2~Cor 13

₁Häp täja tercera vez che osikayhla amehen. Dios lhämet tä ihi Lehi yok, “Nilhokej m'ak at che häpe che õyäme, is che iche dos wok tres iyhäj tä yäme tä kalelhäj tä matche t'at.” ₂Täjnaj oyachajo tä osikay amehen, oyäm äytajche olhämet tä ofwenho iyhäj tä pajche iwoye lech'isukyajay. Wet athana tä n'am ne amejen, oyachajo olhämetnajtso, wet ofwenho lhamel lhäy'e nilhokej iyhäj, oyok, Che äp oyachajiholak osikay amehen, tek owohla op'altsenyaja. ₃Let'uyaykwe m'ak che yäm kalelhäj tä matche tä oyäme Cristo lhämet. Lhek yahinya, Cristo häpkhit'a elh tä nitkhajaya tä i'amejen, mat lakhajyhayaj ihi che itetshan m'ayhay tä lewoye. ₄Matche, tä õhp'ajtej cruz, hätet iwoye elh che lajit lakhajyhayaja, mat äp isej t'at Dios lakhajyhayaj wet iläy. Wet häp tä hätet iwoye täjtso, olhamel olhaip'ajtej lak'efwhayaj, mat tä op'akej lham, oisiyeja Dios lakhajyhayaj yämthilek owoye ochumet tä oi'amejen.

₅Atetshan amel wet tichun amhohen. ¿Hä matche tä i'amejen achayaj? ¿Hä lehanej tä Jesucristo i'amejen? Tsi che nimälhyayejtso, ¿atsi m'ak tä aisej? ₆Wet che aletetshan, tetshan olhamel häte, wet lehanhiyeja tä ohäpehen t'at apóstoles tä matchehen. ₇Olhamel ot'alhe Dios yämthilek amel tek lewoyaye m'ak tä ni'isa. Häpkhit'ak olhamel on'älit tä is at alhoho ochumet tä owoye tä oihte amejen, mat tajlhama tä ot'uhläk lewoye t'at m'ak tä is, tej che n'äl tä on'ohyaj newahi thayej. ₈Tsi olhamel ohanhiyejt'a owoyneje che ottayhlä Dios lhämet tä matche, tajlhama tä otch'ote t'at. ₉Wet häp tä okäjyaj ihi che in'oyejen ok'efwhayajay mat amel atkhajayhen. Wet olhamel otujlhahichela tä oy'alhyen amehen Dios, häpkhilek matche tä aisen. ₁₀Häp tä ochen amehen oka cartana tä n'am ne amejen, häpkhilek che oho amehen, newache m'ak che tamenej che olhämet äytaj. Tsi häp on'ohyaj tä Lhawuk hiw'en n'oho, häpkhit'ak owastejiche amel, mat häpkhilek otch'ot amehen wet ahusey isej.

₁₁Eh wet tä lepes olhämet, ipuhfwas, is che atamsekis i'amejen. Ämay matche tä ale'isyenhen, akhajyenhen, aw'awlhatejchä achowhal wet ti amejen atamsek. Wet Dios tä n'ohumnhayaj lhäy'e n'otamsek tälhe, ihla amejen. ₁₂N'okwi amejen, tsufwel amejen tä lhen atetneka tä ahäpehen Dios leles. Nilhokej Dios leles ichen amehen len'okhayaj.

₁₃Is che Lhawuk Jesucristo lep'altsenyaj, lhäy'e Dios lehumnhayaj, lhäy'e Espíritu tä T'amajchet lech'otyaj, i'amejen nilhokej amel.