2~Crón 8

₁Tä tajyäme p'ante veinte nekchämis tä õyenlhi Lhawuk Lewukwe lhäy'e häp rey lewukwe tä Salomón lew'et, ₂wet Salomón ne'tek õyenchelhi häp honhat lhipey tä nitäkwpej hupuy tä ihiche tä rey Hiram hiw'enho p'ante. Wet häp tä Salomón yen Israel lhayis lew'etesa.

₃Tä tajyäme täja, wet Salomón ihoye häp hupuy tä Hamat lhäy'e Soba tä tott'aho, wet tatayhlä wet ikalhi, lhayen lewukwa. ₄Äpte ne'tek õyenlhi hupuy tä Tadmor tä ihi honhat tä ts'anis, lhäy'e nilhokej honhates tä sip'äl lewukwey ihi. Häp tä õyenchelhi tä ihi t'at häp Hamat. ₅Äpte ne'tek õyenlhi Bet-horón lhip tä tumej kaphä lhäy'e häp lhip tä tumchä, wet ikhajyenhen hupuytso wet yenchelhi lelafwey tä tuntey tä tach'opwayhen, lhäy'e lepe p'otes, lhäy'e lechinhas. ₆Wet äp yenlhi Ba'alat, lhäy'e honhates tä sip'äl lewukwey ihi, lhäy'e honhates iyhäj tä itihi laka kaletas tä laka'tshayajchal, lhäy'e honhates iyhäj tä itihi laka sip'äl tä yen lew'uteya yel'atas, lhäy'e nilhokej m'ak tä pajche lham t'uhläk yenchelhi tä ihi Jerusalén, lhäy'e Líbano, lhäy'e nilhokej honhatil tä lham tä lewuk.

₇Iche wichi tä imälhehi honhat tä Israel tä kahäpeya Israel lhayis. Häpehen Het lhayis, Amorreo lhayis, Ferez lhayis, Hiv lhayis, lhäy'e Jebús lhayis. ₈Wet tä Israel lhayis nikalhahi p'ante chik tifwej, tej tä nem ichehen lhamel thayej, leles kamaj imälhehi t'at honhatna, wet lelesna tä Salomón ichumyenwethä, yäm äytajche lhamel lechumet pajtha ifwalasna. ₉Mat ihichet'a Israel lhayis elh chik Salomón ichumyenlhi chik mälhyej chik yen kweneka. Tsi lhamel häpehen t'at sip'äl, lhäy'e tä laka niyatey, lhamel tä yikchufwi kaletas tä n'oka'tshayajchal wet lhamel tä iche'pe yel'atas tä n'oka'tshayajchal. ₁₀Wet hin'ol tä Salomón yen lewosa tä itetshan n'ochumtes, ihi p'ante doscientos cincuenta (250).

₁₁Wet Salomón y'ayhat lech'efwa tä Egipto kaniyat lhäse. Y'ayhatlä häp rey David p'ante laka Hupuy wet ihäne niyat tsinha lewukwe tä pajche ne'tek õyenhoplhi häp lech'efwatso. Tsi häp tä yok:

–Och'efwa iwohiyet'a chik ichufwi häp rey David, Israel lhayis laka rey, lewukwe. Tsi häp tä pajchehte õ'häne David laka Hupuy häp Arca tä Lhawuk lhämtes ihi, tsi lhip chik häpe tä Arca ihi, häpe Lhawuk t'amajchet.

₁₂Wet Salomón yenpej n'okhayajayej Lhawuk häp itshätäy tä õ'wunhomche tä õ'ti'pe altar tä Salomón ne'tek õyenlhi tä ihi tä Lhawuk Lewukwe tatache. ₁₃Salomón itetshan häp ifwalas tä mälhyej tä Ley p'ante tälhe Moisés yäme, wok oyok, ifwalas tä n'ot'elakw'et, lhäy'e tä iwel'a nech'ayek, lhäy'e n'okäjyajay tä ihi tres tä nekchämpej, tä wichi tufw pan tä levadura newayej, lhäy'e tä iwo lakäjyajayej tä ilanhi yachuyaj lhay tä yachaje Lhawuk, lhäy'e n'okäjyaj tä N'ohupelis. Nilhokej ifwalastso Salomón yenpej n'okhayajayej Lhawuk häp itshätäy tä õ'wunhomche.

₁₄Wet Salomón ikalelhät ifwalas tä sacerdotes elhpej laka ifwala tä iwo chumeta, mälhyej tä lajcha David ichufwenej p'ante. Wet yen Leví lhayis chumeta tä n'okwiyej Lhawuk, wet nilhokej ifwalas tä tach'otepej sacerdotes, m'ak at chik häpe tä sacerdotes iwatejlä chik häpe ifwala tä laka ifwala tä tachumlhi. Äpte Salomón ikalelhät ifwalas tä hin'ol tä t'uye Lhawuk Lewukwe elhpej laka ifwala tä iwo chumeta, lepe tefwaji lewo, mälhyej tä Dios lakawo David ichufwenej p'ante Salomón. ₁₅Wet häp tä mälhyej'attso, nilhokej m'ak tä David ne'tep'antek õ'woyeje sacerdotes, wet õ'woye t'at, lhäy'e m'ak tä ne'tep'antek õ'woyeje Leví lhayis, lhäy'e hupch'o elh tä õyen lew'eta tä õt'amajej häp Lhawuk Lewukwe lakäywet. Salomón ilehichet'a tä iwoye nilhokej lajcha lhämtesna. ₁₆Nilhokej m'ak tä Salomón t'up'antehläk yenlhi, wet yenlhi t'at, tälhe ifwala p'ante iwo tesa tä yenlhi Lhawuk Lewukwe lefwetes pajtha wak'alh. Wet tä yämche Lhawuk Lewukwe, ihichet'a lhip chik niwak'alha, wak'alh nilhokej.

₁₇Wet Salomón ihoye honhat lhipey tä lheyis Esión-geber lhäy'e Elat tä lhamel iwhäye Lewomekchät wet ihi honhat tä Edom. ₁₈Wet Hiram ichene laka barcos, lhäy'e lewos tä wuj tä ihan honhatejen tä nitäfwelpe inät tä lewomekitaj. Wet lhamel ihoye honhat tä Ofir, lhäy'e Salomón laka barcos lewos, wet tachuma quince mil (15.000) kilos häp oro wet ichäje Salomón.