Amós 5

₁Ch'ahuyaye olhämtes

tä owoyej amehen, Israel lhayis,

tä oyok, Ap'elitses t'at.

₂Israel tatäy wet noj lesilatyaj,

wet tek neyhiphäla.

Tä nichätpe laka honhat,

wet nehit katsik ineyhthiphäla.

₃Yokwe Lhawuk Dios tä tahuyej Israel lhayis:

“Chik niyat ichen mil laka nifwotaj

yämthilek iwo laka'tshayaja,

tajlhamhiyelat cien chik tapil.

Wet chik ichen cien,

tajlhamhiyelat diez chik tapil.”

₄Yokwe Lhawuk tä tahuyej Israel lhayis:

“Hoyay n'oye häpkhilek kat'ilahen.

₅Yej hoyaye Betel, wet yej tiyäjo Gilgal,

wet yej nukwe Beerseba.

Tsi wichi tä ihi Gilgal

wohit'ala m'ak chik isej,

õ'hänhiyela honhat tä kalew'eta,

wet Betel häpkhilek tatäy.”

₆Hoyaye Lhawuk häpkhilek kat'ilahen.

Mat chik kawoyaye täjtso,

nichätla atapehen tet iwoye itätaj,

wet iwunhihola Betel, wet nehit katsik y'omatla.

₇¡Awit'äy ihi,

amel tä lhenay häpeya m'ak tä ni'isa

häp m'ak tä is alhoho wet lethat katsi!

_8-9Ukwe häp lham tä lhenek

pätselhay lhäy'e katetsel iyhäj,

wet inuhatphä ifwala

wet noj t'at honatsi wet n'älpe honhat,

wet äp ne'tek y'uy ifwala

wet nech'e honatsi t'at.

Häp lham tä t'äne inät

tä ihi lewomekitaj wet itsäype honhat,

wet ichätyenpe lewit'äyhyaj

häp hupuy tä takhajayhen wet tatäy t'at.

Häpe Lhawuk, häp täjtso lhey.

₁₀Amel len'äyiho hin'o tä iwoye m'ak tä is alhoho,

wet let'ulhan elh tä yen lhämeta m'ak tä matche.

₁₁Lhenay w'et m'ayhaya wichi tä p'elitses,

wet let'alhe'pe impuesto häp lechumet lhay.

Tä mälhyejtso, tej tä lhenwethä

awukwey tä isis tä tuntey,

mat tek lheyayhlachufwi.

Wet tej tä letihchä uvas,

mat tek leyähiyeja hat'es chik tälho.

₁₂Olham wuj tä ontäfwelejen

m'ak tä wuj tä ni'isachehen tä lewoyaye,

lhäy'e hach'isukyajay tä laj lepesa.

Lelhaklit wichi tä isen,

wet tek letach'otaye wichi tä p'elitses

chik ihi n'okalelhthayajw'et,

wet letachumlä m'ak tä õ'känitlhi amej.

₁₃Häp tä tamenej tä hin'ol tä lehusek ihi tahuyhit'a,

tsi häpe t'at lewhäy tä ni'isa.

₁₄Mälhetwek tä lewoyaye m'ak tä is

wet yej woyaye m'ak tä ni'isa, häpkhilek kat'ilahen.

Wet chik mälhyejtso, mathichela amel ämet

tä lhäme tä Lhawuk Dios tä lajit letumfwaya i'amejen.

₁₅¡N'äyiho m'ak tä ni'isa

wet humin m'ak tä is!

Achajo tä lekhajyen m'ak tä is alhoho

tä ihi n'okalelhthayajw'etes.

Wet chik lewoyaye täjtso,

elat Lhawuk Dios tä lajit letumfwaya

itihiyeja lep'altsenyaj

häp Israel lhayis tä imälhehi.

₁₆Tä amel lewoyepej m'ak tä ni'isa,

wet häp tä Lhawuk Dios tä lajit letumfwaya yokwe:

“Wichi tafwichelahchä atapehen

chik ihiche lhipey tä ischephä,

wet t'änlawethä chik ihiche hupuy kawayhil.

Wet õt'änhiyela iyhäj tä ihiche lakäsw'etes,

õne'tehlak ileyej lechumtes wet lhaip'ajtej

atsinhay tä tafwlhi atapehen chik awit'äy ihi.

₁₇Wet ihichela n'olhafwyhayaj

tä ihiche n'olafwey tä uvasw'etes

chik olham onukwe lechowej amel

wet oti amejen otasnhayaj.”

Häp täjtso Lhawuk lhämet.

₁₈¡Awit'äyhyaj i'amejen,

amel tä lekelayej Lhawuk laka ifwala chik näm!

¿Hä lehanej m'ak tä ihla amejen chik näm?

Ihichela honataj wet nemla isi.

₁₉Hätehlat iwoye hin'ok fwetaj inu alhoho

chik nowaye t'owalhaj tä fwitsaj,

mat nichutej sulaj.

Wok fwetaj itsoke lewukwe lhip,

mat amlhäj tä ihi yokwaj.

₂₀Oyok matche,

Lhawuk laka ifwala häpkhila honataj,

wet ihichet'ala m'ak chik isihla.

₂₁Lhawuk yok:

“Olham on'äyiho wet owohit'a lahaya

amel akäjyaj tä lewoyepej tä lhen han'okhayaja,

wet tek okäjejlhi tä alehutpejwek.

₂₂Tek owatlä itshätäy tä lewunhomche

tä lefwetajay lewunitn'o, lhäy'e akäs lhay,

wet tek otchumlä w'asetaj leles tä yätajen

tä lefwetajay lekänitlhi n'oyej

yämthilek ale'isyen n'oye.

₂₃¡Tonte n'ohlä apakas tä let'ichoywethä

tä lefwetajay lewunitn'o!

¡Tek owatläk oläte aka música!

₂₄Mat is chik n'o'isyaj hätet iwoye inät tä iläfwelche,

wet n'ohumnhayaj is chik hätet iwoye ts'ifwik,

ihanhiyejt'a chik y'im.