Ap.Lh 7

₁Sacerdote tä Lhamya tay'ätshane Esteban wet yok:

–¿Hä matche m'ak tä wichi yämej ametso?

₂Esteban nichulho wet yok:

–Yaiyhäj tä athänhäy, ch'ahuyay n'oye, oyok: Lhaka Dios tä lewujyaj ihi lhain'ältej p'ante häp lhates Abraham tä lham ihi p'ante honhat tä lhey Mesopotamia, tä kamaj nihoyaye hupuy tä Harán yämlek yen lew'eta. ₃Wet Dios ifwenho tä yok, “Mäch'oye aka honhat lhäy'e wichi tä aiyhäj, wet hoye honhat chik olham opäynhila ame.” ₄Tä mälhyejtso, Abraham yikch'oye Caldeo lhayis kahonhat wet ihoye Harán yämlek yen lew'eta. Tä paj lajcha ileyej honhat, wet Dios ihänho p'ante Abraham häp honhatna tä amel lheyayhi athana. ₅Mat Dios hiw'enhihot'a p'ante lhip häp honhat yämlek lewuk, wok lepach'o w'ethaj chik hiw'enho. Mat hit'untejche lhämet tä ifwenho tä hiw'enhihola, wet chik lham ilehiyeja honhat, lewukla leles tä lepes lheley, tej tä kamaj laj lhäsa häp fwalas p'ante Dios tahuyej.

₆“Wet Dios äp yok, Häp ales tä lepes lheley ihihila honhat tä kalew'eta, wet õyenla kwenkaya, wet õyenhiyela m'ak at chik häpe yäk cuatrocientos (400) nekchämes. ₇Mat wichi tä yen kwenkaya otasnhila, wet ales tä lepes lheley yikhilach'oye honhattso wet ihohiyela honhatna yämlek n'okwi n'oyej.

₈“Wet Dios ne'tek Abraham yiset n'ot'äj lhip yämlek yen tetnekayej häp lhämet tä hit'untejche. Häp tä tamenej tä Abraham yiset p'ante lhäs Isaac t'äj lhip tä nech'e iche p'ante tä hiw'en ocho fwalas. Häte Isaac, tä lhäs Jacob nichätchä, iwoyeje p'ante täjtso, wet Jacob leles tä ihi doce tä häpehen n'amel lhatetsel p'ante, lham Jacob iwoyeje p'ante täjtso.

₉“Mat Jacob leles itiyej t'ischenyaj lech'inij José wet lhamel iwom, wet hin'ol tä ichäj ihäne p'ante honhat tä Egipto. Mat Dios iyej t'at José, ₁₀wet ifwayhtej nilhokej leteläythayajay, wet hiw'enho lehanyaj, wet tach'ote yämlek lehusek ihi tä iyej Egipto lheley laka niyat, yäk yen häpeya hin'o tä gobernador tä niyatej Egipto lhäy'e lham lew'et tä wuj.

₁₁“Wet iche p'ante nehläs tä y'ajpe nilhok honhat tä Egipto lhäy'e Canaán, wuj tä lelhakli ihi wichi, wet lhatetsel newache p'ante lhäk. ₁₂Mat tä Jacob ihanch'oye tä trigo ihi Egipto, ichene leles, wok oyok, lhatetsel. Häp täja lew'ekyaj tä ichun tä lhamel ihoye p'ante Egipto. ₁₃Wet tä yachajo p'ante tä lhamel ihoye, nech'e José lhaitäfwnhatej lhamel, wet niyat nech'e ihanej wichi tä häpe tä lhäs José. ₁₄Tä paj José iwo chenekaye lajcha Jacob, ne'tek õ'häne Egipto, lhäy'e lew'et lheley tä setenta y cinco lhamel. ₁₅Wet mälhyej p'antetso tä Jacob yen p'ante lew'eta Egipto, yäk lep'itsek ihi t'at, wet häte leles tä lhatetsel lhamel lep'itseyhay ihi t'at. ₁₆Wet õ'tälhtho p'ante Egipto lep'itseyhay, wet õ'häne hupuy tä Siquem tä ihi Canaán, wet õ'thatho n'op'itsekw'et tä Abraham ichäj p'ante tä lewuhuy p'ante häp hin'o tä lhey Hamor leles.

₁₇“Tä tott'aye p'ante lewhäy chik lhayäm matche häp m'ak tä Dios pajche ifwenho p'ante Abraham, wet nem koyhyaj tä wujpey häp Israel lhayis tä ihi Egipto. ₁₈Wet fwalas p'antetso iche hin'o elh tä lhayen niyatayej Egipto, lham ihanhiyejt'a m'ak tä José lechumet p'ante. ₁₉Wet niyattso wuj tä ikanejen lhachätilis p'ante wet iwopej m'akayejen, wet inityenej tä ne'tek iwomwethä lelesas tä nech'e ichehen, yämlek y'inhen. ₂₀Häpe p'ante fwalastso tä nech'e iche Moisés. Häpe t'at han'äfwaj tä wuj tä isilataj, wet tres iwel'as tä lhokwey t'uye p'ante tä ihi lew'et. ₂₁Mat tä ilepese iwom t'at, mat häp niyat lhäse nilhoke p'ante wet tachuma, wet yen lhäsa wet ichihelit. ₂₂Tä mälhyejtso, õ'chufwenej Moisés nilhokej Egipto lheley lehanyajay, wet häpe t'at elh tä lhämet takhajay lhäy'e m'ak tä iwoye.

₂₃“Tä Moisés hiw'en p'ante cuarenta nekchämes, yen tichunhayaja yämlek t'isiyakaye Israel lhayis, tä häpe lham laka wichi. ₂₄Mat tä nichäte, hiw'en Egipto lheley elh tä iwo m'akayej elh lhamel. Moisés ihoye wet tach'ote, iwo haya, wet ilän Egipto lhele. ₂₅Tsi yenek laka wichi nitäfwnhiyej tä lham häpe t'at elh tä Dios ichene lhamel yämlek ifwayhthen. Mat lhamel nitäfwenhiyejt'a.

₂₆“Tä fwala elh p'ante, Moisés hiw'en täkwfwas Israel lhayis tä lhaipäjwethä, wet ihoye wet yok, ¡Yej alepäjwethä! ¿Chipte tä lewo m'aka amejen tä ahäpehen iyhäj tä lhalepuhfwas t'at?

₂₇“Mat elh tä iwo m'akayej elh, ihuttshi häp Moisés wet yok, “¿Atsi tä ayen olhamel oka niyata yämlek letetshan olhamel, wok äp n'okalelhthayajwo tä iyej olhamel? ₂₈¿Hä let'uhläk letech'ayen n'oyej Egipto lhelen'aj lelän?

₂₉“Tä Moisés iläte täjtso, wet yik tä ilethane honhat tä Madián wet iyej t'at wichi tä kalepuhfwasa. Tä ihi, iwo lech'efwaya wet leles täkwfwas. ₃₀Tajyäme p'ante cuarenta nekchämes, tä lham ihi honhat tä ts'anis tä iwhäye chenaj tä Sinaí, wet ángel lhain'ältej tä ihi itäj lhal tä ihi amlhäj lhawayuk. ₃₁Tä Moisés hiw'en, wuj tä t'iseltej. Wet tä lhaitott'ayne tä iyahin, iläte Lhawuk lepak tä yok, ₃₂Olham ohäpe atetsel laka Dios. Ohäpe Abraham laka Dios, Isaac laka Dios, wet Jacob laka Dios.

“Wet Moisés ichettiyejche lenowayhyaj tä iläte, wet tek t'uhläk fwetaj iyahin. ₃₃Wet Lhawuk ifwenho tä yok, Lanche anisähis, tsi lew'et tä let'äsina ot'amajchet t'at. ₃₄Ofwel amho tä ow'en t'at oka wichi leteläythayaj tä ihi Egipto, wet oläte t'at lhamel lelhaklis tä tume, wet häp tä onuyejchä yämlek ofwayhthen lhamel. Wet häp tä ot'än ame, one'tek lehoye Egipto.

₃₅“Tä mälhyejtso, tej tä wichi nitiya lhamhi p'ante häp Moisés wet äp yok, ¿Atsi tä ayen olhamel oka niyata yämlek letetshan olhamel, wet äp n'okalelhthayajwo tä iyej olhamel?, mat Dios ichen p'ante, häp tä isej ángeltso tä lhain'ältej tä ihi amlhäj lhawayuk, yämlek niyatej laka wichi wet ifwayhthen. ₃₆Wet häpe t'at Moisés p'ante tä itonphä lhachätilis, wet yenlhi letetnhay lhäy'e m'ayhay tä wichi t'iseltejen tä ihi Egipto, lhäy'e tä nichäte Lewomekchät, lhäy'e tä ihi honhat tä ts'anis cuarenta nekchämes. ₃₇Wet lham tä ifwenho p'ante häp Israel lhayis tä yok, Dios itälhthihola amel häp profeta mälhyej iwoye olham.

₃₈“Wet Moisés iyej p'ante Israel lhayis tä lhaihuthiwek ts'anis. Matche, iyej t'at lhachätilistso lhäy'e häp ángel tä tahuyej lham tä i'pe chenaj tä Sinaí. Wet lham t'at tä tachump'antehlä häp n'olhämtes tä n'ow'atshancheyaj yämlek nichät n'amehen.

₃₉“Mat lhachätilis p'ante tach'ahuhiyet'a lham, mat y'ulhan, wet lhamel t'uhläk yäple Egipto. ₄₀Wet tahuyej Moisés lechila Aarón wet yok, Enlhi n'amhohen dios lhayis yämlek y'en lhahäneka. Tsi häp Moisés tä n'aitonphä tä y'atälho honhat tä Egipto, y'ahanhiyejt'a m'ak tä lewit'äyhyaj.

₄₁“Tä mälhyejtso, lhamel yenlhi lecheyä tä itech'aynej w'asetaj, wet ilänhen itshätäy tä yen n'okhayajayej, wet iwo lakäjyaja'pe takwey lhenektso. ₄₂Häp tä tamenej tä Dios ileyej lhamel wet tach'anlhaye tä n'okwiyej katetsel tä ipuleye, mälhyej tä profetas lesaynek p'ante yok:

₄₄Wet Esteban äp yok:

–Tä lhachätilis ihi p'ante ts'anis, lhamel hiw'en carpa tä wuj tä yen Dios lew'eta, tä lham ne'tek õyenlhi hätet iwoye lepeyak tä ipäyne p'ante Moisés. ₄₅Tä paj lhachätilistso yen lewuhuya leles häp huptso. Wet lhamel ichäj lhamche tä nekche p'ante Josué wet isoyej honhat häp wichi iyhäj tä Dios yokwes kanhihlä. Häp tä mälhyejtso yäk nichäte fwalas tä David ihi p'ante. ₄₆Wet tä lham hiw'en tä Dios ihumin wet hip'altsen, t'alhe Dios tä lham t'uhläk yenlhi hup yämlek häpe Israel lhayis len'okhayajw'et. ₄₇Mat lhamhit'ak yenlhi Dios Lew'et. Elh tä yenlhi p'ante häpe Salomón.

₄₈“Matkat Dios tä naj letumfwaya yenhit'a lew'eta hup tä n'otkwey lhenek. Mälhyej lhämet tä ihi profeta lesaynek tä yok:

₅₁Wet Esteban nech'e yäm äytajejche lhämet consejeros tä yok:

–¡At'unhen amel! ¡Hach'otey ihi, mat letach'ahuhiyet'a Dios lhämtes! ¡Wet ahusey mälhyet iwoye wichi iyhäj lehusey tä nitäfwelayej Dios! ¡Letataypejlä Espíritu tä Dios T'amajchet, hätet iwoye achätilis p'ante! ₅₂¿Atsi profeta tä iche tä achätilis niwoya laka'tshayajayej? ¡Ihichet'a! Tsi lhamel ilänhen p'ante iyhäj tä itoyenlä häp Elh tä Is Alhoho, wet tä äp näm Hin'otso, amel lhachajay wet lelänay. ₅₃Häp amel tä õhw'en amhohen Dios lhämtes p'ante häp tä isej ángeles, ¡mat lewohiyet'a!

₅₄Tä lhamel iläte m'ayhaytso, lhäy'e lhip tä fwitses, wet yokwajejwek letsotey lewäk tä nichuwete Esteban. ₅₅Mat Espíritu tä Dios T'amajchet tapoyejej, wet iyahin puleye wet hiw'ene Dios lesilatyaj, lhäy'e Jesús tä takasthi Dios lefwomkat. ₅₆Wet yok:

–¡Lhek yahinay! Ow'en pule tä lhaich'enhi, lhäy'e Hin'o Lhäs tä takasthi Dios lefwomkat.

₅₇Mat lhamel hip'okwe'pe lech'otey wet ifwitsenej tä t'änhen, wet lhailhokonejwek tä inuye Esteban ₅₈wet äp ihutej kanhihlä hupuy. Wet tä yäm kanhi, lhamel tä y'ithatejlhi letes nech'e ilanche lhamel lew'uyis tä tumphä wet itiwhäye häp mamse tä lhey Saulo yämlek t'uye. Wet ithatejlhi tuntey häp Esteban. ₅₉Tä iwoynejetso, Esteban iwo t'alhyaja wet yok:

–Iwuk Jesús, chumlä ohusek.

₆₀Wet nech'e itihi honhat lakamchetey, wet ifwitsenej lechos wet yok:

–Iwuk, yej lhen tesayej lhamel lesukyajna.

Häpet tä iwoyetso, wet y'il.