2~Cor 2

₁Häp tä tamenej tä n'am t'uhläk otpil amehen wet oailhaklitwethä, mälhyej ifwalasnaj oho amehen. ₂Tsi tä olham owo alhakliya, ¿atsihila elh chik iwo okäjyaja? ₃Häp tä tamenej tä olesayen naji olhämtes mälhyej tä amel lew'enay n'aji tä ochen amehen, tsi tek ot'uhläk oho amehen yämthilek olhakli ihi amejen. ¡Tsi amel t'uhawetej chik okäjyaj ihi amejen! Wet okachuhit'a tä amel akäjyaj tälhe t'at okäjyaj chik in'oyej. ₄Tä olesayen naji oka cartatso, wuj tä olhakli ihi wet lhäy'e lhip tä äytaj otichunhayaj yäk olhafwyhayaj in'oyej. Mat ochenhit'a amehen olhämet yämthilek alhakli ihi, mat ot'uhläk lew'enay tä matche tä oaihumnhen.

₅Häp hin'o tä i'amejen tä yenlhi n'aji n'olhakli, ts'ilakhit'a olham tä ilhaklitn'o. Y'aje nilhokej amel, mat oyok, lhip is t'at, lhip isit'a. ₆Wet tä wujpe amel tä letiyej letes elhtso, naya t'at. ₇Mat athana is che letäyhtej letes wet lekhajyen lehusek, tsi elat y'ilej lefwitajayaj tä wuj. ₈Häp tä tamenej tä olhaip'altsen amehen, is che len'älit tä kamaj lehumin t'at.

₉Ochennaj amehen olhämtes tä oyelhtej amehen wet ot'uhläk ohanej che lewoyayepej m'ak tä one'tek lewoyaye. ₁₀Tä mälhyejtso, elh at che häpek letäyhtayej letes, häte olham otäyhtej t'at. Oyok, che letes ihi p'iya, otäyhtej tä oihi tä Cristo itayche, yämthilek amel aisej ₁₁wet niwohit m'ak che Satanás yen len'äyija n'amejen, tsi y'antäfwelej t'at lakeyes.

₁₂Ohoye naji hupuy tä Troas yämthilek owo silätahi Dios Silätyaj tä yäme Cristo. Tä onchäte, ow'en tä hätet iwoye che tafwoche t'at lepe yämthilek otch'ote Lhawuk lechumet. ₁₃Mat otamsek ihihit'a tä n'am w'en opuhfwa Tito. Häp tä tamenej tä owo tsilhekayej Dios leles tä oiyej, wet ohoye Macedonia.

₁₄Mat owo graciasayej Dios, tsi tä Cristo pajche ikalhi laka'tshayaj, Dios hip'ajtit n'oyejen häp lham. Wet äp wichi is n'oyejen tä otäfwnhatej lhamel häp Dios, wet letäfwnhayajna y'ajpe nilhokej honhatil, mälhyet m'ak tä lenij akäjche. ₁₅Tsi olhamel ohätet iwoye incienso tä Cristo yachaje Dios. Lenij akäjche, wet häp wichi tä ihoye lefwayhyaj lhäy'e iyhäj tä ihoye letäyhyaj, lhamel ilätche t'at lenijtso. ₁₆Wet lhamel tä ihoye letäyhyaj, t'ilek t'at lenijtso, mat iyhäj tä ihoye lefwayhyaj, lew'atshancheyaj t'at lenijtso.

Mat ¿atsi tä ikalhi lechumettso? ₁₇Iche wujpe iyhäj tä t'uhläk ikalhi chinaj t'äj, wet häp tä fwetaj Dios lhämet tä yen chumeta. Mat olhamel tek ohäte iwoye lhamel, ohäpehen Dios chenhay wet äp Cristo kawos. Wet tä oyen lhämeta Dios lhämet, ihichet'a m'ak tä kamatache tä tumchä tä ihiche ohusey, wet owoye t'at ochumet tä oihi tä Dios itayche.