“En ämeta Dios lhämet”
1Athana nem koyhyaj tä onityen amej tä ihi tä Dios itayche, lhäy'e Cristo Jesús tä nämla yämlek lhayen Niyata wet itiyej lakalelhthayaj wichi tä iläyhen lhäy'e iyhäj tä y'inhen. 2Oyok, en ämeta Dios lhämet. Chik iche fwala tä haw'et iyeji yämlek lewo ämeta, wok tej chik newache p'iya, mat yej pantej ämet. Äm kalelhäj ämet yämlek wichi isyen alhoho m'ak tä iwoye, fwone lhamel wet nityenej, wet yej lhak'alpe lhamel tä lechufwenhen.
3Tsi nämla lewhäy tä wichi yämhiyela n'ochufwenyaj tä is tä tälhe Dios wet yohlak, “Äytajche n'olhämetna.” Wet tä afwtsesejwethä n'ochufwenyajay iyhäj tä iläte, ihutla lhamejen lewos tä lechufwenyaj yiwite m'ak tä lhamel ihuminche. 4Nemla tach'ahuye Dios lhämet tä matche, mat lhaiwetahathihola p'alhalis. 5Mat am, yej alhen alhaknhatsajayej m'ak at chik häpe, teläytej alhaklis, enpej ämeta Dios Silätyaj tä Is, wet woye t'at nilhokej achumtes tä ahäpe Dios lakawo.
6Tsi olham tott'aye lewhäy chik oleyej honhat, wak'alh t'at tä õ'länlan'o, ohätehlat iwoye hat'es tä õyen Dios t'awayhata tä õ'tsäype altar. 7Pajche olhaikhajyen tä owo oka'tshayaja, ofwit lepes on'äyij tä onukwe, ot'amajej lhat'ekhahyaj wet owoye. 8Athana õt'amajej n'oho okaha, tä Lhawuk tä häpe N'okalelhthayajwo tä is alhoho, hiw'enla n'oho'pe o'isyaj chik nichäte fwala tä lepes. Wet ts'ilakhit'ala olham chik hiw'enla n'oho, mat häte nilhokhiyeja wichi tä ihumin wet inihihlä fwala tä lham tapinla.
Pablo lhämet tä ilepese
9Yej nahayej m'ak chik häpe, mat ho n'oye'thahya. 10Tsi Demas lehumnhayaj itiyej m'ayhay tä ihonhatena, wet iwomn'o wet ihoye Tesalónica. Crescente ihoye Galacia, wet Tito ihoye Dalmacia. 11Tajlhama Lucas tä in'oyej. Ukwe Marcos wet chäj alhoho, tsi oisiyeja chik hich'ote ochumet. 12Häp Tíquico pajche ochene Éfeso.
13Chik lenek, chäj n'oye ow'uy tä on'äyejnaj Carpo tä ihi Troas. Häte oka libros, wet lhäy'e lhip tä owatlä n'olesaynekhis tä olewuk tä tsänt'äj tä õ'käfwelche.
14Häp chinajwo Alejandro lhäy'e lhip tä ni'isa m'ak tä iwoyej n'oye. Mat Lhawuk iwohla lahayayej. 15Häte amaj amejlä, tsi wuj tä lhaikhajyen tä tatayhlä lhasilätyaj.
16Häp fwala tä iwo tesa tä oihi tä niyatey itayche, ihichet'a elh chik häpe chik hich'ot n'oye tä oyämlhi letape, mat nilhokej iwomn'o. Is chik Dios tek yen tesayej lhamel täjtso. 17Mat Lhawuk häp tä inaj owhäye, wet hiw'en n'oho okhajyhayaj yämlek otkhajay tä oyen lhämeta imälhewek lham lhämet, häpkhilek nilhokej lhamel tä kahäpeya Judío lhayis iläte t'at. Wet mälhyejtso tä Lhawuk ifwayhatnaj n'oyej ot'ilek lak'aj, 18wet ifwayhthila n'oyej nilhokej m'ayhay tä ni'isachehen, wet t'amajila n'oyej pajla'tha onchäte Leniyatyaj tä ipuleye. ¡Is chik lewujyaj iyej yämlek tiyäj'attsiy! Amén.
Pablo len'okhayaj lhäy'e lakäpfwayaj tä lepes
19Ochene on'okhayaj Prisca lhäy'e Aquila, lhäy'e Onesíforo lew'et lheley. 20Erasto imälhehi Corinto, wet Trófimo on'äyhi naji Mileto, t'inhayaj tä ilän tä tamenej.
21Yej nahayej m'ak chik häpe, mat ho n'oye tä kamaj kafwiy'eta. Eubulo, Pudente, Lino, Claudia, lhäy'e nilhokej lhapuhfwas iyhäj, ichen ame len'okhayajay.
22Is chik Lhawuk iyej ahusek. Wet is chik Dios lep'altsenyaj iyej nilhokej amel.
