2~Tim 1

_1-2Amtena ipuhfwa Timoteo, olham Pablo ochen ame olhämetna tä ohäpe Cristo Jesús laka apóstol, wok oyok, lakachenhay tä lhamenya elh, tsi häpe t'at täjtso Dios lenech'ethayaj. Dios ne'tek oyen silätyaja n'ow'atshancheyaj tä lham ifwenhomche lhamel tä hap'akej Cristo Jesús.

Wet am tä ahätet iwoyek olhäs tä ohumnek, is che Dios Lhajcha lhäy'e Cristo Jesús Lhawuk iti amej lakäpfwayaj tä is, lhäy'e lep'altsenyaj, lhäy'e atamsek.

₃Tä owo ot'alhyaja ifwalapej honatsipej, otichun hach'oye wet owo graciasayej Dios tä Owuk. Newache otichunhayaj tä oyen n'äfwlhiya lhamej tä otch'ote, mälhyej tä oka thänhäy p'ante tach'ote.

₄Tatäyhit'a tä oyen tichunhayaja täjte letafwlhi, wet wuj tä ot'uhläk oahiw'en yämthilek lhäy'e lhip tä okäjyaj ihi. ₅Tsi oyen tichunhayaja achayaj tä matche, häpe t'at tä ichun tä iyejte atela Loida, lhäy'e ako Eunice, wet kalelhäj tä häte i'amej.

₆Wet häp tä oyok, Khajyen awayhat tä i'amhi tä Dios takäpfwayej ame, tälhe ifwalahte oti atape otkweyey. ₇Tsi häpkhit'a lhanowayhyaj tä Dios itihte n'amhiche, mat häpe t'at lhakhajyhayaj lhäy'e lhahumnhayaj, lhäy'e tä y'atetshanpej m'ak tä y'awoye. ₈Tä mälhyejtso, yej n'äfwelh tä lhen ämeta Lhawuk, wet yej n'äfwelh o'pe tä õhp'o n'ohi'pe lham lechumet. Mat ap'ajtit n'oyej tä lewo ateläythayaja'pe Dios Silätyaj tä Is, häp tä isej akhajyhayaj tä Dios hiw'en amho.

₉Dios n'aifwayhthen, wet t'än n'amehen yämthilek n'alhayen t'amajchetesayej lhaw'atshancheyaj. Häpkhit'a lhachumyajay tä y'awoye che tamenej täjtso, mat häpe t'at lham lenech'ethayaj lhäy'e lep'altsenyaj. Tsi Dios n'aihumnhen, häp tä isej Cristo Jesús, tälhe tä kamaj honhat newache, ₁₀wet tä näm honhatena Lhafwayhthi Cristo Jesús, hin'älit t'at lehumnhayajtso. Cristo iwasthi n'ot'ilek lakhajyhayaj, wet Dios hin'älit t'at n'ow'atshancheyaj tä nhanayej che y'il, häp tä isej Dios Silätyaj tä Is,

₁₁Olham häp tä Dios yenn'o häpeya laka silätwo wet apóstol, wet ne'tek ochufwenejen wichi häp Lesilätyaj tä Is. ₁₂Wet häpe t'at täjtso tä tamen n'oyej tä oteläythayajna in'oyej. Mat on'äfwlhi ihihit'a, tsi ohanej t'at elh tä häpe tä ochaye, wet äp ohanej tä lham ihanej iwoyneje tä t'uye m'ak tä t'ekhayej n'oye, yämthilek newache lewit'äyhyaj. Wet t'uhiyela pajla'tha nichäte ifwala tä lepes.

₁₃Che lewo achufwenyaja, ten m'ak tä olham owoye tä ochufwente amej m'ak tä is, wet yej leyej lhachayaj lhäy'e lhahumnhayaj tä in'amejen tä y'ap'akej Cristo Jesús. ₁₄Amajej n'ochufwenyaj tä is tä oyämetso, häp tä isej Espíritu tä Dios T'amajchet tä in'amhihen.

₁₅Pajche lehanej tä nilhokej lhamel tä lew'et honhat tä Asia, lhamel iwomn'o. Wet iyhäj tä iyej häpe Figelo lhäy'e Hermógenes. ₁₆Mat is che Lhawuk itiyej lep'altsenyaj häp Onesíforo lew'et lheley, tsi lham ihopej n'oye wet ikhajyenn'o, wet len'äfwlhi ihihit'a n'oyej tä õhp'o n'ohi. ₁₇Mat häpet tä nämho Roma, lhaikhajyen tä t'u n'okwe pajtha nilhok n'oye. ₁₈Wet häte am lehanej tä wuj tä tach'ot n'amehen tä y'ehi naji Éfeso. Oyok, t'uhawetej che Lhawuk itiyej lep'altsenyaj che nichäte Ifwala tä N'okalelhthayaj.