj tä ichumthä tä ikanchä Lhawuk Lew'et. ₁₁Wet õyachaje kolhki häp hin'ol tä yen lechumyaja hal'äy, lhäy'e iyhäj tä yenthä õwukwey, yämlek lhamel ichäj tuntey lhäy'e hal'äy tä õyen lep'alkatseka, yämlek ineyhatphä hup, ithatho laka ch'utey täjp'ante Judá laka reyes nitetshana.

₁₂Häp hin'oltso lhamel wuj tä t'amajej lechumyaj. Wet iyhäj tä itetshan lhamel häpe Leví lhayis tä lheyis Jahat lhäy'e Abdías tä lhamel tälhe letes Merari, wet Zacarías lhäy'e Mesulam tä lhamel tälhe letes Coat. Wet Leví lhayis ilhokej tä wuj tä ihanejen p'ante música, ₁₃wet häte lhamel itetshan wichi tä tilhäjthä m'ayhay, lhäy'e ilhokej chumhas tä yenlhi lechumtes tä w'enhahiche. Wet iche Leví lhayis iyhäj tä häpehen õlesaynekwos, wet iyhäj häpehen iyhäj kaniyatey, wet iyhäj häpehen lepewos.

₁₄Häp tä õ'tonphä kolhki tä pajche õ'hänchufwi Lhawuk Lew'et, häp sacerdote Hilcías ilhoke õlesaynekhi tä Lhawuk laka Ley p'ante tälhe Moisés ihi. ₁₅Wet ifwenho Safán tä õlesaynekwo tä yok:

–Olhoke õlesaynekhi tä Ley p'ante tälhe Moisés ihi tä ichufwi Lhawuk Lew'et.

Wet Hilcías hiw'enho Safán Ley lehi, ₁₆wet Safán ihäne häp rey. Wet ifwenho rey tä yok:

–Iwuk, häp akawos lhamel iwoye ilhokej m'ak tä lene'tek iwoye. ₁₇Lhamel ichuma ilhokej kolhki tä ihi Lhawuk Lew'et, wet lhamel yachaje chumhas lhäy'e iyhäj tä itetshan õchumyaj.

₁₈Hätej Safán yok:

–Sacerdote Hilcías hiw'en n'oho õlesaynekhi.

Wet Safán iyahyenho rey.

₁₉Tä rey iläte m'ak tä Lhawuk lhämet yäme tä ihi lehi, wet hich'esajche lew'uy tä yen tetneka tä wuj tä lelhakli ihi. ₂₀Wet ichene sacerdote Hilcías, lhäy'e Ahicam tä Safán lhäs, lhäy'e Abdón tä Micaías lhäs, lhäy'e Safán tä õlesaynekwo, lhäy'e Asaías tä rey lech'otfwa. Wet rey ifwenho lhamel tä yok:

₂₁–Mäh ätshane Lhawuk m'ak tä olham omälhnhiyeja, lhäy'e wichi tä imälhehi Israel lhäy'e Judá. Ätshaneje lhämtes tä õ'lhokpe tä ihi õlesaynekhina. Tsi Lhawuk wuj lewäkw tä iti n'amejen, häp tä lhachätilis nit'amajayej p'ante Lhawuk lhämtes wet niwoyaye m'ak tä ihi lehina.

₂₂Wet Hilcías lhäy'e iyhäj ihoye atsinha tä profeta tä lhey Hulda, atsinha tä Salum tä lech'efwa. Salum häpe Ticva lhäs wet Harhás tä lecheyäs, wet häpe elh tä t'uye õkhäy tä ichufwi Lhawuk Lew'et. Wet atsinhatso tä lhey Hulda lew'et ihi p'ante Jerusalén lhip tä nech'ayek. Wet tä hin'oltso tä rey kachenhay ichäte, wet lhamel ifwenho atsinha häp rey letichunhayaj. ₂₃Wet atsinha ichulho lhamel tä yok:

–Lhawuk tä Israel laka Dios lhämet yok, “Fwenho häp hin'o tä alechenhay tä leho n'oye ₂₄tä olham tä ohäpe Awuk Dios oyok, Ochenla'pe m'ak tä ni'isa hupuyna lhäy'e wichi tä ihi. Ochenla'pe ilhokej õwit'äyhyajay, mälhyej tä õlesaynhay yäme tä ihi lehi tä õyahyenho Judá laka rey. ₂₅Tsi lhamel iwomn'o wet iwunej incienso tä lhamel yen n'okhayajayej dios lhayis iyhäj. Wet lhamel iwäkwyhayen n'oyej ilhokej m'ak tä ni'isa tä iwoye. Häp tä tumenej tä naj lepesa owäkw tä otiyej lhamel lhäy'e hupuyna.”

₂₆Wet atsinha äp yok:

–Wet häp Judá laka rey tä ichen amehen Lhawuk tä ne'tek lech'ahuyaye, fwenho lham häp Lhawuk tä Israel laka Dios lhämet tä yok, “Am lech'ahuye m'ak tä ihi lehi tä leläte tä õyahyenne, ₂₇wet lewo ahusek elha wet aley'ayhatchä tä ihi tä olham otayche. Wet leläte m'ak tä oyäme tä otayhte lewit'äy hupuyna lhäy'e wichi tä ihi. Wet tä wuj tä alhakli ihi, lech'esajchehen akhäy wet letafwlhi. Tä mälhyejtso, ofwen amho tä häte olham olät ame wet och'ahu ame. ₂₈Wet atamsek ihihla chik ley'inla wet lehohiyela achätilis, wet atey tek hiw'enla'pe m'ak tä ni'isa tä ochätyenla'pe hupuyna lhäy'e wichi tä ihi.”

Wet rey silätwos yikhen tä iwo siläta rey.

₂₉Rey Josías t'äne ilhokej hin'ol tä thänhäy tä ihi Judá lhäy'e tä ihi Jerusalén, ne'tek lhaihute. ₃₀Wet rey ihoye Lhawuk Lew'et, lhäy'e ilhokej hin'ol tä ihi Judá, lhäy'e ilhokej wichi tä ihi Jerusalén, lhäy'e sacerdotes, lhäy'e Leví lhayis, lhäy'e ilhokej wichi, häp iyhäj tä len'ohyaj ihi lhäy'e iyhäj tä naj len'ohyaja. Wet rey iyahyenho lhamel ilhokej Dios lhämtes tä ihi lehi tä õ'lhoke tä ihi Lhawuk Lew'et. ₃₁Wet rey ikasit tä ihi lew'et wet lhaifwenho Lhawuk tä iwohiyela m'ak tä is wet imälhthilawek lakhajyhayaj lhäy'e letichunhayaj tä iwohiyela ilhokej Lhawuk lhämtes lhäy'e lechufwenyajay tä ihi õlesaynekhi. ₃₂Häte Josías inityenej p'ante ilhokej wichi tä ihi Jerusalén, lhäy'e Benjamín lhayis tä ihi Jerusalén, tä lhamel fwitaj iwohiyela m'ak tä ihi õlesaynekhi. Wet lhamel häm iwoye Dios lhämet tä lhamel lhayäm islä lham tä letetsel laka Dios. ₃₃Häte Josías itäyhthen ilhokej m'ayhay tä ni'isachehen tä Lhawuk n'äyihomche tä i'pe ilhokej honhat tä lewuk Israel lhayis, wet ne'tek ilhokej wichi tä ihi Israel n'okwiyej Lhawuk Dios. Wet ilhokej ifwalas tä kamaj iläy Josías tä lhamel ilehiyejt'a Lhawuk tä letetsel laka Dios.