2~Rey 24

₁Häpe lewhäy tä Joaquim ihi leniyatyaj tä Babilonia laka rey tä lhey Nabucodonosor tä tiyäjo honhat tä Judá, lhäy'e laka nifwotas. Wet tres nekchämis tä Nabucodonosor lhayen lewuka Joaquim. Mat tä paj Joaquim nech'e lhaikhajyen tä itayhlä Babilonia laka rey. ₂Mat Lhawuk ichene Joaquim itayes tä Babilonio lhayis, lhäy'e tä Aram lhayis, lhäy'e tä Moab lhayis, lhäy'e tä Amón lhayis. Lhawuk ichene Judá lhamel yämlek iwasthi, mälhyej lhämet tä ifwenho p'ante laka profetas tä ne'tek lhamel iwo siläta wichi. ₃Mälhyejtso p'ante m'ak tä Lhawuk iwoyeje Judá yämlek itiyej kanhi wichi, häp rey Manasés lesukyaj p'ante tä tumenej, lhäy'e ilhokej m'ak tä ni'isa tä iwoye, ₄lhäy'e tä ilänhen wichi tä naj letesa tä ihi Jerusalén yäk lew'oysilis poyej hupuy. Häp tä tumenej tä Lhawuk nemhit itäyhtej letes.

₅Wet m'ayhay iyhäj tä Joaquim iwoye ihi t'at õlesaynekhi tä lhey “Reyes tä ihi Judá.” ₆Wet y'il tä nech'e ihoye p'ante letetsel, wet lhäs tä lhey Joaquín häp tä icheyäjo lajcha leniyatyajw'et.

₇Wet tälhe lewhäytso tä Egipto laka rey lhäy'e laka nifwotas nemhit yikch'oye laka honhat. Tsi Babilonia laka rey lhayen lewuka ilhokej honhat tä Egipto laka rey kahonhat, tälhe tewok lhäsaj tä tumejlä Egipto yäk ichäte tewokitaj tä lhey Éufrates.

₈Joaquín hiw'en p'ante dieciocho nekchämis tä iwo tesa tä lhayen niyata, wet tres iwel'as tä ihi Jerusalén tä iwoye niyat lechumet. Wet lako atsinha tä lhey Nehusta, häp Elnatán tä lhäse tä lew'et Jerusalén. ₉Mat Joaquín isit'a m'ak tä iwoye, hätet iwoye lajcha, wet Lhawuk y'ulhanej lakeyistso.

₁₀Häpe lewhäytso tä Babilonia laka rey Nabucodonosor kasip'älis ihoye Jerusalén yämlek itayhlä, wet lhamel ilunej hupuy. ₁₁Wet Nabucodonosor lham t'at tä näm, ₁₂wet Judá laka rey Joaquín, lhäy'e lako, lhäy'e leniyatfwas, lhäy'e lech'otfwas, lhäy'e hin'ol tä lakawos, tä lhamel lhayachaje Nabucodonosor wet hip'ohiche. Häpe lewhäytso tä ocho nekchämis tä Nabucodonosor ihi leniyatyaj.

₁₃Wet ichumahen wet ichäjen ilhokej m'ayhay tä laha ihi tä ichufwi Lhawuk Lew'et, lhäy'e m'ayhay tä laha ihi tä ichufwi rey lew'et. Wet y'ajomche ilhokej m'ayhay tä oro tä Israel laka rey p'ante Salomón ne'tek õyenlhi tä itichufwi Lhawuk Lew'et. Häp täjtso m'ak tä Nabucodonosor iwoye, mälhyej tä pajche tä Lhawuk yen lhämeta. ₁₄Häte ichäjen ilhokej wichi tä ihi Jerusalén tä yen kwenkaya, lhäy'e niyatey, lhäy'e sip'älis tä khajayhen, lhäy'e wichi tä ihanej tä yenlhi m'ayhay, lhäy'e chinhaswos, yäk ichäte diez mil wichi tä yen kwenkaya. Tek wo elh chik imälhehi laka honhat, ts'ilak wichi tä wuj tä p'elitses.

₁₅Wet rey Nabucodonosor häte ichäj Joaquín lhäy'e lako, lhäy'e lech'efwas, lhäy'e leniyatfwas, lhäy'e hin'ol tä lhamenya tä ihi laka honhat. Ihäne Babilonia tä yen kwenkaya. Ilhokej lhameltso tä Nabucodonosor itälhte Jerusalén tä ihäne Babilonia. ₁₆Wet ilhokej hin'ol tä lhamenya tä õyen kwenkaya, ihi p'ante siete mil, lhäy'e mil chinhaswos lhäy'e hin'ol tä ihanej tä yenlhi m'ayhay, häte sip'älis tä khajayhen. Ilhokej lhameltso tä õ'chäje Babilonia. ₁₇Wet Babilonia laka rey yen niyata Matanías tä icheyäjo lewakla Joaquín lew'et. Wet iwo lhey elha tä yen lheya Sedequías.

₁₈Sedequías hiw'en p'ante veintiún nekchämis tä iwo tesa tä lhayen niyata, wet once nekchämis tä ihi Jerusalén tä iwoye niyat lechumet. Wet lako atsinha tä lhey Hamutal, häp Jeremías tä lhäse tä lew'et honhat tä lhey Pelaj. ₁₉Mat Sedequías isit'a m'ak tä iwoye, hätet iwoye Joaquim, wet Lhawuk y'ulhanej lakeyistso. ₂₀Wet Lhawuk wuj tä itiyej lewäk Jerusalén lhäy'e Judá, wet itiyejche kanhi wichi.

Wet tä paj Sedequías nech'e lhaikhajyen p'ante tä itayhlä Babilonia laka rey.