Amós 3

₂“Ts'ilak amel tä ottshupihte amehen

tä lhewej wichi tä ihonhatena.

Häp tä tamenej tä omenyenla amejen

hach'isukyajay tä lewoyaye,

wet otihla amejen otasnhayaj.”

₃Chik iche täkwfwas iyhäj

tä lhaip'ajtitwek tä yikhen,

häp tä y'ajejwek m'ak tä lhamel t'uhläk iwoye.

₄Wet chik y'ip hay'äj tä ihi tayhi,

häp tä isakanej lelänek.

Wet chik lhäs tä ihi chowej tanhätinlhi,

häp tä ikatej lhäk.

₅Wet chik afwenche nichät honhate,

häp tä iche hin'o tä tiyäj.

Wet chik nämhi n'okalnaj tä ihi niyäk,

häp tä iche m'ak tä t'äsi.

₆Wet chik pitsaje tson'ataj ch'u

tä õyafwutche, wichi nowayhen.

Wet chik iche m'ak chik ni'isak nichätpe wichi,

häp tä Lhawuk t'at tä ichen.

₇Wet Lhawuk Dios ihichet'a m'ak chik iwoye

chik nichunkata lakawos profetas tä ifwenhomche.

₈Chik hay'äj y'ip, wichi nowayhen.

Wet häp tä mälhyej'attso,

chik Lhawuk Dios iwo lhämeta,

lakawos yen silätyaja lhämtes.

₉Enay silätyaja täja, fwenhomche

niyatey tä ihi Asdod lhäy'e Egipto, oyaykwe:

“Lhuyay hoyaype chenhas tä ilunej Samaria,

wet yahne wichi tä ihi tä iwoyej lhamehen

m'ak tä ni'isa wet tek lhaip'altsenhen.”

₁₀Lhawuk yok:

“Ihanhiyejt'a yämlek iwoye m'ak tä is alhoho.

M'ak tä t'amajej tä ichechufwi lewukwey

häpe t'at m'ak tä isoyejwethä wichi,

tsi matche tä fwitses lhamel.”

₁₁Tä mälhyejtso, yokwe häp Lhawuk Dios:

“Atayhfwas ilunhiyeja aka honhat wet iwasthihila hupuy

tä hin'ol tä takhajayhen tä õy'uhyene honhat ihiche,

wet tachumhiyela nilhokej m'ak

tä ihiche aka niyatey lewukwey.”

₁₂Wet Lhawuk äp yok:

“Lhek tetshan t'owalhaj,

chik tuj tson'ataj, noj t'at,

tajlhamat takäläy wok lech'ote lhip

tä lewo isoyej t'owalhaj.

Mälhhiyejattso lewit'äyhyaj

häp Israel lhayis tä lew'et Samaria,

häp lhamel tä imäkwe'pe

n'ow'etes tä isis tä tälhe Damasco.

Tajlhamhiyelat iyhäjfwas chik tafwayhen.”

₁₃Lhawuk Dios tä lajit letumfwaya yokwe:

“Ch'ahuyay n'oye, enay ämeta

m'ak tä ni'isa tä Israel lhayis iwoye.

₁₄Ifwala chik otasnhila Israel lhayis,

häp lech'isukyajay tä tamenej,

owasthihichela altares tä ihi Betel,

oyisthihena lech'ul

₁₅Wet otäyhthila n'owukwey tä wichi ichufwi

häp lewhäy tä fwiy'et,

lhäy'e lewukwey tä lhamel ichufwi

häp lewhäy tä nahayofw.

Owasthihichela lewukwey tä isis,

wet lhamel tä hiw'en m'ayek lew'etes nemla iche.

Olham tä ohäpe Awuk Dios olhämet täjtso.”