Dios leles lhaihuthiwek Jerusalén
1Häp fwalastso iche hin'ol tä tälhe Judea wet ihoye Antioquía tä ihi Siria, wet ichufwenhen Dios leles tä yok:
–Chik amel kachunkata amejen häp n'otetnek tä n'olhijtsek, mälhyej Ley p'ante tälhe Moisés ne'tek õ'woye, lehanhiyejt'a lewoyneje yämlek letafwayhen.
2Pablo lhäy'e Bernabé yäm äytaj lhämet tä nichulhejlä häp hin'oltso. Tä lepese õ'tshupyene lhamel lhäy'e hin'ol iyhäj, yämlek ihoye apóstoles lhäy'e hin'ol tä lhamenya tä Dios leles tä ihi Jerusalén, häpkhilek itetshan täjtso.
3Wet häp tä Dios leles tä ihi Antioquía ichen lhamel, wet inukwe honhates tä Fenicia lhäy'e Samaria wet ifwenhomche wichi, tä iyhäj tä kahäpeya Judío lhayis iwo lehusey iyhäja. Wet nilhokej Dios leles wuj tä akäsejwethä täjtso.
4Tä Pablo lhäy'e Bernabé nichäte Jerusalén, Dios leles tä ihi, lhäy'e apóstoles, lhäy'e hin'ol tä lhamenya, tachumlä lhamel, wet lhamel ifwenho nilhokej m'ak tä Dios iwoyeje. 5Mat elhpej Fariseo lhayis tä t'ekhaye Jesús, lhamel nechephä wet yok:
–Häp wichi tä t'ekhaye Jesús wet tä kahäpeya Judío lhayis, iwohiyet'ak nikatayej n'otetnek tä n'olhijtsek wet iwohiyet'ak niwoyaye Ley p'ante tälhe Moisés.
6Tä mälhyejtso, apóstoles lhäy'e hin'ol tä lhamenya lhaihutwek yämlek itetshan täjtso. 7Tä wuj tä lhamel yämejwethä, Pedro nephä wet yok:
–Ipuhfwas, amel lehanej tä nekchämes tä tajyämetso, Dios itshupyenejte n'oye tä oiyej amel, ne'tek owo silätayej wichi tä kahäpeya Judío lhayis Dios Silätyaj tä Is, yämlek iläte wet t'ekhaye. 8Wet Dios tä nitäfwelej wichi lehusey hin'älit tä akäjejlhi lhamel, tsi hiw'enho Espíritu tä T'amajchet hätet iwoye tä hiw'en n'amhohen. 9Dios itech'ayen at n'amejen, tsi häte ilejen lhamel lehusey häp tä isej t'ekhahyaj. 10Tä mälhyejtso, ¿chipte tä lefwetaj lhelhteje Dios tä let'uhläk lenahhatejwethä lelestso häp m'ak tä n'amel lhäy'e lhatetsel p'ante kay'ahanayej y'awoyneje chik y'awoye? 11Matkat n'amel y'at'ekhaye tä y'atfwayhen häp tä n'aisej Lhawuk Jesús lep'altsenyaj, mälhyet iwoye lhamel.
12Tä Pedro ileyej lhämet tä iwoye, Bernabé lhäy'e Pablo takasthen wet yäme n'otetnhay lhäy'e m'ayhay tä iselkatejen wichi tä Dios iwoyeje iyhäj tä kahäpeya Judío lhayis, häp tä isej lhamel. Tä lhamel yäme tähestso, wet wichi yok tam tä tach'ahuye. 13Tä ileyej, wet Santiago iwo lhämeta wet yok:
–Ipuhfwas, lhek tetshan olhämet. 14Simón ifwelmat n'amhohen m'ak tä Dios nech'e iwo tesa p'ante tä hip'altsenhen häp wichi tä kahäpeya Judío lhayis, yämlek t'ähiche lhamel iyhäj wet yen laka wichiya. 15Täjtso yiwete t'at profetas lhämtes p'ante ihi Lehi tä yok,
16“Häp fwalas tä y'attachena
otpinla, yokwe Lhawuk,
wet oyachajihola chik oneyhatphä
David niyatyaj tä nichät katsi.
Oyenhilhila tä wasi wet äp okhajyenla
17yämlek wichi iyhäj t'u n'okwe,
nilhokej lhamel tä kahäpeya Judío lhayis
tä oyen ot'amajchetesa.
18Mälhyejtso lhämet häp Lhawuk,
lham tä hin'älit m'ayhayna tälhe tä nech'enyaya.”
19Wet Santiago äp yok:
–Olham otichunhayaj tä isit'ak y'athahyen len'äyij lhamel tä kahäpeya Judío lhayis tä iwo lehusey iyhäja. 20Mat is tä y'achene carta lhamel häpkhilek ileyej m'ayhay tä Moisés lhämet p'ante ne'tek õ'leyej: häp itshäwet t'isan tä pajche õyen t'amajchetayej dios lhayis tä n'otkwey lhenhay, lhäy'e tä yen lech'efwaya atsinha wok hin'o tä matche tä elh t'at tä neya katsik häpe, lhäy'e itshäwet lew'oyis wok lep'itsek tä kamaj lew'oyis imälhehi t'isan. 21Tsi tälhe fwalas tä pajche, õyenpej lhämetayej wichi tä ihi hupuy chik häpe häp Ley p'ante tälhe Moisés, wet õyahyen t'at tä ihi n'ohusew'etes fwalapej tä n'ot'elakw'et.
Dios leles tä ihi Jerusalén ichene carta häp wichi tä kahäpeya Judío lhayis
22Tä Santiago ileyej lhämettso, wet apóstoles lhäy'e hin'ol tä lhamenya, lhäy'e nilhokej Dios leles iyhäj, lhamel fwetaj is chik itshupyeneje hin'ol tä iyej lhamel yämlek ichene Antioquía tä yikche Pablo lhäy'e Bernabé. Wet lhamel tatshupiye Judas, tä äp õyen lheya Barsabás, lhäy'e Silas, häp hin'ol tä matche tä õ'wujyen tä iyej lhamel. 23Wet lhamel hiw'enho laka carta tä ichene wichi, wet lhämet yok:
“Amtena yaiyhäj tä oalepuhfwas tä akahäpeya Judío lhayis tä lheyayhi Antioquía, lhäy'e Siria, lhäy'e Cilicia. Olhamel tä ohäpehen apuhfwas tä apóstoles lhäy'e hin'ol tä lhamenya, ochen amehen on'okhayajay. 24Olhamel oläte tä iche hin'ol tä tälh n'oyehen tä iho amehen, wet wuj tä ailhaklitejwethä häp lhämtes tä iwoye wet ikänchi atichunhayajay. Mat oyok, tek olhamel olhämetej. 25Häp tä tamenej tä nilhokej olhamel ofwetaj is chik otshupyeneje elhpej lhapuhfwas tä in'oyejen, yämlek ochen amehen tä yikche n'aiyhäj tä n'ohumnhay Bernabé lhäy'e Pablo, 26häp hin'ol tä ninowaya letapehen tä tach'ote Lhawuk Jesucristo lechumet.
27“Tä mälhyejtso, olhamel ochen amehen häp Judas lhäy'e Silas, wet lhamel ikalelhthila amhohen nilhokej m'ayhay yämlek lehanayej. 28Tsi ofwel amhohen tä Espíritu tä Dios T'amajchet, lhäy'e olhamel, oyok, Is chik niwohit m'ak chik olhuhyen amejen, ts'ilak t'at m'ayhayna tä t'uhawetej: 29Oyok, häp itshäwet tä pajche õyen t'amajchetayej n'ocheyälis, yej tuj t'isan, lhäy'e itshäwet w'oyis wok lep'itsek tä kamaj lew'oyis imälhehi t'isan. Wet yej lhen hach'efwaya atsinha wok hin'o tä matche tä aelh t'at tä neya katsik häpe. Chik let'amaj amejenlä m'ayhay tä mälhyejentso, häpkhilek aische alhoho.
“Tajlhama olhämet. Is chik Lhawuk i'amejen.”
30Tä wak'alh lhämetna, lhamel iwo tsilhekayej iyhäj tä yikchufwi wet lhamelna yikhen. Tä nichäte p'ante Antioquía, wet nilhokej Dios leles lhaihutwek, wet lhamel hiw'enho häp carta. 31Tä ileyej tä yahyen, wet lhäy'e lhip tä lakäjyaj ihi tsi wuj tä ikhajyenhen lhamel. 32Häte Judas lhäy'e Silas tä häpehen iyhäj tä profetas, wujpe lhämtes tä iwoye tä inityenejen Dios leles lhäy'e tä ikhajyenejen. 33Wet iyej t'at lhamel fwalastso. Wet tä yikch'oye, iyhäj iwo tsilhekayejen wet yok:
–Lhawuk i'amejen.
Wet nech'e lhamel yäple Jerusalén. 35Mat Pablo lhäy'e Bernabé imälhehi Antioquía, wet iwopej lechufwenyaja wet yen silätyaja Lhawuk lhämet. Wet wujpe Dios leles tä tach'ote lhamel.
Pablo äp yachajo lew'ekyaj tä iwoye
36Tä tajyäme fwalas iyhäj, Pablo tahuyej Bernabé wet yok:
–Mäh n'achajo tä n'asikayehen lhapuhfwas tä ihiche nilhokej hupuy tä pajchenaj y'awo silätayej Lhawuk lhämet, häpkhilek y'aw'en chik is t'at p'iya.
37Bernabé t'uhläk Juan Marcos yikche lhamel. 38Mat Pablo wujit'a tä ihuminche, tsi tä lhamel nichätho n'aji Panfilia, Marcos yikch'oye lhamel wet ileyej lechumet. 39Wet matche t'at tä niw'awlhayejchä lhamel letichunhayajay, pajtha lhaiw'enhathen. Bernabé w'enhayej Marcos tä ichäj lhamche wet yikche barco tä ihoye Chipre, 40wet Pablo w'enhayej Silas tä yen t'unfwaya. Wet Dios leles y'alhyene Lhawuk yämlek itiyej lep'altsenyaj. Wet nech'e yikch'oye lhamel, 41wet inukwe Siria lhäy'e Cilicia wet ikhajyenhen t'at Dios leles.
