2~Ped 1

₁Amtena ipuhfwas, olham Simón Pedro ohäpe Jesucristo lakawo wet äp laka apóstol, wok oyok, lakachenhay tä lhamenya elh. Ochen amehen olhämetna amel tä i'amejen achayaj tä wuj tä laha ihi, mälhyej tä in'oyejen, tä n'aisej m'ak tä is alhoho tä Lhafwayhthi Dios Jesucristo iwoyej n'amehen. ₂Is chik lhäy'e lhip lep'altsenyaj lhäy'e atamsek tä i'amejen tä letäfwelayej Dios lhäy'e Lhawuk Jesús.

₃Dios lakhajyhayaj iyej t'at Jesucristo, wet Jesucristo lhaitäfwnhat n'amejen wet t'än n'amehen, häp tä isej lewujyaj lhäy'e le'isyaj tä matche. Wet tälhe lhatäfwnhayajtso, hiw'en n'amhohen nilhokej m'ayhay tä y'awatlä yämthilek y'anukwepej len'äyij tä t'amajchet. ₄Wet n'aisej t'at lewujyaj lhäy'e le'isyajtso tä lham ifwel tä hiw'en n'amhohen m'ayhay tä isis tä lhäy'e lhip tä laha ihi. Wet tä hiw'en amhohen m'ayhaytso, lekalhayhi tä aletech'aynej Dios, wet letafwayej t'at n'okeyes tä ni'isachehen tä ihi honhat tä tälhe hin'ol lenech'ethayajay.

₅Tä mälhyejtso, tä achayaj ihi akhajyenhen yämthilek häte is achumyaj. Wet chik is achumyaj, akhajyenhen yämthilek häte letäfwelayej Dios lenech'ethayaj. ₆Wet chik letäfwelayej Dios lenech'ethayaj, akhajyenhen yämthilek häte letumayhlä amel anech'ethayajay tä ni'isachehen. Wet chik letumayhlä anech'ethayajay tä ni'isachehen, akhajyenhen yämthilek häte leteläytej ateläythayajay wet atamsekis ihi. Wet chik leteläytej ateläythayajay wet atamsekis ihi, akhajyenhen yämthilek häte lenuyaykwe t'at Dios len'äyij tä is alhoho. ₇Wet chik lenuyaykwe Dios len'äyij, akhajyenhen yämthilek häte alhenay lepuhfwasweka. Wet chik alhenay lepuhfwasweka, akhajyenhen yämthilek häte ahumnhayaj ihi.

₈Chik i'amejen m'ayhaytso wet lhaichihelit, häpkhilek wichi isej Dios lechumet tä alekhajyenayej, wet matche tä laha ihi tä letäfwelayej Lhawuk Jesucristo. ₉Mat häp elh chik m'ayhaytso newayej, hätet iwoye elh tä lhimphaj tä hiw'enche honhat, asnam t'at, hip'ethatlä tä õ'lej lech'isukyajay tä pajche.

₁₀Tä mälhyejtso, ipuhfwas, tä Dios pajche t'än amehen wet tatshupi amehen, äm kalelhäj tähesna häp tä isej achumyaj tä is. Chik mälhyejtso, lelehiyejt'ala Dios len'äyij, ₁₁wet nemla koyhyaj chik iwahin amejen yämthilek letiyäjo Lhawuk Lhafwayhthi Jesucristo Leniyatyaj tä najit lepesa.

₁₂Tä mälhyejtso, olehiyejt'ala tä otichunyenpej amchehen tähestso, tej tä pajche lehanayej lhäy'e tä alet'unteji häp m'ak tä matche tä pajche õ'chufwen amejen. _13-14Ohanej t'at tä pajiyejt'ala wet olehiyeja honhatna, mälhyej tä Lhawuk Jesucristo ifwelte n'oho. Mat tä kamaj oiche, oyenek häpe t'at täja ochumet, tä onityen amejen wet otichunyen amchehen m'ayhaytso, ₁₅wet olhaikhajyenhiyeja yämthilek tejlak oy'il, mat lhenay atichunhayaja.

₁₆Tä olhamel ochufwen amejen häpet Lhawuk lakhajyhayaj lhäy'e tä tapinla, otälhthiyet'a p'alhalis tä hin'ol letichunhayajay. Mat häpe t'at m'ak tä olhamel ottelhoy hiw'ente, häp Lhawuk tä lewujyaj tä isi. _17-18Tsi olhamel oiyejte tä i'pe chenaj tä tojphä tä Dios t'amajchet, wet ow'enej tä Dios Lhajcha hiw'enho len'ohyaj lhäy'e lesilatyaj, wet oläte Dios lepak tä tumho lesilatyaj tä ipuleye tä yok, “Häp täjtsi Olhäs tä Ohumnek, wuj tä okäjejlhi.”

₁₉Wet täjtso ikalelhät tä matche häp profetas silätyaj p'ante, wet wuj tä is tä amel letach'ahuye. Tsi n'osilätyajna hätet iwoye n'ochäkw tä isi tä ihi honatsi yäk fwala n'änlä. Wet Cristo hätet iwoye kates lhokwetaj tä inuphä tä nech'e fwala, yämthilek ihutunpe ahusey. ₂₀Mat oyok, chunkat hanayej täja: Isit'ak elh chik häpe yäme m'ak tä lham letichunhayaj t'at tä fwetaj y'ithat profetas lesaynek lhip chik häpe tä ihi Lehi. ₂₁Tsi ihichet'a p'ante Dios laka profeta chik iwo silätayej wichi m'ak tä lham t'at tä lhämet. Mat Dios laka Espíritu tä T'amajchet tä yämyenwethä profetas.