2~Sam 10

₁Tä paj p'ante y'il Nahas, Amón lhayis laka rey, wet lhäs Hanún tä icheyäjo lajcha leniyatyajw'et. ₂Wet David letichunhayaj yok:

–Is chik owoyeje m'ak tä is häp Hanún, Nahas lhäs, mälhyej tä lajcha iwoyej n'oye m'ak tä is wet olhamel och'ot lhamehen.

Wet David ichene lakawos yämlek ikhajyen Hanún tä itichunche lewit'äy tä lajcha y'il. Mat tä David lakawos ichäte Amón lhayis kahonhat, ₃wet laka niyatey ifwenho p'ante lewuk Hanún tä yok:

–¿Hä lematitche tä David ichen ame hin'ol tä lakawos tä ifwen amho tä itichunche awit'äy wet iwujyen ajcha tä y'il? ¡Et ichen ame lhamel yämlek itetshanlhi hupuy wet iyahinpe yämlek iwasthiche!

₄Wet Hanún ne'tek õ'tsokanej David lakawos, wet ne'tek õyisitchehen lepäsey lhip weihalha lhäy'e tä õyisitchehlä lechowej lew'uyis yäk ichäte lheche lechowej. Tä ileyej, wet ichen lhamel. ₅Wet õ'fwenho p'ante täjtso rey David, wet ichene lakawos iyhäj tä ichutlä hin'oltso tsi lhamel wuj tä len'äfwlhi ihi. Wet David ne'tek lhamel imälhehi Jericó yämlek yachajo tä lhaichihelit lepäsey, wet nech'e iwoye chik pilthä lhamel.

₆Wet Amón lhayis ihanej p'ante tä David n'äyihomche lhamel. Tä mälhyejtso, lhamel yen hayayej veinte mil (20.000) Aram lhayis kasip'älis tä ihi Bet-rehob lhäy'e Soba, lhäy'e Maaca laka rey, lhäy'e mil hin'ol tä tälhe, lhäy'e doce mil hin'ol tä tälhe Istob. ₇Tä David ihanch'oye, wet ichene Joab lhäy'e ilhokej laka nifwotaj yämlek itayhlä lhamel. ₈Wet Amón lhayis ihoye p'ante tä iwo laka'tshayaja, wet lhaikanchehchä tä ihi lepe tä ihi hupuy lefwamhat. Wet Aram lhayis kasip'älis tä tälhe Soba lhäy'e Rehob, lhäy'e nifwotas tä tälhe Istob lhäy'e Maaca, lhamel w'enha lhamej, ihi lhip elh tä tsajphä. ₉Wet Joab hiw'en p'ante tä lham tä ihlä õka'tshayaj, lhäy'e tä ifwute lham. Wet ichuma Israel kasip'älis tä lhäy'e lhip tä khajayhen, wet lhaiwaklhat yämlek itayhlä Aram lhayis. ₁₀Wet ichuma sip'älis iyhäj tä imälhehi wet yachaje lech'inij Abisay tä lham tä lhaitumtej yämlek itayhlä Amón lhayis. ₁₁Wet Joab ifwenho Abisay tä yok:

–Chik Aram lhayis khajayhen, inu n'o'pe, wet is chik am leho n'oye tä lech'ot n'oye. Wet chik Amón lhayis inu atape, wet olham ohohla ame tä och'ot ame. ₁₂¡Akhajyen, otle t'un! ¡N'awo lhaka'tshayaja'pe lhaka wichi lhäy'e lhaka Dios kahupuy! Wet is chik Lhawuk iwoye häp m'ak tä lham ihuminche.

₁₃Wet Joab ihoye, lhäy'e laka sip'älis, yämlek itayhlä Aram lhayis, mat tä lhamel hiw'enlä inukwe alhoho. ₁₄Wet tä Amón lhayis hiw'en p'ante tä Aram lhayis inukwe alhoho, wet hätej lhamel inukwe alhoho tä hiw'enlä Abisay, wet lhamel tiyäjo laka hupuy. Wet Joab ileyej tä itayhlä Amón lhayis wet yäple Jerusalén.

₁₅Tä Aram lhayis hiw'en p'ante tä Israel ikalhi lhamel, wet lhamel yachajo tä ihutwek laka sip'älis. ₁₆Wet rey Hadad-ezer t'änehen Aram lhayis iyhäj tä ihi lhip elh tewokitaj tä Éufrates, wet lhamel ihoye p'ante Helam. Wet elh tä yikchufwi lhamel häpe Sobac, Hadad-ezer laka sip'älis tä laka niyat. ₁₇Wet õ'fwenho p'ante David, wet ihutwek ilhokej Israel lhayis. Wet lhamel yistho tewok tä Jordán yäk lhamel ichäte Helam. Wet Aram lhayis iwo laka'tshayaja tä lhamel itayhlä David, ₁₈mat tä lepese lhamel yikhen tä nowaye Israel. Wet David lhäy'e laka nifwotas ilänhen setecientos (700) Aram lhayis kasip'älis tä ihiche kaletas lhäy'e cuarenta mil (40.000) hin'ol tä iche'pe yel'atas. Hätej ilän Sobac, Aram lhayis kasip'älis kaniyat, wet y'il. ₁₉Wet ilhokej reyes tä lhaip'ajtej Hadad-ezer, tä lhamel hiw'en p'ante tä Israel ikalhi lhamel, wet lhamel ileyej tä itayhlä wet iwo letamsekahlä Israel lhayis, wet Israel len'ohyaj i'pe lhamel. Wet tälhe lewhäytso tä Aram lhayis ileyej tä hich'ote häp Amón lhayis, tsi lhamel nowaye Israel.