2~Rey 3

₁Joram tä Acab lhäs iwo tesa leniyatyaj tä ihi p'ante Israel laka hupuy tä lhamya tä lhey Samaria, ihi p'ante nekchäm tä dieciocho tä Josafat häpe Judá laka rey. Wet Joram iwoye niyat lechumet doce nekchämis. ₂Wet Lhawuk y'ulhanej m'ak tä ni'isa tä iwoye. Mat tek mälhyej p'ante häp lajcha lhäy'e lako Jezabel, tsi Joram isoyej tunte tä t'amajchet tä lajcha yenhoplhi dios tä kamatache tä lhey Ba'al. ₃Mat tej tä mälhyejtso, Joram ilehiyejt'a rey Jeroboam lesukyaj tä Nabat lhäs, häp hin'o p'ante tumenej Israel lhayis iwo lesukyaja.

₄Wet Moab laka rey tä lhey Mesá yen p'ante chumyaja tä ichihelthen tson'atas. Wet tispej Israel laka rey, yachaje cien mil (100.000) tson'atas les, lhäy'e cien mil tson'atas tä hin'ol, lhäy'e lew'oley. ₅Mat täjp'ante y'il Acab, wet Moab laka rey lhaikhajyen tä itayhlä Israel laka rey Joram. ₆Wet Joram yikch'oye p'ante Samaria wet ihutwek ilhokej Israel kasip'älis. ₇Wet iwo kachenekaye tä iwo siläta Josafat tä Judá laka rey tä yok:

–Moab laka rey itay ohilä. ¿Hä lenek n'okwe tä lewo ot'unfwaya tä owo oka'tshayajayej?

Wet Judá laka rey ichulho tä yok:

–Ey'a, oyikhila amche, owohla hat'unfwaya. Olham lhäy'e oka sip'älis, lhäy'e lew'utey yel'atas, olhamel olhaip'ajtit amej lhäy'e aka nifwotaj.

₈Wet y'ätshane tä yok:

–¿Atsi n'äyij tä y'anukwe?

Wet Joram ichulho tä yok:

–N'atiyäjche n'äyij tä ts'anis tä ihi Edom.

₉Wet mälhyejtso p'ante tä yikhen reyes, Israel laka rey, lhäy'e Judá laka rey, lhäy'e Edom laka rey tä yikhen. Mat mälhyej tä lhamel ilunche honhat tä ts'anis siete ifwalas, wet y'imche laka waj wet sip'älis lhäy'e leläy ichimhen. ₁₀Wet Israel laka rey tä yok:

–¡N'älej tä lhawit'äy ihi! ¡Häpe Lhawuk tä n'aichäj kana tres n'amel tä n'areyes yämlek yachaj n'amehen Moab lhayis!

₁₁Wet Josafat y'ätshanej tä yok:

–¿Hä newache Lhawuk laka profeta tä ikana, yämlek ifwen n'amhohen m'ak tä tälhe Lhawuk?

Wet iche hin'o tä Israel laka rey kawo, wet ichulho tä yok:

–Ikana Eliseo tä Safat lhäs, häpe tä hich'ote p'ante Elías.

₁₂Wet Josafat yok:

–Häpe hin'o tä Lhawuk lhämetej.

Wet Israel laka rey, lhäy'e Josafat, lhäy'e Edom laka rey, tä lhamel ihoye p'ante Eliseo. ₁₃Mat Eliseo tahuyej Israel laka rey tä yok:

–Y'ajit'a n'oye m'ak tä i'amej. Mäh ch'ahuye ajcha laka profetas lhäy'e ako laka profetas.

Mat Israel laka rey ichulho Eliseo tä yok:

–Kha. Tsi Lhawuk tä ichäj n'ohen kana tres olhamel tä ohäpehen reyes, yämlek yachaj n'oyehen Moab lhayis.

₁₄Wet Eliseo yok:

–Ofwen amho olhämet tä matche tä oihi tä Owuk Dios tä naj letumfwaya itayche, oyok, Chik kahäpeya tä otichunche Josafat tä Judá laka rey, olham tek oyahin ahilä wet tek och'ahu ame. ₁₅Mat athana chäj n'oye hin'o tä ihanej tä y'aji arpa.

Wet õ'chäj hin'o, wet tä y'aji arpa, wet Lhawuk lakhajyhayaj iyej Eliseo ₁₆wet Eliseo yok:

–Häp Lhawuk yäme tä yok, “Enaylhi apek, äm wujpe tä ihi honhatna.” ₁₇Tsi mälhyejtso m'ak tä Lhawuk yäme tä newachehla ihwok, häte tek iwomlahchä, mat honhatna waj pokwehila wet ilhokhiyeja amel leyähiyeja, lhäy'e aläy w'asetas, lhäy'e aläy iyhäj. ₁₈Wet täjtso häp m'ak tä niwuja tä Lhawuk iwoye, wet häte lham yachajila amehen Moab lhayis, itihihla amel akweyey. ₁₉Wet amel lewasthihichela ilhokej hupuy tä lefwamhat ihi, lhäy'e hupuy tä isis, wet häte lhisthenla ilhokej hal'äy tä lhay ihi, wet lep'ohihichela ilhokej waj n'äyij, wet lhämla poyej tuntey honhat tä yachuyaj ihi.

₂₀Tä ifwala elh tä nech'e nat, ichäte lewhäy tä sacerdotes tä ihi Jerusalén yen lew'ayhata Dios häp tson'ataj lhäs tä õ'län tä õyen n'okhayajayej, mälhyej tä iwoye ifwalapej ifwalapej. Wet häpe lewhäytso tä sip'älis tä ihi ts'anis lhamel iyahinphä, wet hiw'enlä waj tä tälhche n'äyij tä tälhe Edom, wet yäk poyej honhat.

₂₁Wet Moab lhayis ilätch'oye tä reyes ihoye lhamel yämlek itayhlä. Wet häp tä ihutwek ilhokej hin'ol tä ihanej tä iwo laka'tshayaja, tälhe tä manses lhäy'e tä thänhäy, wet lhamel ihiche laka honhat lhipey tä lepes. ₂₂Wet tä lhamel inechephä tä nech'e nat, wet ifwala lehutunek ihutunpe waj. Wet tä lhamel hiw'ene, wet chäthi waj, hätet iwoye w'oyis. ₂₃Wet lhamel yop'antekwe:

–¡W'oyis täjl'atsi! ¡N'älej tä reyestso lhamel t'at tä itaywek, lhäy'e laka nifwotas, wet lhailänhen yäk nofwej! ¡Mäh Moab lhayis, n'achumahen m'ayhay tä lhamel hin'äyhen!

₂₄Mat tä Moab lhayis ichätho lhip tä Israel lhayis ihi, wet Israel lhayis itayhlä lhamel yäk inukwe alhoho tä yikhen. Wet Israel lhayis ihänthä wet ilänhen lhamel. ₂₅Wet lhamel iwasthiche hupuy, wet ithatho tuntey ilhokej honhat tä yachuyaj ihi, wet lhamel hip'ohiche ilhokej waj n'äyij, wet yisthen ilhokej hal'äy tä lhay ihi. Ts'ilak häp hupuy tä lhey Kir-hareset tä imälhehi, mat hin'ol tä õfwomthiwos tä lhamel ilunej wet itayhlä.

₂₆Wet täjp'ante Moab laka rey hiw'en tä nikalhahi laka'tshayaj, wet ichuma setecientos sip'älis tä t'äschehchä tä ichäjthä lakatnhates, yämlek lhamel ifwoyenche len'äyij wet itayhlä Edom laka rey. Mat lhamel nikalhahi. ₂₇Wet nech'e rey ichuma lhäs tä thaläkw, lham p'ante tä icheyäjihola lajcha leniyatyajw'et, wet iho'pe hupuy fwamhat lhip, wet ilän wet iwunho tä yen lew'ayhata laka dios. Wet tä Israel lhayis hiw'enej, wet wuj tä inuhat lhamhohen, wet lhamel yikhen tä yäple laka honhat.