2~Rey 12

₁Ihi siete nekchämis tä Jehú niyatej Israel, häp Joás nech'e iwo tesa tä lhayen niyata tä ihi Judá. Hiw'en p'ante siete nekchämis tä iwo tesa leniyatyaj, wet cuarenta nekchämis tä ihi Jerusalén tä iwoye niyat lechumet. Wet atsinha tä lako lhey Sibia tä lew'et Beerseba. ₂Wet Joás is alhoho m'ak tä iwoye wet Lhawuk käjejlhi, tsi häpe p'ante sacerdote Joyada tä ichufwen. ₃Mat hich'anlhaye t'at tä tek õ'wasthiche õn'okhayajw'etes tä i'pe chenhas. Wichi ilehiyejt'a tä ihoye lhipeytso yämlek iwunej incienso wet ilän tshätäy tä yen n'okhayajayej dios lhayis tä w'enha lhamej.

₄Wet iche ifwala tä Joás tahuyej sacerdotes tä yok:

–Hutwek ilhokej kolhki tä wichi ichäje Lhawuk Lew'et tä lhamel yen t'amajchetayej Lhawuk. Wok oyok, kolhki tä õne'tek elh weihalhapej tiskanej letape, lhäy'e kolhki tä wichi yen Lhawuk lew'ayhata tä lhamel lehusek iwoye täjtso. ₅Alhaye lewos tä itetshan kolhki yämlek lhenaylhi Lhawuk Lew'et lhipey tä wasiche.

₆Mat tä ichäte veintitrés nekchämis tä rey Joás ihi leniyatyaj, wet kamaj sacerdotes nenalhi Lhawuk Lew'et lhipey tä wasiche. ₇Wet rey Joás t'äne sacerdote Joyada lhäy'e sacerdotes iyhäj, wet y'ätshane lhamel tä yok:

–¿Wet chäte tä amel ka'enalhi Lhawuk Lew'et? Tälhe athana yej häp lechumaye kolhki tä tälhe lewos, mat w'enho lhamel tä yenlalhi Lhawuk Lew'et lhipey tä wasiche.

₈Wet sacerdotes lhamel iwoye p'ante tä nem ichumlä kolhki tä tälhe wichi, wet häte lhamel nem itetshan Lhawuk Lew'et tä õyenlhi. ₉Wet sacerdote Joyada ichuma kolhki lehi, wet itoyen lep'ot, wet itihi lhip tä lefwomkat tä tumejlä altar, ihi lhip tä elhpej tiyäjchufwi Lhawuk Lew'et. Wet sacerdotes tä t'uye lepe, lhamel ithatho ilhokej kolhki tä wichi ichäje Lhawuk Lew'et. ₁₀Wet tä lhamel hiw'en tä wuj kolhki tä ihi lehi, wet nämpej rey lesaynekwo lhäy'e Sacerdote tä Lhamya tä lhamel iwo t'ufwahtesa kolhki wet ithathomche lelhunthis. ₁₁Wet tä wak'alhchä, wet lhamel yachaje iyhäj tä itetshan õchumyaj tä ihi Lhawuk Lew'et yämlek lhamel tische hin'ol tä yen lechumyaja hal'äy, lhäy'e chumhas iyhäj, ₁₂lhäy'e lhamel tä yenlhi õwukwey, lhäy'e iyhäj tä yen chumyaja tuntey. Häte ilhokej lhamel isej kolhkitso tä ichäj hal'äy lhipey lhäy'e tuntey tä chenaj lhipey, wet tiskanejpe m'ayhay iyhäj yämlek yenlhi Lhawuk Lew'et lhipey tä wasiche.

₁₃Mat kolhkitso tä õ'chäje Lhawuk Lew'et, tek õ'chumyenlhi tä õyene lhäthis tä plata, wok lhäthis tä wus, wok õfwolis trompetas, wok lecha tä õyistejpej õchäk lhäk tä y'o, wok lehis iyhäj tä oro lhäy'e plata. ₁₄Mat kolhkitso õyachaje hin'ol tä itetshan õchumet yämlek lhamel yenlhi Lhawuk Lew'et. ₁₅Wet tek õ'tetshan hin'oltso tä õyachaje kolhki yämlek tische chumhas, tsi is alhoho m'ak tä lhamel iwoye.

₁₆Wet häp kolhki tä wichi hiw'enho Lhawuk yämlek itäyhat letes, lhäy'e häp kolhki tä wichi yen lew'ayhata yämlek tiskanejpe lesukyajay, häp tä õknihänaye Lhawuk Lew'et, tsi häpe sacerdotes tä lakaha.

₁₇Wet lewhäytso tä Hazael tä Aram laka rey itayhlä p'ante hupuy tä Gat wet ikatej. Tä ileyej, wet ihoye Jerusalén yämlek itayhlä. ₁₈Mat Joás tä Judá laka rey ichumahen ilhokej õw'ayhtes tä lajcha rey Ocozías lhäy'e lechätilis rey Josafat lhäy'e rey Joram pajche p'ante yen t'amajchetesayej Lhawuk. Wet ithatlä m'ayhay tä lham t'at tä yen t'amajchetesayej Lhawuk, lhäy'e ilhokej oro lhäy'e m'ayhay tä laha ihi tä ichufwi Lhawuk Lew'et lhäy'e lham lew'et. Wet ilhokej tä ithate Hazael, wet Hazael ileyej tä iwatläk itayhlä Jerusalén.

₁₉Wet mälhyejtso m'ak tä Joás iwoye p'ante. Wet m'ayhay iyhäj tä iwoye ihi t'at õlesaynekhi tä lhey “Reyes tä ihi Judá.” ₂₀Wet laka sip'älis p'ante tä itayhlä Joás, wet ilän tä ihi Bet-milo tä iche n'äyij tä itaye Sila. ₂₁Lhamel tä ilän häpehen Josacar tä Simat lhäs lhäy'e Jozabad tä Somer lhäs tä Joás tä laka sip'älis. Wet tä õjänch'oye, õ'tiyej letetsel tseyhay tä ihi David laka Hupuy. Wet lhäs tä lhey Amasías häp tä icheyäjo lajcha leniyatyajw'et.