Azarías niyatej Judá
1Ihi p'ante veintisiete nekchämis tä Jeroboam niyatej Israel, wet Azarías tä Amasías lhäs nech'e iwo tesa tä lhayen niyata tä ihi Judá. 2Hiw'en p'ante dieciséis nekchämis tä iwo tesa leniyatyaj, wet cincuenta y dos nekchämis tä ihi Jerusalén tä iwoye niyat lechumet. Wet lako atsinha tä lhey Jecolías tä lew'et p'ante Jerusalén. 3Wet Azarías is alhoho m'ak tä iwoye, mälhyej tä lajcha Amasías iwoye, wet Lhawuk käjejlhi. 4Mat hich'anlhaye t'at tä tek õ'wasthiche õn'okhayajw'etes tä i'pe chenhas. Wichi ilehiyejt'a tä ihoye lhipeytso yämlek iwunej incienso wet ilän tshätäy tä yen n'okhayajayej dios lhayis tä w'enha lhamej.
5Wet Lhawuk ithatej t'inhayaj rey wet amostas tä ilän yäk ichäte ifwala tä y'il. Wet häp tä lhaitontehlä wichi, ts'ilak t'at tä ihi lew'et. Wet lhäs Jotam tä lhaitumtej lechumet tä ihi niyat lewukwe, lhäy'e tä niyatej ilhokej honhat tä Judá.
6Wet m'ayhay iyhäj tä Azarías iwoye ihi t'at õlesaynekhi tä lhey “Reyes tä ihi Judá.” 7Wet y'il p'ante tä nech'e ihoye lechätilis, wet tä õjänch'oye, õ'tiyej lhamel letseyhay tä ihi David laka Hupuy. Wet lhäs Jotam häp tä icheyäjo lajcha leniyatyajw'et.
Zacarías niyatej Israel
8Ihi treinta y ocho nekchämis tä Azarías niyatej Judá, wet Zacarías tä Jeroboam lhäs nech'e iwo tesa tä lhayen niyata tä ihi Israel. Wet seis iwel'as tä ihi Samaria tä iwoye niyat lechumet. 9Mat isit'a m'ak tä iwoye wet Lhawuk y'ulhanej. Tsi iten lechätilis lakeyis, ilehiyejt'a Jeroboam lesukyaj tä Nabat lhäs, häp hin'o p'ante tumenej Israel lhayis iwo lesukyaja.
10Wet Salum tä Jabés lhäs lhaikhajyen wet itayhlä, wet ilän tä ihi tä wichi itayche, wet Salum tä icheyäjo leniyatyajw'et.
11Wet m'ayhay iyhäj tä Zacarías iwoye ihi t'at õlesaynekhi tä lhey “Reyes tä ihi Israel.” 12Wet häp tä lhayäm matche Lhawuk lhämet tä ifwenho p'ante Jehú tä yok:
–Ales ihihla õniyatyaj tä ihi Israel yämlek ichäte cuatro ales tä lepes lheley.
Salum niyatej Israel
13Ihi treinta y nueve nekchämis tä Uzías niyatej Judá, wet Salum tä Jabés lhäs nech'e iwo tesa tä lhayen niyata tä ihi Israel. Mat iwel'a weihalhafwaj p'ante tä ihi leniyatyaj tä ihi hupuy tä Samaria. 14Wet näm p'ante Menahem tä Gadi lhäs tä tälho Tirsa. Tä ichätho Samaria, wet itayhlä Salum wet ilän, wet icheyäjo leniyatyajw'et.
15Wet m'ayhay iyhäj tä Salum iwoye, lhäy'e tä itayhlä Zacarías, ihi t'at õlesaynekhi tä lhey “Reyes tä ihi Israel.”
16Wet Menahem itayhlä hupuy tä lhey N'olhijtshanw'et, wet itäyhthen ilhokej m'ayhay tä ihi, ithatlä lhipey tä iwhäye, wet itälhte hupuy tä Tirsa tä itäyhthen m'ayhay yäk nofwej. Iwoynejetso m'ak tä iwoye häp tä N'olhijtshanw'et lheley nifwoyenachehen hupuy lepelis, lhamel iwohit'a len'äyija Menahem. Wet y'ajte atsinhay tä ch'otshanhen tä lham isajomche lets'el.
Menahem niyatej Israel
17Ihi treinta y nueve nekchämis tä Azarías niyatej Judá, wet Menahem tä Gadi lhäs nech'e iwo tesa tä lhayen niyata tä ihi Israel. Wet diez nekchämis tä ihi Samaria tä iwoye niyat lechumet. 18Ilhokej ifwalas tä ihi leniyatyaj, iwoye m'ak tä ni'isa wet Lhawuk y'ulhanej lakeyistso. Tsi ilehiyejt'a Jeroboam lesukyaj tä Nabat lhäs, häp hin'o p'ante tumenej Israel lhayis iwo lesukyaja.
19Wet näm p'ante Pul tä Asiria laka rey wet itayhlä Israel. Wet Menahem hiw'enho treinta y tres mil (33.000) kilos plata yämlek ileyej tä itayhlä wet hich'ote wet ikhajyen tä ihi leniyatyaj. 20M'ak tä Menahem iwoye, t'alhchehen iyhäj tä hiw'en m'ayek tä ihi Israel chik elh weihalhapej hiw'enho cincuenta kolhki yämlek yachaje Asiria laka rey. Wet häp tä Asiria laka rey yikch'oye Israel wet yäple laka honhat.
21Wet mälhyejtso m'ak tä Menahem iwoye p'ante. Wet m'ayhay iyhäj tä iwoye ihi t'at õlesaynekhi tä lhey “Reyes tä ihi Israel.” 22Wet y'il p'ante tä nech'e ihoye lechätilis, wet lhäs Pekahías häp tä icheyäjo lajcha leniyatyajw'et.
Pekahías niyatej Israel
23Ihi p'ante cincuenta nekchämis tä Azarías niyatej Judá, wet Menahem lhäs Pekahías nech'e iwo tesa tä lhayen niyata tä ihi Israel. Wet täkwfwas nekchämis tä ihi Samaria tä iwoye niyat lechumet. 24Mat isit'a m'ak tä iwoye wet Lhawuk y'ulhanej lakeyistso. Tsi ilehiyejt'a rey Jeroboam lesukyaj tä Nabat lhäs, häp hin'o p'ante tumenej Israel lhayis iwo lesukyaja.
25Wet laka sip'älis kaniyat tä lhey Peka tä Remalías lhäs, häp tä lhaikhajyen wet itayhlä Pekahías, lhäy'e cincuenta hin'ol tä Galaad lheley tä lhamel hich'ote tä ilän tä ihi hupch'o tä tach'opway tä ihi rey lew'et tä ihi Samaria. Wet lham tä icheyäjo leniyatyajw'et.
26Wet m'ayhay iyhäj tä Pekahías iwoye ihi t'at õlesaynekhi tä lhey “Reyes tä ihi Israel.”
Peka niyatej Israel
27Ihi p'ante cincuenta y dos nekchämis tä Azarías niyatej Judá, wet Remalías lhäs Peka nech'e iwo tesa tä lhayen niyata tä ihi Israel. Wet veinte nekchämis tä ihi Samaria tä iwoye niyat lechumet. 28Mat isit'a m'ak tä iwoye wet Lhawuk y'ulhanej lakeyistso. Tsi ilehiyejt'a rey Jeroboam lesukyaj tä Nabat lhäs, häp hin'o p'ante tumenej Israel lhayis iwo lesukyaja.
29Wet ihi lewhäytso tä Peka häpe Israel laka rey, wet näm Tiglat-pileser tä Asiria laka rey. Wet ikalhi hupuy tä lhey Ijón, lhäy'e N'och'atkanyajw'et, lhäy'e N'otamsek, lhäy'e Kedes, lhäy'e Hasor, lhäy'e honhates tä Galaad lhäy'e Galilea, lhäy'e ilhokej honhat tä lewuk wichi tä tälhe letes p'ante Neftalí. Wet ichuma wichi tä ihi wet yen kwenkaya, wet ichäje Asiria. 30Wet tä tiyäme veinte nekchämis tä Jotam tä Uzías lhäs niyatej Judá, wet hin'o tä lhey Oseas tä Ela lhäs itayhlä p'ante Peka wet ilän. Wet mälhyejtso tä lham tä icheyäjo leniyatyajw'et tä ihi Israel.
31Wet m'ayhay iyhäj tä Peka iwoye ihi t'at õlesaynekhi tä lhey “Reyes tä ihi Israel.”
Jotam niyatej Judá
32Ihi p'ante täkwfwas nekchämis tä Peka niyatej Israel, wet Uzías lhäs Jotam nech'e lhayen niyata tä ihi Judá. 33Hiw'en veinticinco nekchämis tä iwo tesa leniyatyaj, wet dieciséis nekchämis tä ihi Jerusalén tä iwoye niyat lechumet. Wet lako häpe atsinha tä lhey Jerusa tä Sadoc lhäse.
34Wet Jotam is m'ak tä iwoye, mälhyej tä lajcha Uzías iwoye, wet Lhawuk käjejlhi. 35Wet Jotam yenlhi lepe tä tumej tafwojhiye tä ihi Lhawuk Lew'et. Mat tek õ'wasthiche õn'okhayajw'etes tä i'pe chenhas, wet wichi ilehiyejt'a tä ihoye lhipeytso yämlek iwunej incienso wet ilän tshätäy tä yen n'okhayajayej dios lhayis tä w'enha lhamej.
36Wet m'ayhay iyhäj tä Jotam iwoye ihi t'at õlesaynekhi tä lhey “Reyes tä ihi Judá.”
37Wet ifwalastso tä Lhawuk iwo tesa tä itayhtejlä Judá häp Resín tä Aram laka rey lhäy'e Peka tä Remalías lhäs tä Israel laka rey. 38Wet Jotam y'il wet ihoye lechätilis, wet tä õjänch'oye, õ'tiyej lhamel letseyhay tä ihi lechäti David laka Hupuy. Wet lhäs tä lhey Acaz häp tä icheyäjo lajcha leniyatyajw'et.
