Dan 3

₁Häp rey Nabucodonosor ne'tep'antek õyenlhi n'ocheyä tä oro, w'awulhej tä treinta metros tä atojphä wet w'awulhej tres metros tä tsajo. Wet ne'tek õ'neyhatphä tä ihi honhat lhip tä w'awulhchä tä lhey Dura tä ihi Babilonia lhip. ₂Tä wak'alh, rey t'änehen leniyatfwas, lhäy'e honhat lewos, lhäy'e gobernadores, lhäy'e hin'ol tä lehusey ihi wet lhämtes isen, lhäy'e häp chinaj t'äj lewos, lhäy'e n'okalelhthayajwos, lhäy'e nilhokej niyatey iyhäj. ₃Wet lhamel lhaihutwekhen, iwo käjyaja'pe rey lecheyä tä nech'e õ'neyhatphä. ₄Wet n'osilätyajwo ifwitsenej lechos tä t'än wet yok:

–¡Amel tä letälhehen honhates tä ayhil w'enhahiche, lhek ch'ahuyaye rey lhämet! ₅Chik lelätaye tson'ataj ch'ul lepakas, lhäy'e n'ofwolis, lhäy'e arpas, n'opumis, lhäy'e nilhokej m'ayhay iyhäj tä õ'wo lepakasa, iwohiyet'ak kat'upeyahchä honhate wet iwohiyet'ak kan'okwiyayej häp n'ocheyä tä oro tä rey ne'tek õ'neyhatphä. ₆Wet elh chik häpe chik nit'upeyahchä wet nin'okwiyayej, yohlakwet õ'thathiyela n'onhonthi tä itäj tä wuj ihi.

₇Häpet tä õ'läte nilhokej n'opakastso, wet nilhokej wichi tä tälhehen honhates lhäy'e tä lhayhil w'enhahiche, lhamel t'upechehchä honhate wet n'okwiyej n'ocheyä tä oro tä rey Nabucodonosor ne'tek õ'neyhatphä.

₈Wet häp ifwalatso nämhen han'ältshantses wet itiyej letes häp Judío lhayis, tsi wuj tä n'äyihomche lhamel. ₉Wet han'ältshantses tahuyej rey wet yok:

–¡Ika niyat, is chik leläy yämlek tiyäj'attsiy! ₁₀Am, ika niyat, ichenaj ämet tä lhok, “Nilhokej wichi chik iläte n'opakas, iwohiyet'ak nit'upeyahchä honhate wet iwohiyet'ak nin'okwiyayej häp n'ocheyä tä oro. ₁₁Wet chik iche hin'ol chik nit'upeyahchä wet nin'okwiyayej, kalelhäj õ'thathiyela n'onhonthi tä itäj tä wuj ihi.”

₁₂“Ika niyat, iche hin'ol tä Judío lhayis, lheyis Sadrac, Mesac, lhäy'e Abed-nego, tä lene'tek itetshan n'ochumet tä ihi lhaka honhat tä Babilonia lhip. Lhamel tach'ahuhit'a ame, tek n'okwiyej aka dios lhayis lhäy'e n'ocheyä tä oro tä lene'tek õ'neyhatphä.”

₁₃Tä rey iläte täjtso, wet wuj tä fwitsajlhipa wet yok:

–¡Chäj kana lhamel, Sadrac, Mesac, lhäy'e Abed-nego!

Tä lhamel nichäte rey, ₁₄wet lham tay'ätshane wet yok:

–Sadrac, Mesac, lhäy'e Abed-nego, ¿hä matche tä kan'okwiyayej oka dios lhayis wet kawoya lahaya n'ocheyä tä oro tä one'tek õ'neyhatphä? ₁₅Athana chik pitsajiyela n'ofwolis lepak, is chik amel len'okwiyej n'ocheyä. Wet chik kan'okwiyayej, yohlakwet õ'thatla amehen n'onhonthi tä itäj tä wuj ihi. Wet ihichet'a dios chik häpe chik ihanhiyeja iwoyneje chik ifwayhat amejen.

₁₆Sadrac, Mesac, lhäy'e Abed-nego, lhamelna nech'e nichulho rey, yok:

–Nemhit ohanej m'akna. ₁₇Olhamel ohanej t'at tä oka Dios tä olhamel on'okwiyejpej, häp tä ihanej iwoyneje tä ifwayhat n'oyejen häp itäj lhäy'e nilhokej m'ak tä tälhe akhajyhayaj. Wet ifwayhthila n'ohen. ₁₈Mat tej chik oka Dios nifwayhta n'oyejen, is chik lehanej, ika niyat, tä olhamel tek on'okwihiyeja aka dios lhayis lhäy'e n'ocheyä tä oro tä õ'neyhatphä.

₁₉Tä rey iläte täjtso, iwo tate'pe elha tä wuj tä fwitsaje häp Sadrac, Mesac, lhäy'e Abed-nego. Wet yäme lakawos wet yok:

–¡Lhänche n'onhonthi pajla'tha w'awulhej chik siete veces tä inu'pe lewhäypej tä chayo!

₂₀Wet tahuyej laka sip'äl tä wuj tä takhajayhen, ne'tek tachuma Sadrac, Mesac, lhäy'e Abed-nego, wet yäythen takweyey lhäy'e takäläy wet nech'e ithate n'onhonthi tä y'uho. ₂₁Wet sip'äl iwoye, yäythen hin'olna wet imälhetpe lakhäy tä n'otetnekej lechumtes tä ihi, wet ithate itäj tä wuj. ₂₂Lham niyat iwo lhämetayej n'onhonthi chik õyäm chayo, wet lefwak tä wuj tä chayo y'aje sip'äl wet äp y'ohen. ₂₃Wet Sadrac, Mesac, lhäy'e Abed-nego, nichätho n'onhonthi tä wuj tä chayo, kamaj t'akay ihiche t'at.

₂₄Wet rey nakel tä nephä tsi lhäy'e lhip tä leselthayaj ihi. Wet tahuyej lech'otfwas wet yok:

–Ontichunche olhämetne oyok, “Thatche n'onhonthi tres lhamelna.”

Wet lech'otfwas nichulho niyat wet yok:

–Matche, ika niyat, pajchene õ'thatche tres hin'ol.

₂₅Wet niyat yok:

–Ow'ene tä nech'e cuatro hin'ol, nemhit t'akay iyejen. Lhamel ilunhitwethä itäj lhal, niwohit m'ak chik iyej lhamel, lhamel tek y'ohen. Wet elh nichätche dios lhayis elh.

₂₆Wet nech'e rey lhayämte n'onhonthi lepe wet yok:

–¡Sadrac, Mesac, lhäy'e Abed-nego, Dios tä N'owujtaj lakawos! ¡Lhuu, nukwephä tä lhehi itäj, hoyay kana!

Wet Sadrac, Mesac, lhäy'e Abed-nego, lhamel inukwephä tä ihi itäj. ₂₇Wet lhaihutwekhen häp rey leniyatfwas, lhäy'e honhat lewos, lhäy'e gobernadores, lhäy'e hin'ol tä lehusey ihi wet lhämtes isen. Wet lhamel iyahinlhi hin'oltso tsi hiw'en tä newache lhip chik y'o. Nits'ilakhiyat lew'oley chik y'opa, lhäy'e lakhäy lajit lewit'äyhyaja, nits'ilakhiyat itäj lenij chik õ'lätche. ₂₈Wet rey yok:

–¡Nech'e owunit Dios tä Sadrac, Mesac, lhäy'e Abed-nego, lhamel laka Dios, tä ichen laka ángel wet ifwayhtej itäj häp lakawosna! Tsi lhamel t'ekhaye häp lham, iwohit'a lahaya ocheyä. Wet fwetaj is tä yachaje t'isanis häp itäj, isit'ak lhayachaje dios elh chik kahäpeya lhamel laka Dios. ₂₉Wet athana ofwenho olhämet häp wichi tä tälhehen honhates tä lhayhil w'enhahiche. Oyok, Elh at chik häpe chik itiyej lhämet tä ni'isa häp hin'olna laka Dios, õ'wohla lhipeya t'isan wet lewukwe õ'wasthihila pajla'tha lemok t'at. Tsi ihichet'a elh dios chik te iwoye tä ihanej iwoyneje chik ifwayhat laka wichi.

₃₀Wet rey nech'e hiw'enho lewujyajay tä ihi Babilonia lhip häp Sadrac, Mesac, lhäy'e Abed-nego.