2~Sam 8

₁Tä tiyäme tähistso, David ikalhi p'ante Filisteo lhayis, wet len'ohyaj i'pe lhamel, wet lhamel nem lewuhuy honhat.

₂Häte ikalhi p'ante Moab lhayis, wet imäyenche katsi tä ihonhate wet õ'waylhatejpej tres. Wet iyhäjpej tä yiwite lakawaylhahthis tä ichun häpe iyhäj tä õ'länhen, wet iyhäjpej tä yiwite lakawaylhahthi elh tä ilepese häpe iyhäj tä õknilänahen. Mälhyej p'antetso tä David len'ohyaj i'pe Moab lhayis wet häte lhamel tiskanpe p'ante laka impuestos.

₃Wet iche p'ante hin'o tä lhey Hadad-ezer, Rehob lhäs, häp Aram lhayis laka rey tä niyatej honhat lhip tä lhey Soba. Wet lham yik p'ante tä iwatläk yachaj lhame honhat tä ifwache tewokitaj tä Éufrates. Wet häp tä lewhäy tä David lhäy'e laka nifwotas inuye wet ikalhi. ₄Wet David lhäy'e laka nifwotas itsokthä mil setecientos (1.700) sip'älis tä iche'pe yel'atas, lhäy'e veinte mil (20.000) sip'älis tä t'äschehchä. Häte inäk'äsen lakäläy yel'atas tä iton kaletas tä õka'tshayajchal. Tajlhame tä imanthi yel'atas iyhäj tä iwatejlä cien kaletas.

₅Wet nämhen Aram lhayis tä tälhe Damasco yämlek lhamel hich'ote Hadad-ezer. Mat David lhäy'e laka sip'älis ilänhen veintidós mil (22.000) lhamel. ₆Wet itihi lhamel laka honhat häp lham laka sip'älis. Wet len'ohyaj i'pe lhamel wet häte lhamel tiskanpe laka impuestos. Mälhyejtso tä Lhawuk hich'otepej David, honhat chik häpe tä ihoye, wet ikalhi t'at letayhfwas.

₇Wet David ichuma Hadad-ezer leniyatfwas laka'tshayajp'otes tä oro wet ichäje Jerusalén. ₈Häte ichuma wuj bronce tä tälhe Beta lhäy'e Berotay, hupuy täkwfwas tä lewuk Hadad-ezer.

₉Wet rey tä lhey Tou tä niyatej honhat tä Hamat, lham ihanch'oye p'ante tä David ikalhi ilhokej Hadad-ezer kanifwotaj. ₁₀Tä mälhyejtso, Tou ichene rey David häp lhäs Joram yämlek n'okwiyej wet käjejlhi. Tsi Tou häte itayhlä p'ante häp Hadad-ezer. Wet Joram ichäje David m'ayhay tä oro, lhäy'e tä plata, lhäy'e tä bronce. ₁₁Wet rey David yachaje ilhokej m'ayhayna häp Lhawuk. Hip'ajtej oro lhäy'e plata tä tälhe ilhokej honhates tä lham ikalhi: ₁₂tälhe Edom, Moab, Amón, lhäy'e Filisteo lhayis, lhäy'e Amalek, lhäy'e tä isoyej Hadad-ezer.

₁₃Wet David ilänhen dieciocho mil (18.000) Edom lhayis tä ihi honhat tä w'awulhchä tä lhey Nisoyw'et. Wet tä pil, wet letoyaj y'ajpe honhat. ₁₄Wet itihi Edom häp laka sip'älis, wet lham len'ohyaj i'pe ilhokej Edom lhayis. Wet Lhawuk hich'ote David, honhat chik häpe tä ihoye, wet ikalhi t'at letayhfwas.

₁₅David leniyatyaj i'pe ilhokej Israel, wet iwoyepej m'ak tä is alhoho yämlek laka wichi isej. ₁₆Häp laka sip'älis kaniyat häpe p'ante Joab, Sarvia lhäs. Wet Josafat, Ahilud lhäs, häpe elh tä silätwo tä ifwenhopej rey häp m'ayhay tä iche. ₁₇Wet Sadoc, Ahitub lhäs, lhäy'e Ahimelec, Abiatar lhäs, häpehen sacerdotes, wet Seraías häpe elh tä õlesaynekwo. ₁₈Wet Benaías, Joyada lhäs, häpe elh tä niyatej Keret lhayis lhäy'e Pelet lhayis tä lhamel t'uye rey. Wet David leles häpehen p'ante sacerdotes.