Ezequías t'inhayaj ihi mat Dios ichesat
1Häp ifwalastso t'inhayaj ihi rey Ezequías, imä katsi, tott'ayek y'inhila. Wet profeta Isaías tä Amoz lhäs ihoye wet tahuyej tä yok:
–Häp Lhawuk lhämet yok, “Kanchä haw'et lhäy'e m'ayhay tä ihi. Tsi ley'inhila, tek lecheslame.”
2Wet Ezequías itilhkathi lete'pe, itayhte hup lhip tä iwo let'alhyaja wet yok:
3–Iwuk, olhaip'altsen ame chik ahuseklä m'ak tä owoyepej. Ts'ilak am tä on'okwi amej wet owoyepej m'ak tä am lehuminche.
Wet Ezequías wuj tä tafwlhi.
4Wet tä kamaj Isaías nekach'oye niyat lew'et lhip tä i'alhoye, häp Lhawuk tahuyej tä yok:
5–Äple oka wichi kaniyat Ezequías, fwenhola tä lhok, “Häp Lhawuk tä achäti David laka Dios yok, Olätene hat'alhyaj tä lewoye, lhäy'e afwyhayaj. Wet ochesthila amej hat'inhayaj wet lecheslame. Wet chik ichäte tres ifwalas, nech'e iwohiyela chik lehoye Ow'et wet len'okwi n'oyej. 6Wet ow'enla amho quince aka nekchämis, oy'ayhthilatshi haw'atshancheyaj. Wet am lhäy'e hupuyna tä Jerusalén ofwayhthiyeja Asiria laka rey. Wet olham ot'uhiyela Jerusalén, häp m'ak tä olham owoye lhäy'e ohumnhayaj tä otiyej okawo David.”
7Wet Isaías ifwenho niyat lakawos tä yok:
–Chuma higos wet chofwaji. Pen wet ti'pe lhip tä t'inhayaj ihi.
Wet lhamel iwoye, iti'pe lhip tä t'inhayaj ihi, wet iches niyat. 8Wet Ezequías y'ätshane Isaías tä yok:
–¿Atsi letetnek tä Lhawuk ipäynhila n'oye yämlek ohanej tä ichesthilan'o wet chik ichäte tres ifwalas nech'e iwohiyela chik ohoye Lew'et wet on'okwiyej?
9Wet Isaías ichulho Ezequías tä yok:
–Häpe täjna Lhawuk letetnek tä ipäynhila ame yämlek lehanej tä yämla matche lhämetne ofwen amho. ¿Hät iwoye chik õt'äsawet lehupel ichun wok lhayachajen?
10Ezequías yok:
–Athahit'a chik lehupel ichun. Mat atha chik lhayachajen.
11Wet profeta Isaías iwo let'alhyaja, t'änch'oye Lhawuk. Wet Lhawuk iwoye, wet õt'äsawet tä rey Acaz lhenek p'ante lehupel lhayachajen.
Rey Ezequías ichumlä Babilonia laka rey lakachenhay
12Häpe p'ante lewhäytso tä rey tä lhey Merodac-baladán tä Baladán lhäs tä Babilonia laka rey, lham ihanej tä Ezequías t'inhayaj ihi, imä katsi. Wet häp tä ichene lesilätwos, lhäy'e laka cartas, lhäy'e lew'ayhat. 13Wet Ezequías käjejlhi tä hiw'en lhamel. Wet ipäyne ilhokej m'ak tä hiw'en tä laha ihi, plata lhäy'e oro, lhäy'e lakacha tä lenij akäjche, lhäy'e aceite tä laha ihi, lhäy'e lakwelheley, lhäy'e ilhokej m'ak tä lakäywet. Tek wo m'ak chik nipäynaye. Ilhokej m'ak tä ipäyne, lhäy'e m'ak tä hiw'en tä ihi leniyatyajw'et lhäy'e tä ihi ilhokej laka honhat.
14Wet profeta Isaías ihoye rey Ezequías wet y'ätshane p'ante tä yok:
–¿Atsi honhat tä tälhe hin'ol tä iho ame, wet atsi m'ak tä lhamel ifwen amho?
Wet Ezequías ichulho tä yok:
–Lhamel tälhe Babilonia, honhat tä tofwe.
15Wet Isaías y'ätshane tä yok:
–¿Atsi m'ak tä lepäyne lhamel tä ihi aniyatyajw'et?
Wet Ezequías ichulho tä yok:
–Opäyne lhamel ilhokej m'ayhay tä ichufwi ow'et. Niwohit m'ak chik lhamel niw'ena. Ilhokej m'ak tä ot'amajej tä lhamel hiw'en.
16Wet Isaías tahuyej Ezequías tä yok:
–Lhek ch'ahuye Lhawuk lhämet tä yok, 17“Ihichela ifwala tä õ'chäjiyela Babilonia ilhokej m'ayhay tä lew'en tä ihi aniyatyajw'et, lhäy'e ilhokej m'ayhay tä achätilis t'amajej yäk ifwalasna. Wet tek wohla m'ak chik imälhe kana. 18Wet elhpej amel ales tä hin'ol tä tälh ame, õ'hänhiyela Babilonia wet õ'lanhihichela lechänsilis, wet Babilonia laka niyat yenla lakawosa.”
19Wet Ezequías ichulho Isaías tä yok:
–Häp Lhawuk lhämet tä lechäj n'oye is alhoho. Chik kamaj oläy, elak letamsek ihi honhat wet naj lewit'äya.
Y'il p'ante rey Ezequías
20Häp m'ayhay iyhäj tä Ezequías iwoye, lhäy'e tä lhaikhajyen, lhäy'e tä yenlhi p'ante wajhi tä wuj, lhäy'e tä yenlhi waj n'äyij tä inekhatchufwi honhat yämlek tiyäjo Jerusalén, wet tähesna ihi t'at õlesaynekhi tä lhey “Reyes tä ihi Judá.” 21Wet y'il tä nech'e ihoye lechätilis, wet lhäs tä lhey Manasés häp tä icheyäjo lajcha leniyatyajw'et.
