3~Juan 1

₁Amtena yaelh Gayo tä oalehumnek, olham tä othaläkw ochen ame olhämetna tsi wuj tä oaihumin tä y'ap'akej m'ak tä matche. _2-3Ipuhfwa, oyok, is chik i'amej nilhokej m'ak tä ischehen wet is chik nichäta ame t'inhayaj chik häpe. Wuj tä okäjyaj ihi tä nämhen iyhäj lhapuhfwas wet yäme tä lelehiyejt'a Lhawuk len'äyij wet letujlhache t'at m'ak tä matche. ₄Ihichet'a okäjyaj chik inu'pe okäjyaj tä in'oyej tä ohanch'oye häp opuhfwas tä iwoyepej m'ak tä matche.

₅Ipuhfwa tä oalehumnek, matche tä alet'amkatej achumet tä lewoyeje häp Dios leles, lhäy'e hach'otyaj tä letiyej lhapuhfwas tä iho amehen tä tälhomche lew'etes tä w'enhache lhamej. ₆Lhamel ifwenho t'at Dios leles tä ihi täjna häp ahumnhayaj. Wet oyok, is chik letach'otejepej wichi tä mälhyejentso häp m'ak tä iwatlä yämthilek tujlhache lew'ekyaj, mälhyej tä Dios ihuminche. ₇Tsi iwo lew'ekyaja tä tach'ote Jesucristo lechumet, wet tek tachumlä n'och'otyaj tä tälhe wichi tä kahäpeya Dios leles. ₈Häp tä tamenej tä oyok, Is chik n'amel y'atetshan häp lhamel yämthilek y'atch'oteje tä yen lhämeta m'ak tä matche.

₉Wet iche m'ak elh tä ofwel amho. Tsi olham oyenlhihte carta wet ochene Dios leles tä i'amej, mat elh tä lhey Diótrefes tach'ahuhit'a n'oyehen tsi ihumin tä lhayen niyatayej iyhäjpa. ₁₀Tä mälhyejtso, chik oho amehen on'älthiyeja lakey, tsi wuj tä iwo laka sitäya lhäy'e lhämtes tä ni'isachehen tä itayyenlä olhamelpa. Tajlhamhiyet'a täjtso, mat nitchumahlä häp lhapuhfwas tä nämhenpej, wet äp y'isej tä n'äyejo iyhäj tä t'uhläk tachumlä lhamel, wet yen tesayej wet ichen yämthilek yikch'oye Dios lelespa.

₁₁Ipuhfwa tä oalehumnek, yej ten m'ayhay tä ni'isahen, tajlhame m'ayhay tä isen. Häp elh tä iwoyepej m'ak tä is tälhe Dios, mat elh tä iwoyepej m'ak tä ni'isa tek nitäfwelej Dios.

₁₂Häpet n'aelh Demetrio, oyok, nilhokej wichi yäme tä wuj tä is, wet m'ak tä matche tä lham iwoye ikalelhät häp lham. Häte olhamel oyäme t'at tä mälhyejtso, wet am lehanej tä matchepej m'ak tä olhamel oyäme.

₁₃Iche wujpe m'ayhay tä ot'uhläk oyäme, mat otihihit'a oka cartana. ₁₄Tsi ot'uhläk oho ame'thahya, yämthilek ow'en atape wet oyämlhi amho.

₁₅Is chik atamsek ihi. Häp lhakalay'is tä ikana lhamel ichen ame len'okhayaj. Is chik len'okwiyej elhpej lhakalay'is tä i'amej.