1Wet tä lepese, wak'alh nilhokej m'ak tä Salomón ne'tek õyenhoplhi Lhawuk Lewukwe lhäy'e tä õyenejlhi hup. Wet nech'e ihän lech'oye häp m'ayhay tä oro lhäy'e tä plata tä lajcha David yen p'ante t'amajchetesayej Lhawuk. Wet Salomón itichufwi hupch'o elh tä õyen lew'eta tä õt'amajej häp Dios Lewukwe lakäywet.
Õy'ayhatchufwi Dios Lewukwe häp Arca tä N'ot'amajchet tä Dios lhämtes ihi
2Rey Salomón t'änehen hin'ol tä thänhäy yämthilek lhaihutwek tä ihi Jerusalén, lhäy'e nilhokej iyhäj tä niyatejen Israel lhayis tä tälhehen letetsel tä ihi doce, lhäy'e hin'ol tä niyatej lew'et lheley lhäy'e lepuhfwas. Wet Salomón ne'tek õy'ayhat Arca tä N'ot'amajchet tä Lhawuk lhämet lehi, tälhe Sión tä David laka Hupuy. 3Wet häp tä nilhokej Israel lhayis lhaihute Salomón häp iwel'a tä siete. Häpe t'at lewhäy tä wichi yenlhi lakäjyaj tä lhey N'ohupelis tä yen tichunhayaja m'ak tä lechätilis iwoye p'ante. 4Wet tä nämhen hin'ol tä thänhäy, wet Leví lhayis tachuma wet tilhäj Arca tä N'ot'amajchet tä Dios lhämet lehi, 5wet y'ayhte Dios Lewukwe. Wet iyhäj lhamel, lhäy'e sacerdotes, lhamel y'isej Dios lewukwe tä pajche tä häpe tsänt'äj, lhäy'e nilhokej m'ayhay tä t'amajchetes tä ichufwi, wet ihäne Dios Lewukwe tä nech'ayek. 6Wet Salomón lhäy'e nilhokej Israel lhayis lhamel lhaihutwek, ihi tä Arca tä N'ot'amajchet tä Dios lhämet lehi tatache. Wet lhamel ilänhen tson'atas lhäy'e w'asetas tä yen n'okhayajayej Lhawuk. Wujpey itshätäy tä ilänhen, nemhit õ'hanej chik õ'wo t'ufwahtesa.
7Wet sacerdotes ihän lech'oye Lhawuk Lewukwe häp Arca. Ihäne Lhip tä Lhamya tä N'ot'amajchet wet itichufwi m'ayhay tä lhafwis ihi. 8Wet m'ayhaytso hich'enhiche lhafwis wet tataype lhip tä Arca ihi. Lhamel hip'oyejpe lhafwis Arca lhäy'e hal'äy tä n'otsokkay tä õtilhäj Arca. 9Pites hal'äyna häpkhilek õhw'en chik õ'ichufwi Lhip tä N'ot'amajchet, mat chik õknewachufwi, häp tä nemhit õhw'en. Wet itchufwi Lhip tä Lhamya tä N'ot'amajchet yäk nämena. 10Wet Arca ts'ilak t'at täkwfwas tuntey p'ante n'olesaynhay ihi, tä Moisés ithatho tä ihi Horeb. Häpe t'at Lhawuk lhämtes tä yenhoplhi p'ante Israel lhayis tä yen laka wichiya tä lhamel yikch'oye honhat tä Egipto.
11Wet sacerdotes inukwephä p'ante tä tälhchufwi häp Lech'o elh tä N'ot'amajchet. Nilhokej lhamel pajche lhayen t'amajchetesayej Lhawuk, nemhit lhamel itetshan lewhäyis tä tachumwethä. 12Wet nilhokej Leví lhayis tä lechumet tä t'ichoywethä, Asaf, Hemán, lhäy'e häp Jedutún, wet lhäy'e leles lhäy'e häp lepuhfwas, lhamel takasthen, ihi t'at altar lhip tä ifwala tälhche. Taw'uyhiche lew'uyis tä lino tä wuj tä is, wet ichäjwethä arpas lhäy'e chinaj lhipey tä õy'ajwek. Wet ciento veinte (120) sacerdotes tä yafwutchehen p'ante lefwolis.
13Wet nilhokej häp lhamel tä yafwutchehen lefwolis, wet äpte nilhokej iyhäj tä t'ichoywethä, tsi matche tä lhamel akäjejlhi häp Lhawuk wet iwujyen. Yafwutchehen lefwolis wet y'ajwek häp chinaj lhipey wet lhäy'e iyhäj häp n'ofwolis. Wet äpte lhamel t'ichoywethä, lhamel t'ichoyejlhi len'okhayaj tä itiyej Lhawuk. Wet letenek tä iten yok:
“Wuj tä is Lhawuk, hap'altsentsaj.
Lajit lepesa häp lehumnhayaj.”
Wet yokwet pule näm, tiyäjchufwi Lhawuk Lewukwe wet tapoyej. 14Wet sacerdotes nemhit ikalhi chik iwo chumeta, tsi Lhawuk lewujyaj tä isi tapoyej Lewukwe.
