2~Rey 22

₁Josías hiw'en p'ante ocho nekchämis tä iwo tesa tä lhayen niyata tä ihi Judá, wet treinta y un nekchämis tä ihi Jerusalén tä iwoye niyat lechumet. Wet lako atsinha tä lhey Jedida, Adaías tä lhäse, tä lew'et Boskat. ₂Wet Josías is alhoho m'ak tä iwoye wet Lhawuk käjejlhi. Wet ihän t'at m'ak tä lechäti David iwoye wet nemhit ileyej.

₃Ihi p'ante dieciocho nekchämis tä rey Josías ihi leniyatyaj, wet ichene Lhawuk Lew'et häp lelesaynekwo tä lhey Safán tä Asalías lhäs wet Mesulam tä lecheyäs. Wet tahuyej tä yok:

₄–Mäh hoye Hilcías, häp Sacerdote tä Lhamya, wet fwenho chik ihutwek kolhki tä ihi Lhawuk Lew'et tä lepewos ichumlä tä tälhe wichi. ₅Is chik yachaje hin'ol tä itetshan õchumyaj tä ihi Lhawuk Lew'et yämlek tische chumhas, ₆wok oyok, iyhäj tä yen lechumyaja hal'äy, lhäy'e iyhäj tä yenthä õwukwey. Häte is chik ichäj hal'äy lhäy'e tuntey tä õyenejlhi Lhawuk Lew'et. ₇Wet yej tetshan hin'oltso tä õyachaje kolhki yämlek tische chumhas, tsi is alhoho m'ak tä lhamel iwoye.

₈Wet Safán iwoye rey lhämet, ihoye t'at Lhawuk Lew'et. Wet tä kamaj ihi, häp Hilcías tä Sacerdote tä Lhamya ifwenho tä yok:

–Olhoke õlesaynekhi tä Ley p'ante tälhe Moisés ihi tä ichufwi Lhawuk Lew'et.

Wet Hilcías hiw'enho Safán Ley lehi wet Safán iyahyen. ₉Tä ileyej, yäple rey wet iwo siläta tä yok:

–Iwuk, häp akawos ichuma ilhokej kolhki tä ihi Lhawuk Lew'et, wet lhamel yachaje iyhäj tä itetshan õchumyaj.

₁₀Hätej Safán yok:

–Sacerdote Hilcías hiw'en n'oho õlesaynekhi.

Wet Safán iyahyenho rey.

₁₁Tä rey iläte m'ak tä Lhawuk lhämet yäme tä ihi lehi, wet hich'esajche lew'uy tä yen tetneka tä wuj tä lelhakli ihi. ₁₂Wet ichene sacerdote Hilcías, lhäy'e Ahicam tä Safán lhäs, lhäy'e Acbor tä Micaías lhäs, lhäy'e Safán tä õlesaynekwo, lhäy'e Asaías tä rey lech'otfwa. Wet rey ifwenho lhamel tä yok:

₁₃–Mäh ätshane Lhawuk m'ak tä olham omälhnhiyeja, lhäy'e wichi, lhäy'e ilhokej Judá. Ätshaneje lhämtes tä õ'lhokpe tä ihi õlesaynekhina. Tsi Lhawuk wuj lewäk tä iti n'amejen, häp tä lhachätilis nit'amajayej p'ante lhämtes tä ihi lehina wet niwoyaye m'ak tä Lhawuk ne'tek õ'woye.

₁₄Wet sacerdote Hilcías, lhäy'e Ahicam, Acbor, Safán, lhäy'e Asaías, tä lhamel ihoye atsinha tä profeta tä lhey Hulda, atsinha tä Salum tä lech'efwa. Salum häpe Ticva lhäs wet Harhás tä lecheyäs, wet häpe elh tä t'uye õkhäy tä ichufwi Lhawuk Lew'et. Wet atsinhatso tä lhey Hulda lew'et ihi p'ante Jerusalén lhip tä nech'ayek. Wet tä hin'oltso tä rey kachenhay ichäte, wet lhamel ifwenho atsinha häp rey letichunhayaj. ₁₅Wet atsinha ichulho lhamel tä yok:

–Lhawuk tä Israel laka Dios lhämet yok, “Fwenho häp hin'o tä alechenhay tä leho n'oye ₁₆tä olham tä ohäpe Awuk Dios oyok, Ochenla'pe lewit'äy hupuyna lhäy'e wichi tä ihi, mälhyej tä olhämtes yäme tä ihi lehi tä Judá laka rey iyahyenne. ₁₇Tsi lhamel iwomn'o wet iwunej incienso tä lhamel yen n'okhayajayej dios lhayis iyhäj. Wet lhamel iwäkwyhayen n'oyej ilhokej m'ak tä ni'isa tä iwoye. Häp tä tumenej tä naj lepesa owäk tä otiyej lhamel lhäy'e hupuyna.”

₁₈Wet atsinha äp yok:

–Wet häp Judá laka rey tä ichen amehen Lhawuk tä ne'tek lech'ahuyaye, fwenho lham häp Lhawuk tä Israel laka Dios lhämet tä yok, “Am lech'ahuye m'ak tä ihi lehi tä leläte tä õyahyenne, ₁₉wet lewo ahusek elha wet aley'ayhatchä tä ihi tä olham otayche. Wet leläte m'ak tä oyäme tä otayhte lewit'äy hupuyna lhäy'e wichi tä ihi. Tsi oyok, Ochätyenla'pe hupuyna okäpfwayaj tä ni'isa yämlek ts'anis t'at. Wet tä wuj tä alhakli ihi, lech'esajchehen akhäy wet letafwlhi. Tä mälhyejtso, ofwen amho tä häte olham olät ame wet och'ahu ame. ₂₀Wet atamsek ihihla chik ley'inla wet lehohiyela achätilis, wet atey tek hiw'enla'pe m'ak tä ni'isa tä ochätyenla'pe hupuyna.”

Wet rey silätwos yikhen tä iwo siläta rey.