Lhawuk ipäyne Amós lew'enek tä ichun tä häpe chol
1Lhawuk Dios ipäyen n'oye täja. Pajche õ'lanhi yachuyaj lhip tä lewuk rey, wet nech'e äp yachajo tä tälh letälhes. Wet ow'en tä Lhawuk ihutwek chol, 2wet tä lhamel ihämit hal'ä tälhes tä ihi honhat, wet oyok:
–¡Iwuk Dios, olhaip'altsen ame, täyhat n'oyejen otes! Tsi nofwiyeja aka wichi Israel, häp tä nitkhajayahen.
3Wet matche, Lhawuk ileche m'ak tä fwetaj iwoye wet yok:
–Oleche.
Lhawuk ipäyne Amós lew'enek elh tä häpe itätaj
4Wet Lhawuk Dios äp ipäyen n'oye täja: Ow'en tä ichen letasnhayaj tä häpe itätaj, wet nichätho lewomekitaj tä ichufwi honhat wet y'im, wet hip'o honhat. 5Wet oyok:
–¡Iwuk Dios, woye tä owoye, mälhteji! Tsi nofwiyeja aka wichi Israel, häp tä nitkhajayahen.
6Wet matche, Lhawuk äp ileche m'ak tä fwetaj iwoye wet yok:
–Äpte oleche.
Lhawuk äp ipäyne Amós lew'enek elh, häpe n'ochumetcha tä itshupyenchä hup
7Wet Lhawuk äp ipäyen n'oye täja: Ow'en tä lham iwhäye hup, wet n'ochumetcha tä itshupyenchä hup ihi takwey. 8Wet tay'ätshan n'oye wet yok:
–¿Atsi m'ak tä lew'en, Amós?
Onchulho wet oyok:
–Ow'en n'ochumetcha tä itshupyenchä hup.
Wet lham nichulh n'oho wet yok:
–Häp n'ochumetchana tä hin'o tä yenlhi hup ichumyenlhi, häpkhilek oyen lechaya oka wichi Israel, wet n'änhila m'ak tä ni'isa alhoho tä iwoye, hätet iwoye hup tä nitshupiyahchä. Tek otäyhthiyeja letes, noj tä oteläytej lhamel. 9Wet Israel lhayis kan'ohusew'etes nofwila, wet len'okhayajw'etes tä iche'pe chenhas wasihichela, häpkhilek lhamel nemhit ihoye. Wet otäyhthila häp rey Jeroboam lhäy'e leles häpkhilek nofwej.
Amós tatayhlä Amasías
10Häp sacerdote Amasías tä ihi Betel ichene lhämet Jeroboam tä häpe Israel lhayis laka rey. Wet yok:
–Amós iyej Israel lhayis wet tatay ahilä. Wet matche tä ilänej lhämtes häp wichi. 11Wet yopejkwe, “Y'inhila Jeroboam, õ'länla, wet Israel lhayis õ'hänhiyela honhat tä kalew'eta wet õyenla kwenkaya.”
12Wet tä tajyäme tä Amasías iwoynejetso lhämet tä ichene niyat, wet tahuyej Amós wet yok:
–¡Mäch'oye täja, profeta! ¡Chik let'uhläk lekalhi akaha tä ahäpe profeta, äple Judá wet woye achumet! 13Mat yej woye achumet tä lhehi täja Betel, tsi niyat t'amajchet wet n'ohusew'et tä lhamya.
14Mat Amós nichulho wet yok:
–Ohäpkhit'a profeta, wet n'am fwetajit chik ohäpe. Ohäpe t'at hin'o tä t'uyet tson'atas, wet häp tä okalhi m'ak tä otufw, wet otufw at higos tä iche tayhi. 15Mat Lhawuk iso n'oyej tä ot'uye tson'atas wet ifwel n'oho tä yok, “Hoye oka wichi Israel lhayis wet fwenho olhämet.”
16“Wet häp tä athana ch'ahuye olhämet, Amasías, tsi Lhawuk lhämet t'at. Am lhok, Yej lhäme Lhawuk lhämet tä tatayhlä Israel lhayis, wet yej womejphä ämet häp lhamel.
17“Mat ofwel amho tä Lhawuk lhämet t'at tä oyäme tä yok, Hach'efwa iwohla lakain'oyajahi hupuy yämthilek hiw'en m'ak chik isej, wet ales õ'länhihena, wet atayhfwas hiw'enla lhamhomche aka honhates, wet am hap'itsek ihihila honhat tä õ'hän ame, wet Israel lhayis õyenla kwenkaya wet õ'hänhiyela honhat tä kalew'eta.”
