Deut 10

₁Wet Lhawuk tahuy n'oyej wet yok, “Enlhi tunte lhipey, tech'aynej iyhäjnaj ichun. Wet chik wak'alh, hola n'oye tä oi'pe chenaj. Häte enlhi Arca tä häpe n'okähi tä hal'ä t'ähes. ₂Wet oyachajiholak olesayen olhämtesnaj i'pe iyhäjnaj ichun tä lewasthiche, wet thatho lehitso.”

₃Tä mälhyejtso, oyenlhi Arca, otchuma hal'ä tä lhey acacia lhipey. Wet häte oyenlhi tunte lhipey, otech'aynej t'at iyhäj tä ichun. Wet häp tä ochäjlhi tä oho'pe chenaj. ₄Wet Lhawuk ilesayen häp Diez Mandamientos tä i'pe tunte lhipeytso, hätet iwoye iyhäj tä ichun. Häpe t'at lhämtes tä amel lelätaye tä tumho itätaj tä i'pe chenaj, häp ifwala tä olhamel olhaihute chenaj. Wet tä wak'alh tä yenlhi, hiw'en n'oho. ₅Wet tä okatej, onuhchä tä oi'pe chenaj wet othatho Arca tä pajche oyenlhi, mälhyej tä Lhawuk ne'tek owoye. Wet kamaj ihi t'at lehitso.

₆Wet Israel lhayis yikch'oye p'ante Jaakanlesw'et wet tiyäje lhip tä lhey N'otasnhayajay. Wet häp p'ante tä Aarón ihi tä y'il wet õtjänch'oye lep'itsek. Wet lhäs Eleazar häp tä icheyäjo lew'et tä häpe sacerdote lechumet. ₇Wet tä lhamel yikch'oye p'ante, ihoye Gudgoda. Wet tä tälho Gudgoda, ihoye Jotbata, häp honhat tä wuj inät ihi. ₈Wet ifwalas tä lhamel ihi p'ante, häp tä Lhawuk tatshupiye wichi tä letes Leví. Wet hiw'enhatej lechumet yämthilek lhamel tilhäjpej Arca tä N'ot'amajchet tä Lhawuk lhämtes ihi. Wet ne'tek ihipej tä lham tatache wet tach'ote lechumet, wet ifwenhopej wichi tä yok, “Is chik Lhawuk takäpfway amehen”, mälhyej tä lhamel iwoye yäk ifwalasna.

₉Häp täjtso tä tamenej tä wichi tä letes Leví ihichet'a lakäywet wok honhat chik lewuk lhamel. Tek häte iwoye lepuhfwas tä Israel lhayis iyhäj. Mat häp m'ak tä lakäywet häpe t'at Lhawuk Dios, mälhyej tä lham pajche ifwenho.

₁₀Olham oi'pe chenaj cuarenta ifwalas wet cuarenta honatsis, hätet iwoye täjte ichun. Wet Lhawuk äp yachajo tä tach'ahu n'oye wet nitäyhata amel. ₁₁Mat ifwel n'oho tä yok, “Mäh awaklhat yämthilek lhekchufwi wichi, häpkhilek tiyäjo honhat wet lhayen lewuhuya, häp honhat tä pajche ofwenho atetsel tä oyok, Ow'enhihola ales.”

₁₂Athana Israel lhayis, ch'ahuye Lhawuk Dios. T'uhläk lewunitay wet lenukwepej len'äyij, wet lehuminay wet lhen at Awuka, mälhewek ahusey lhäy'e mälhewek atichunhayaj, ₁₃wet lewoye nilhokej lhämtes, häpkhilek awit'äyhyaj newache. ₁₄Yej p'ethatlä tä lham Lewuk pule lhayis, lhäy'e tä iw'echehi pule lhayis, lhäy'e honhat, lhäy'e nilhokej m'ak tä ihi. ₁₅Mat lham itetshan p'ante atetsel wet ihumin lhamel. Wet tatshupiye lhamel leles tä häpehen amel tä lhewej wichi iyhäj tä i'pe honhat, mälhyej tä lew'enay ifwalana.

₁₆N'älit tä letihiche t'at ahusey häp lhämtes, wet leyej tä alhen kachuhantsesa. ₁₇Tsi Lhawuk Dios häpe t'at Dios tä Lhamya wet N'owuk tä Matche. Häpe Dios tä N'owujtaj wet takhajay, wet nehit katsik ifwiye. Wet itetshanhiyejt'a m'ak tä häpe elh chik häpe, hiw'awlhatchä lakalelhthayaj tä iwoye. Häte hip'altsenhit'a elh chik häpek yok, “Owo t'awayhata Lhawuk häpkhilek hip'altsenn'o.” ₁₈Mat tach'ote chipenhas lhäy'e tesalis, wet itiyej lehumnhayaj wet hiw'enho lhäk häp wichi tä kahäpeya Israel tä i'amejen. ₁₉Tä mälhyejtso, is chik amel letiyej ahumnhayaj elh tä kahäpeya Israel. Tsi häte ajchalis ahäpehente wichi tä w'enha lhamej tä ihi honhat tä Egipto.

₂₀Huminay Lhawuk Dios wet woyaye lhämtes. En at Awuka wet yej leyej. Wet chik let'unhatche ämet, untejche häp lham lhey. ₂₁Tsi tajlhama lham tä is chik lewunit. Lham häpe aka Dios tä iwoyej amehen m'ayhay tä äyteschehen tä leseltejen. ₂₂Tä atetsel nichätho p'ante Egipto, tajlhama p'antet setenta lhamel. Mat athana Lhawuk Dios yäm wujpey amel, hätet iwoye katetsel tä ihi pule.