1“Wet tä nekchäm tä ichunte tä Medo lhayis laka rey Darío ihi t'at leniyatyaj, wet olham okalhihte tä otch'ote häp ángel Miguel.
Rey tä tälhe Siria wet elh tä tälhe Egipto
2“Athana otäfwnhat amej m'ak tä matche. Kamaj ihichela tres reyes tä niyatejpej Persia. Wet chik tafwaytshi täjtso, wet ihichela elh tä wuj m'ak tä hiw'en, wet yen at lakhajyhayaja m'ak tä wuj tä iyej, inuhla'pe iyhäj tä ichun naji. Wet inityenhiyeja wichi yämthilek tatayhlä häp n'oniyatyaj tä ihi honhat tä Grecia.
3“Chik paj äp ihichela elh rey tä matche tä nifwotajcha, leniyatyaj w'awulhila'pe honhat, wet iwohiyela m'ak tä lham t'at tä letichunhayaj. 4Mat chik wak'alh leniyatyaj, wet w'enhahichela cuatro lhipey. Wet leniyatyajtso y'ajiyet'ala leles tä lepes lheley, wet nemhit lakhajyhayaj ihi, nemhit häte iwoye tä ichun. Tsi häp tä õhch'esajen leniyatyaj wet iyhäjlak icheyäjo lew'et.
5“Wet rey tä niyatej honhat tä Egipto nech'e äp lakhajyhayaj ihihila. Mat elh laka sip'äl lakhajyhayaj inuhla'pe rey lakhajyhayaj, pajla'tha leniyatyaj w'awulh'atpe honhat. 6Chik tafwaytshi iyhäj nekchämis, wet Egipto laka rey lhäy'e häp rey tä niyatej honhat tä Siria, lhamel iwohiyeja lhamehen lhämtes tä isit'ak lhayen letayhfwasa. Wet Egipto laka rey hiw'enhihola lhäse häp Siria laka rey yämthilek yen lech'efwayapa. Mat pitajit'ala lewhäy chik nemhit tataywek häp n'oniyatyajaytso, wet äp õ'länhihena häp atsinhatso, lhäy'e lhäs, lhäy'e häp hin'o tä lech'efwa, lhäy'e lakawos.
7“Chik paj ihichela wichi tä atsinhatso lew'et lhele elh chik lhayen niyata. Wet tatayhlahlä häp Siria laka rey kanifwotas, wet tiyäjihola hup tä takhajay wet ikalhihila letayhfwas. 8Wet ichäjiyela laka honhat Egipto häp laka dios lhayis tä häpe lecheyälis tä chinaj, lhäy'e iyhäj m'ayhay tä oro lhäy'e plata. Wet ilehiyeja tä iwo ka'tshayajayej Siria laka rey, pajla'tha nekchämis iyhäj. 9Wet nech'e Siria laka rey inuhiyela Egipto, wet chik ileyej, yäpnhiyela laka honhat.
10“Chik mälhyej'attso, Siria laka rey leles lhaiwaklhathihena chik yenlhi laka'tshayaj. Wet chik wak'alh laka nifwotas tä wuj, wet elh lhamel lhäy'e laka sip'äl inuhiyela niyat tä lew'et Egipto wet iwasthichela nilhokej m'ak tä ihi len'äyij, hätehlat iwoye tewok tä t'ulhpe honhat. Wet yachajiholak inuye, pajla'tha nichäte hup tä takhajay. 11Wet Egipto laka rey lhäy'ehila lhip tä fwitsaj, wet inuhiyela Siria laka rey kanifwotas tä wuj, wet ikalhihila. 12Chik ileyej, lhaichäjilhila, iwohla lakäjyaja'pe letayhfwas p'itseyhay tä wujpey. Mat nofwila t'at lakäjyaj.
13“Wet matche, Siria laka rey ihutlawek laka nifwotaj, lhäy'e lhip tä wujpa, nemhit häte iwoye laka nifwotaj tä ichun. Wet chik tajyäme nekchämis iyhäj, wet yachajihola tä laka nifwotaj inuye rey tä niyatej Egipto. Nifwotajtso nitäkwla wet äp nilhokhiyeja tä ichäjwethä laka'tshayajchal. 14Wet ifwalastso wujla'pe wichi chik tatayhlä häp Egipto laka rey. Wet hin'ol tä ka'atännhatsesa tä iyej am aka wichi, lhamel äpte tatayhlahlä häp niyattso, fwetajla yäm matche m'ak tä õhn'ältej lhamel tä ihi lew'enek. Mat lewit'äyhyaj ihihila. 15Wet Siria laka rey nämla wet yenla t'äsawtesa honhat tä ilunkatejlhi hupuy lelafwek tä tuntey häpkhilek inuye. Wet Egipto laka rey kasip'äl tek tumlahlä. Tej chik lhamel matche tä t'otle t'unhen, mat tek lhaikhajyenlahlä. 16Wet Siria laka rey iwohiyejela letayhfwas m'ak tä lham ihuminche, wet wohit'ala elh chik tatayhlä. Ihihila Honhat tä Isilataj, wet lhayenla lewuka yämthilek iwasthi.
17“Tä mälhyej'attso, lhayämla wak'alh yämthilek ikalhi nilhokej honhat tä lewuk häp Egipto laka rey. Wet iwohiyejela lhämet tä nemhit is chik lhayen letayhfwasa, wet hiw'enhihola lhäse rey häpkhilek yen lech'efwaya. M'ak tä tamenej tä iwohiyela täjtso, häp tä pajla'tha iwasthi leniyatyaj. Mat ikalhihit'ala. 18-19Wet äp tatayhlahlä wichi tä yen lew'etesa honhates tä iwhäye lewomekitas, wet wujla'pe lhamel tä lham lhayenla lewuka. Mat häp sip'äl kaniyat nämla tä tälhe honhat elh, wet inuhiyela häp reytso wet ikalhihila. Ilehthiyeja tä lhaichäjlhi, iwohla lahaya m'ak tä ni'isa tä iwoye, häpkhilek len'äfwlhi ihi wet yäpil, ilethane laka honhat. Mat lewit'äy ihihila, wet lepes t'at.
20“Wet elh rey icheyäjihola lew'et, wet ichenla'pe honhat häp hin'o tä t'alhpe impuestos pajla'tha wuj m'ak tä hiw'en. Mat chik tajyäme ifwalas iyhäj, õ'weskathiyeja tä õ'län häp reytso, ihihit'a n'oka'tshayaj, wet wichi tek hiw'enhiyeja.”
Siria laka rey tä hich'atej tä ni'isa
21Wet elh tä lew'uyis ipelas äp yok:
–Chik tafwaytshi niyat tä oyämetso, ihichela elh tä hich'atej tä lakey ihi, t'uhawethiyejt'ak reypa. Yohifwajakwet chik näm, ichumyenhilhila t'akanyajay häpkhilek tiyäjo leniyatyaj. 22Itäyhthihena nilhokej wichi tä fwetaj tatayhlä, pajla'tha nofwej. Wet ilänla hin'o tä õyen lewoyayej Dios lhämtes tä iwoyeje laka wichi. 23Wet reytso tahuyhiyeja niyatey iyhäj wet yohlak, “Is chik iche lhalhämet tä isit'ak n'alhaletayhfwas.”
“Matlak wak'alh, ikanhiyejena lhamel. Wet tej chik niwuja'pe wichi chik yen lehäneka, mat lhäy'ehila lhip lakhajyhayaj. 24Wet chik niwohit elh chik ihanlä, tiyäjihola honhat lhip tä hiw'en m'ayek, wet iwohiyela m'ak tä niwohit elh lechätilis chik iwoye. Hiw'enhihomchela laka sip'äl häp m'ak tä wuj tä isoyej letayhfwas tä ihi laka'tshayaj, wet iwaklhat tä inuhiyela häp hupuy tä takhajayhen. Mat pitajit'ala lewhäytso.
25“Wet lhaikhajyenla, t'otle t'unhila, wet ihutlawek laka nifwotaj tä wuj häpkhilek inuye häp Egipto laka rey. Wet Egipto laka rey lhamtej ihutlawek häp nifwotaj tä wuj wet äp matche tä takhajay, wet tatayhlahlä häp Siria laka rey. Mat õ'kanhiyeja, wet häpkhilek nikalhahi letayhfwas. 26Wet lhamel tä t'äne yämthilek tachufwiyejpejwek lhäk tä ihi lham lew'et, häp lhamel t'at tä iwit'äynhila, häpkhilek tatäy laka nifwotas wet nitäkwla sip'äl tä y'inhen.
27“Wet reyestso lhamel t'uhlahläk iti lhamejen lewit'äyhyajay. Tej tä lhamel tachufwihiyejawek tä t'ekhen, mat elh yämhiyela m'ak tä kamatache, elh häte iwoye. Mat wohit'ala m'ak chik lhamel isej, tsi Dios t'at tä y'ithat lewhäy chik nichäte lakapes. 28Wet Siria laka rey yäpnhiyela laka honhat wet ichäjla m'ak tä wuj tä itälhtho laka'tshayaj. Wet tatayhlahlä Dios lhäy'e laka wichi tä t'ekhaye, wet iwohiyela m'ak tä iwoye. Wet chik tafwaytshi täja, nech'e matche tä yäpnhiyela laka honhat.
29“Wet chik nichäte lewhäy, yachajiholak inuye honhat tä Egipto. Mat ikalhihit'ala, hätehit'ala iwoye tä ichun. 30Tsi Romano lhayis nekhichela laka barcos wet tatayhlahlä, häpkhilek t'ayhchä lakhajyhayaj. Wet matche tä fwitsajila, wet yäpnhichela len'äyijnaj tälhche, wet t'uhlahläk itäyhat häp Dios lhäy'e laka wichi tä t'ekhaye. Wet tä fwetaj iwoynejetso, isiyeja wichi tä akachuhantses tä ileyej Dios.
31“Wet laka sip'äl tiyäjihola Dios Lewukwe lhäy'e hup tä takhajay, wet ikänchihla häpkhilek nemhit n'ot'amajchetes. Wet lhamel ilehthichela wichi chik yen n'okhayajayej Dios häp itshätäy tä õ'länhen ifwalapej. Wet lhamel itihihla Dios Lew'et häp m'ak tä tanhowatnhan tä hich'atej tä ni'isa. 32Häp reytso iwohiyela lhämtes tä akäschehen yämthilek ikanej wichi tä akachuhantses tä pajche ileyej Dios. Mat häp wichi tä ihumin Dios wet nileyayej, lhaikhajyenlahlä.
33“Wet lhamel tä ahantses tä iyej wichi, ichufwenhiyeja lhamel m'ak tä is chik iwoye. Mat õ'länhihena lhamel, wet õhp'ohenla t'at, wet õt'etanhiyehena m'ak tä lhamel hiw'en, wet lhäy'e tä õyenla kwenkaya tä lhamel ihi honhat tä kalew'eta. Tha häp täja õ'wo lewhäyapa. 34Wet chik nichäte lewhäy tä n'olänyajaytso iyej, ikathiyeja lhimphaj n'och'otyaj. Wet tejlak wuj iyhäj tä lhaip'ajtej lhamel, ts'ilakhila m'ak tä lhamel lenech'ethayaj. 35Wet õ'tihiyeja n'olhelhtshayaj häp iyhäj lhamel tä ahantses. Õ'thahyenla t'at len'äyij, häpkhilek lhainech'aynhi wet isen, pajla'tha nichäte lewhäy tä lepes tä Dios y'ithat.
Siria laka rey matche tä lhaichäjilhila
36“Wet Siria laka rey iwohiyela m'ak tä lham ihuminche. Lhaichäjilhila wet lhaiwujyenla'pe nilhokej dios lhayis, wet iwohiyela lhämtes tä n'oläkwyhanyaj tä iyeteje Dios tä matche. Wet isila alhoho len'äyij, pajla'tha Dios itiyej letasnhayaj. Tsi häp tä m'ak tä Dios iwoye, wet yenlhi t'at. 37Häp reytso nemla itetshan häp lechätilis laka dios lhayis, wet nemla itetshan häp dios tä atsinhay n'okwiyej. Ihichet'ala dios chik häpe chik lham yenla tichunhayaja, tsi häp tä lhaiwujyenla'pe nilhokej. 38Mat n'okwihiyeja häp dios tä t'uye hupuy tä takhajayhen. Wet tej tä lechätilis nitäfwelayej häp diosna, mat rey ifwenhihola laha tä oro lhäy'e plata, lhäy'e tuntey tä laha ihi, lhäy'e iyhäj m'ayhay tä wuj laha. 39Wet ikalhihila hupuy tä takhajayhen, häp tä isej dios tä w'enha lhamejna. Wet hiw'enhihola lewujyaj nilhokej hin'ol tä iwujyen häp lham rey, wet äp yenla niyateyayej wujpe wichi, wet hiw'enhihola lakaha tä häpe honhat lhipey.
40“Wet chik nichäte lewhäy tä lepes, wet Egipto laka rey yachajihola tä yenlhi n'oka'tshayaj wet tatayhlahlä häp Siria laka rey. Tha häp tä Siria laka rey inuhiyela, hätet iwoye pelhay tä wuj, lhäy'ehila laka kaletas tä laka'tshayajchal, lhäy'e sip'äl tä iche'pe yel'atas, lhäy'e wujpe barcos. Wet wujla'pey honhates tä tiyäjo, hätehlat iwoye tewok tä t'ulhpe honhat. 41Häte lhamel tiyäjihola häp Honhat tä Isilataj wet ilänhenla wujpey wichi. Wet lhamel imälhthila häp Edom lheley lhäy'e Moab lheley, lhäy'e häp Amón lhayis laka honhat lhip tä wuj. 42Wet reytso lhayenla lewuka honhates iyhäj, wet nits'ilakhiyat honhat tä Egipto chik tafwayej lewit'äyhyaj. 43Wet ichäjla laka m'ayhay tä oro lhäy'e plata, lhäy'e nilhokej m'ayhay tä laha ihi tä lewuk häp Egipto lheley. Chik tefwaytshi, ikalhihila honhat tä Libia lhäy'e honhat tä Etiopía.
44“Mat nämla n'osilätyaj tä tälhe tä ifwala tälhche wet äp tälhe tä tafwojyhiye, wet istunla rey pajla'tha lechowej y'ilej. Mat chik paj, wet lhäy'ehila lhip tä lewäk ihi wet yikhila, nitichunhilahläk yäm wuj wichi tä ilänhen. 45Wet iwaklhatla lakasthawet tä lhamya tä õtälhe lewomekitaj chik õttaye chenaj tä Dios t'amajchet tä lesilatyaj ihi lechowejo. Mat lepesla t'at tä y'il, wet newache elh chik tach'ote.”
