2~Rey 21

₁Manasés hiw'en p'ante doce nekchämis tä iwo tesa tä lhayen niyata, wet cincuenta y cinco nekchämis tä ihi Jerusalén tä iwoye niyat lechumet. Wet lako atsinha tä lhey Hepsiba. ₂Mat Manasés isit'a m'ak tä iwoye wet Lhawuk y'ulhanej. Tsi iten lakeyis tä lhäy'e lhip tä ni'isachehen tä wichi tä w'enha lhamej iwoye, häp lhamel tä Lhawuk pajche yokoschephä p'ante tä ihi honhat tä Israel lhayis nekche. ₃Häp Manasés yachajo tä yenlhi õn'okhayajw'etes tä ihiche chenhas tä lajcha Ezequías iwasthiche p'ante. Wet ineyhatphä Ba'al laka altares wet yenlhi dios tsinha tä lhey Asera lepeyak, mälhyej iwoye Israel laka rey p'ante tä lhey Acab. Häte Manasés n'okwiyej katetsel lhäy'e ilhokej m'ayhay tä ihi pule. ₄Wet yenlhi altares tä ihi Lhawuk Lew'et, häp hup tä Lhawuk yop'antekwe, “Oyenla Ow'eta.” ₅Häte yenlhi altares tä itihi täkwfwas lhipey tä i'alhotaje tä ihi Lhawuk Lew'et, yämlek n'okwiyej katetsel lhäy'e ilhokej m'ayhay tä ihi pule. ₆Wet iwunho lhäs tä yen lew'ayhata dios tä w'enha lhamej, wet lhayen n'ältshantsaja, wet fwitaj ihanej m'ak tä ihichela. Wet iwo lew'eta iyhäj tä inämthen husey wet y'ätshane tseyhay, wet iwoye m'ak tä inu'pe tä ni'isa tä iwäkwyhaynej Lhawuk. ₇Häte itihi Asera lepeyak Lhawuk Lew'et tä pajche Lhawuk ifwenho p'ante David lhäy'e lhäs Salomón tä yok:

–Ow'etna tä ihi Jerusalén otihi olhey yämlek tiyäj'attsiy. Tsi olham tä otshupyene tä ihi ilhokej honhat tä Israel lhayis ihi. ₈Wet chik Israel lhayis iwoye ilhokej olhämtes tä one'tek lhamel iwoye, wet t'amajej ilhokej ochufwenyaj tä okawo Moisés hiw'enhomchehte lhamel, chik mälhyejtso, wet olham tek osohiyeja lhamel honhatna tä ow'enhohte lechätilis.

₉Mat lhamel iwohiyet'a, wet Manasés tä tumenej tä lhamel iwoye m'ak tä lhäy'e lhip tä ni'isa, inu'pe wichi iyhäj tä pajche Lhawuk itäyhat p'ante tä ihi honhat tä Israel lhayis nekche. ₁₀Wet häp tä Lhawuk ifwenho lhämet lakawos profetas tä ne'tek lhamel iwo siläta wichi tä yok:

₁₁–Häp m'ak tä Judá laka rey Manasés iwoye matche tä ni'isa, inu'pe ilhokej Amorreo lhayis tä ichunch'oye p'ante lham, wet tumenej Judá tä lhaisukyenej lecheyälis. ₁₂Tä mälhyejtso, olham tä ohäpe Israel Lewuk Dios olhämet yok, “Othatla'pe wuj lewit'äy Jerusalén lhäy'e Judá. Wet elh chik häpe tä iläte, ilätla m'ak tä lech'otey iläte. ₁₃Otihiyejame otasnhayaj Jerusalén, ow'awlhathiyejame Samaria. Otech'aynhiyejame rey Acab lhäy'e laka wichi tä owit'äyente. Wet olejiphälame Jerusalén, otech'aynhiyejame õlhäkhi tä õ'lejomche wet õ'tilhkatchä. ₁₄Wet owomla oka wichi lhip tä imälhehi, wet oyachajiyelame letayhfwas yämlek yen kwenkaya lhamel, wet isohiyeja ilhokej m'ayhay tä lhamel hiw'en.” ₁₅Tsi ow'en m'ak tä ni'isa tä lhamel iwoye, tälhe lewhäy tä lhamel lechätilis inukwephä tä tälho Egipto yäk ifwalasna tä lhamel iwäkwyhayenn'o.

₁₆Wet elh m'ak tä lhäy'e lhip tä ni'isa tä Manasés iwoye, tä ilänhen wujpe wichi tä lhamel najit letesa yäk lew'oysilis poyej Jerusalén. Mälhyejtso m'ak tä Manasés iwoye, lhäy'e lesukyaj tä tumenej Judá lheley iwoye m'ak tä ni'isa wet Lhawuk y'ulhanej lakeyis. ₁₇Wet m'ayhay iyhäj tä Manasés iwoye, lhäy'e tä iwopej lesukyaja, ihi t'at õlesaynekhi tä lhey “Reyes tä ihi Judá.” ₁₈Wet y'il p'ante tä nech'e ihoye lechätilis, wet tä õjänch'oye, õ'tihi lelafwek lhip tä ihi lew'et, ihi Uza lelafwek. Wet lhäs tä lhey Amón häp tä icheyäjo lajcha leniyatyajw'et.

₁₉Amón hiw'en p'ante veintidós nekchämis tä iwo tesa tä lhayen niyata, wet täkwfwas nekchämis tä ihi Jerusalén tä iwoye niyat lechumet. Wet lako atsinha tä lhey Mesulemet, häp Harús tä lhäse, tälhe Jotba. ₂₀Mat Amón isit'a m'ak tä iwoye, hätet iwoye lajcha Manasés, wet Lhawuk y'ulhanej lakeyistso. ₂₁Amón ihän t'at lajcha len'äyij tä ni'isa, lhäy'e tä n'okwiyej lecheyälis, wet häpe t'at lecheyälis tä lajcha n'okwiyejpej. ₂₂Mälhyej p'antetso tä ileyej häp Lhawuk tä letetsel laka Dios, wet iwohiyet'a m'ak tä Lhawuk lenech'ethayaj.

₂₃Wet Amón leniyatfwas lhaikhajyenhen wet itayhlä lham, wet lhamel ilän tä ihi lew'et. ₂₄Mat wichi tä ihi honhat ilänhen anikoyistso, wet lhamel yen laka niyata lhäs tä lhey Josías tä icheyäjo lajcha leniyatyajw'et.

₂₅Wet m'ayhay iyhäj tä Amón iwoye ihi t'at õlesaynekhi tä lhey “Reyes tä ihi Judá.” ₂₆Wet tä õjänch'oye, õ'tihi letseyekw'et tä ihi Uza lelafwek. Wet lhäs tä lhey Josías häp tä icheyäjo lajcha leniyatyajw'et.