Col 1

_1-2Amtena ipuhfwas tä Dios aleles tä let'ifwtiyej Cristo tä lheyayhi hupuy tä Colosas. Olham Pablo ohäpe Cristo Jesús laka apóstol, wok oyok, lakachenhay tä lhamenya elh, tsi häpe t'at täjtso Dios lenech'ethayaj. Wet olham lhäy'e n'aelh Timoteo ochen amehen olhämetna.

Is che Lhajcha Dios lep'altsenyaj lhäy'e atamsek i'amejen.

₃Tä olhamel owopej ot'alhyaja atapehen, ow'enhopej oka gracias Dios tä häpe Lhawuk Jesucristo Lajcha. ₄Tsi olhamel otoynej amehen tä wuj tä let'ekhaye Cristo Jesús wet wuj tä lehumin nilhokej Dios laka wichi. ₅Häp ekhahyaj lhäy'e ahumnhayajna tälhe t'at aniwhayaj tä kalelhäj. Tsi tä letach'ahuyaye p'ante Dios lhämet tä matche tä häpe Lesilätyaj tä Is, wet tälhe ifwalatso leniwhitlä m'ak tä Dios pajche iwaklhat amhohen tä ipuleye.

₆Häp Dios Silätyajtso tä nichät p'ante amehen, n'äl tä lhaichihelit wet iwo lhaya tä iyejen wichi tä nilhokpe honhat, mälhyet iwoye tä i'amejen tälhe tä letoyneje Dios tä hap'altsentsaj wet äp letäfwelej tä matche t'at tä lham ahip'altsenhen. ₇Häp elh tä ichufwente amejen m'ayhayna häpe t'at Epafras, wet amel kamaj wuj tä aisej n'aelhtso tä häpe olhamel och'otfwa tä ohumnek wet äp Cristo lakawo tä afwtintsaj. ₈Lham t'at tä ifwelnaj n'ohohen häp ahumnhayaj tä tälhe Dios laka Espíritu tä i'amhiche.

₉Tä mälhyejtso, tälhe häp ifwala tä olhamel ohanch'oye tähestso, olhamel olehiyejt'a tä oy'alhyenpej amehen Dios, yämthilek hiw'en amhohen nilhokej m'ak tä ahusey iwatläk nitäfwelej wet ihanej, häpkhilek lhäy'e lhip tä letäfwelayej Dios lenech'ethayaj. ₁₀Che mälhyejtso, lewohiyepeja m'ak tä t'uhawet amejen tä ahäpehen Lhawuk leles, wet lekänithilhipeja tä lewo aya tä tälhe nilhokej achumtes tä isen, wet lhäy'ehipeja lhip tä letäfwelayej häp lham. ₁₁Is che lham ikhajyen amejen nilhokej lakhajyhayaj tä lhäy'e lhip tä wuj, häpkhilek newache m'ak che ikalh amhihen wet tek lelhak'alwethä, mat atamsekis ihi t'at. ₁₂Wet a'akäslawethä wet lewohla graciasayej Lhajcha tä ayen häpeya wichi tä t'uhawetej tä tachumlä m'ak tä lham t'amajejo leles tä ihi isi. ₁₃Lhajcha ifwayhatte n'amejen honataj lakhajyhayaj, wet y'ayhet n'amehen häp Lhäs tä lehumnek Leniyatyaj, ₁₄häp lham tä lhayen lahaya tä itäyhat n'amejen lhasukyajay.

₁₅Häp Dios tä nin'äla, häp tä lepeyak Cristo, Dios Lhäs tä Lechunkatsek tä kamaj newache nilhokej lhenhay. ₁₆Häp tä isej lham, Dios yenlhi nilhokej m'ayhay, häp m'ak tä iche puleye lhäy'e honhat, häp m'ayhay tä n'äl lhäy'e tä nin'äla, tej tä n'okhajyhayajay tä iche tä kaphä tä häpehen n'owujyajay lhäy'e n'on'ohyajay. Häp tä isej lham, Dios yenlhi nilhokej m'ayhay yämthilek lham tä Lewuk. ₁₇Lham pajche iche t'at tä kamaj newache m'ayhay, wet äp lham t'at tä t'amajchä nilhokej.

₁₈Häte häpe Dios leles lhetek. Häpe N'ochunkatsek, wet äp häpe elh tä ichun tä inuphä tä tälho n'op'itseyhay yämthilek häpe t'at Niyat tä Lhamya. ₁₉Dios ihumin tä lhaimälhetwek tä yen lew'eta Cristo, ₂₀yämthilek isej tä inachaj lhame nilhokej m'ayhay tä iche puleye lhäy'e honhat, häpkhilek letamsekis iyeji, häp tä isej Cristo lew'oyis tä itsäyhchä tä ihi cruz.

₂₁Fwalas tä pajche amel ahäpehen wichi tä nitäfwelayej Dios tä matche, wet ihi ahusey tä letatayhlä Dios tsi lewoyaye t'at m'ayhay tä ni'isachehen. ₂₂Mat athana Dios ainachaj lhame wet ahip'ajtit lhamej, häp tä isej Cristo t'ilek, yämthilek ahäpehen iyhäj tä t'amajchetes, lhäy'e tä naj lech'ohleya, lhäy'e tä najit letesa, che lheyayhi tä lham tatache. ₂₃Mat iwohiyet'ak katujlhayache ekhahyaj, yej letats'in, at'untejiche, wet yej aleyatchenejwethä aniwhayaj tä tälhe Dios Silätyaj tä pajche lelätaye. Häp Lesilätyajna õ'wo silätayej nilhokpe honhat, wet olham Pablo häp tä Dios yenn'o lewoyayej.

₂₄Athana okäjlhi tä oteläythayaj in'oyej atapehen. Tsi tä mälhyejtso tä ot'isan leteläythayaj ihi'pe Dios leles tä häpe Cristo t'isan, wet nech'e nilhok Cristo leteläythayaj p'ante, niwohit m'ak che tatäyej. ₂₅Wet Dios yenn'o lewoya amejen, wet t'ekhayej n'oye lechumet tä oyen silätyaja amejen häp lham lhämet tä imälhewek, yämthilek amel aisej. ₂₆Häp täja häpe Dios leskalhek tä nilhokej fwalas tä pajche iskatho wichi, mat athana hin'ältej t'at häp lham leles. ₂₇Tsi Dios t'uhläk ihantejen lhamel tä lham letichunhayajtso tä pajche iskat, häpe t'at m'ak tä lhäy'e lhip tä is, häpkhilek wichi tä kahäpeya Judío lhayis isej. Wet leskalhektso tä nech'e hin'älit häpe täja, oyok, Cristo i'amejen. Tä mälhyejtso, Dios lewujyaj ihlat amejen.

₂₈Häp lham Cristo olhamel owo silätayej nilhokej wichi, wet oyämhopwethä lhamel, oisej nilhokej ohanyaj tä tälhe Dios yämthilek ochufwenejen. Tsi ot'uhläk nilhokej lhamel niwohit m'ak che tatäyej t'ekhahyaj, mat is che Dios hiw'en tä wak'alh wet lhamel hap'akej t'at häp Cristo. ₂₉Häp tä tamenej tä olham lhäy'e lhip tä otchumlhi wet owo olhäkleyhyaja, olhaikhajyenejpej häp Cristo lakhajyhayaj tä wuj tä in'ohi.