Daniel yäme lefwilhekna tä häpe p'ante nekchäm tä nech'efwaj tä Belsasar iwo tesa leniyatyaj tä kamaj õkniläna
1Nekchäm tä ichun p'ante tä Belsasar iwo tesa tä häpe rey tä ihi Babilonia, wet Daniel lefwilhek iche, hiw'en cuatro m'akitas. Tä lham n'om, ilesayen m'ayhay tä lhamenya tä hiw'en tä tafwilhanej. Wet lelesaynek häp täja, yok:
2“Olham otfwilhan, ow'en tä yafwthitaj tälhe tä tafwojyhiye, lhäy'e tä tapinhiye, lhäy'e tä ifwala tälhche, lhäy'e tä ifwala y'uy. Wet nichätho lewomekitaj tä wuj wet inät nemhit iwo letamseka. 3Wet iche cuatro m'akitas tä w'enhache lhamej tä tälho lewomekitaj. 4Elh hätet iwoye t'owalhaj, mat lhafwis ihi, hätet iwoye iyhäjkottaj lhafwis. Oyahin t'at, wet ow'en tä õ'lanche lhafwis wet õ'neyhatphä wet õ'kasthayen, hätet iwoye hin'o tä takasit. Wet õ'wo lehuseka, nech'e hätet iwoye hin'o.
5“Wet elh m'akitaj tä ow'en hätet iwoye sulaj, ineyhatphä takwey lhäy'e lepach'o tä tumej lhip tä lhaiwaklhat yämthilek tiyäjpe lelänek. Wet ow'en tä iche tres n'osij lhiley tä ihi lak'aj. Wet oläte tä õtahuyej tä õyok, ¡Mäh tuj nilhok t'isan tä lekalhik letuj!
6“Wet tä oyahin, ow'en elh m'akitaj, hätet iwoye hay'äj. Wet lhafwis cuatro tä i'pe lechäyi, wet cuatro lhethey, wet õhw'enho lakhajyhayaj.
7“Wet äp yachajo tä oyahin, wet ow'en m'akitaj elh tä lhäy'e lhip tä ni'isa wet äp tanhoch'ay wet äp lhäy'e lhip tä takhajay. Letsotey chinhas wet äp wusche, tufwen wichi wet iwo lhipeya wet t'äsche. Häpe m'akitaj tä w'enha lhamej wet lech'ul ihi diez. 8Wet tä oyahin lech'ul, iche lech'u elh tä lhämsaj tä inuphä tä ihi iyhäj. Wet nech'e õ'lanche tres lech'ul yämthilek lew'et ihi lech'u elh tä niwuja tä nech'e inuphä. Wet lech'utso tatelhoy ihi hätet iwoye hin'o tatelhoy, wet äp lak'aj ihi wet matche tä lhaichäjlhi tä yämlhi.
Dios lakalelhthayaj
9“Wet tä kamaj oyahin t'at, ow'en tä õ'tihi elhpej leniyatyaj, wet Hin'o tä N'ilataj tatayphä'pe. Lew'uy lhäy'e lhip tä ipelaj wet lew'oley hätet iwoye tson'ataj w'ole tä ipelaj tä laj lech'ohleya. Wet leniyatyaj hätet iwoye itäj, lhäy'e takäläy hätet iwoye itäj lhal, 10wet itäj tä hätet iwoye tewok tälho tä tatache. Wet wujtaj'atpey wichi tä iyej tä tach'ote. Wet n'okalelhthayajwos iwo tesa lakalelhthayaj, wet ifwoyenchehen libros tä õ'lesayen m'ak tä elhpej iwoye.
11“Wet tä oläte lepak tä äytaji tä yämlhi häp lech'u tä niwuja tä iwoye lhämtes tä wuj tä ni'isachehen, wet oyahin t'at, wet ow'en tä õ'län häp m'akitaj wet õ'wo lhipeya, wet õ'thatho itäj yämthilek y'o. 12Wet iyhäj m'akitas õ'soyejwethä lakhajyhayaj, mat tek õ'länhen pajtha nichäte lewhäy.
13“Wet honatsitso ihi ofwilhek, ow'en elh tä hätet iwoye hin'o tä nek i'pe pules. Wet ihoye häp lhip tä Hin'o tä N'ilataj ihi, wet õ'hänwhäye häp lham. 14Wet õhw'enho lakhajyhayaj, lhäy'e lewujyaj, lhäy'e leniyatyaj. Wet nilhokej wichi tä i'pe honhat tä lhayhil w'enhache lhamej yen lewuka häp lham. Wet lakhajyhayaj nofwit'ala, ihanhiyejt'ak tatäy, wet leniyatyaj lepes ihichet'ala pajla'tha tiyäj'attsiy.
Õ'fwenho Daniel m'ak tä häpe lefwilhek
15“Olham Daniel olät lhame tä onowayhyaj ikalh n'ohi wet wuj tä oyen tichunhayaja m'ayhay tä ow'en. 16Wet ohowhäye elh häp hin'ol tä takasthen wet oyok, Täfwnhat n'oyej tähestso.
“Wet iwoye, ifwel n'oho wet yok, 17Häp cuatro m'akitas tä lew'en häpehen cuatro reyes tä lhayenla niyatayej honhat. 18Mat chik tajyäme täjtso, Dios tä häpe N'owujtaj hiw'enhihola lham laka wichi n'oniyatyaj, wet lewuhuyla pajla'tha tiyäj'attsiy.
19“Wet ot'uhläk lhäy'e lhip tä ohanej m'ak tä häpe häp m'akitaj tä cuatro. Tsi wuj tä w'enha lhamej, tek häte iwoye iyhäj, lhäy'e lhip tä ni'isa, wet letsotey chinhas, wet lefwus t'ähes bronce, wet tufwen wichi wet iwo lhipeya wet t'äsche t'at. 20Häte owatläk ohanej m'ak tä häpe lech'ul tä ihi diez, lhäy'e lech'u elh tä niwuja, mat tatelhoy ihi wet äp lak'aj ihi, wet lhäy'e lhip tä iwoye lhämtes tä ni'isachehen, wet hätet iwoyek inu'pe lech'ul iyhäj, tsi tres lech'ul iyhäj pajche õ'lanche yämthilek lew'et ihi elhna.
21“Wet tä oyahin, ow'en tä lech'una tatayhlä Dios laka wichi wet ikalhi, 22pajtha näm Hin'o tä N'ilataj wet tach'ote lham tä häpe Dios tä N'owujtaj laka wichi. Tsi nichäte t'at lewhäy yämthilek Dios laka wichi ikatej wet ihi leniyatyaj.
23“Wet hin'o tä takasit owhäye äp ifwel n'oho wet yok, Häp cuarto m'akitaj häpkhila cuarto n'oniyatyaj tä ihla honhatena, w'enhahila lhamej, tek hätehla iwoye iyhäj n'oniyatyajay. Wet ihämthila imälhewek honhat, t'äsichela wet iwohla lhipeya. 24Wet diez lech'ul häpe diez reyes tä ihihila n'oniyatyajna. Wet chik tajyäme lhamel, äp ihichela elh chik äp tiyäjo leniyatyaj. Mat tek hätehla iwoye iyhäj tä ichun, wet itäyhthila tres reyestso. 25Wet iläkwilhila häp Dios tä N'owujtaj wet ilhaklitla Dios laka wichi. Wet t'uhlahläk wichi ileyej Dios lhämet yämthilek nemhit itetshan lakäjyajay tä iwuntej häp Dios. Wet ilhaklitla Dios laka wichi pajla'tha tres nekchämis lhäy'e seis iwel'as. 26Mat n'okalelhthayajwos itihiyeja lakalelhthayaj, wet isohiyeja lakhajyhayaj, wet iwasthihila wet lepes. 27Wet nilhokej n'oniyatyajay tä i'pe honhat, lhäy'e lakhajyhayajay, lhäy'e lewujyajay, õhw'enhihola häp Dios tä N'owujtaj laka wichi. Wet nofwit'ala leniyatyaj pajla'tha tiyäj'attsiy, wet nilhokhiyeja wichi tä i'pe honhat tach'othiyela wet iwohiyela lhämet.
28“Häp täja lepes tä oyäme. Wet olham Daniel wuj tä ilänn'o tä oyen tichunhayaja wet otk'efwiyejche. Mat ofwenhihot'a elh chik häpe tähestso.”
