Deut 11

₁Huminay Lhawuk Dios wet yej leyej tä lewoye lhämtes lhäy'e nilhokej m'ak tä ne'tek lewoye. ₂Tichunache ifwalana nilhokej m'ak tä ichufwen amejen. Ales lhamel hiw'enhit'a'pe, mat amel häp tä pajche lew'enpe Lhawuk lewujyaj lhäy'e lakhajyhayaj, ₃lhäy'e letetnhay, lhäy'e m'ayhay tä äyteschehen tä iwoyeje imälhewek honhat tä Egipto, lhäy'e laka niyat, ₄lhäy'e laka nifwotaj, lhäy'e lew'utey yel'atas, lhäy'e kaletas tä laka'tshayajchal, wet hich'ahen lhamel tä ihi Lewomekchät tä lhamel fwetaj ihän amel. Lhawuk itäyhat wet nemhit iche.

₅Häte tichunache nilhokej m'ak tä iwoyej amehen tä lhehi ts'anis pajtha lenämhen kana, ₆lhäy'e m'ak tä iwoyeje Datán lhäy'e Abiram, häp Eliab leles tä letes Rubén, tä honhat tim lhamel lhäy'e lech'efwas, leles, lhäy'e lewukwey, lhäy'e lakäywet tä iyej. Wet nilhokej Israel lhayis tä hiw'enejte. ₇Matche, amel lew'en t'at nilhokej m'ayhay tä äyteschehen tä Lhawuk iwoyehte.

₈Tä mälhyejtso, woyaye nilhokej Lhawuk lhämtes tä ow'en amhohen ifwalana, häpkhilek atkhajayhen wet lekalhi honhat yämthilek alewuhuy, ₉wet äp wujla'pe nekchämis chik lhehi. Häpe t'at honhat tä Lhawuk ifwenho p'ante atetsel tä yok, “Ow'enla amhohen, lhäy'e ales tä lepes lheley.” Häp honhat tä t'os lhäy'e akäyek tet iwoye inät, iläfwelchehen tä ihi. ₁₀Tek häte iwoye Egipto, häp honhat tä amel letälho. Tä letutcheyhen, lhen at achumetchala apach'ol tä letsäype inät, mälhyej tä lhenwethä akäsw'etes tä ichewhäye awukwey. ₁₁Mat häp honhat tä lhenla aka honhata, häpe t'at tä chenhas wet lakawayhil, wet äp pelhay t'at tä ipumyen honhat. ₁₂Häpe honhat tä Lhawuk t'uye mälhewek nekchäm.

₁₃Wet chik amel lewoyaye Lhawuk lhämtes tä ow'en amhohen ifwalana, wet lehuminay häp lham wet matche tä lhen Awuka, mälhewek ahusek lhäy'e mälhewek atichunhayaj, ₁₄wet lham ichenhipeja amehen pelhay chik nichätepej lewhäy tä inawop lhäy'e tä chelhchup, häpkhilek wuj yachuyaj chik lelanhi wet lew'en hat'es lhäy'e aceite. ₁₅Matche, lew'enla äk tä naya, häte ihichela hal'ä tälhes häpkhilek aläy lhäk iche.

₁₆Mat amaj amejen, yej tach'anlhayek anech'ethayajay aiwetahathen wet tamenej tä leleyej Lhawuk wet len'okwiyej dios lhayis tä kamatachehen. ₁₇Tsi Lhawuk itihla amejen lewäk wet nemla ichen amehen pelhay. Wet nemla iche yachuyaj lhay chik tälho honhat, wet yohifwajakwet let'inhen tä lhehi honhat tä is tä Lhawuk hiw'enla amhohen.

₁₈Tihiche ahusey lhäy'e atichunhayajay nilhokej olhämtesna. Äytej akwey wet atacho, häpkhilek lhenpej atichunhayaja. ₁₉Chufwenejen ales, en ämeta chik lhehi haw'et, wok lenukwe n'äyij, wok häp lewhäy tä lemä wok lenephä. ₂₀Häte tiyej aka ch'utey tä lelesayen, lhäy'e aka hupuy lepelis, ₂₁häpkhilek amel lhäy'e ales pitaj haw'atshancheyajay chik lheyayhi honhat tä Lhawuk ifwenho p'ante atetsel. Kamaj lhehihila pajla'tha pule nemhit iche.

₂₂Yej leyej Lhawuk lhämtes tä one'tek lewoyaye, mat achufwenejen wet en achumyaja. Tsi chik lehuminay Lhawuk Dios tä lehänlhi wet lewoyaye lhämtes, ₂₃lew'enla tä lham itihiyeja kanhi nilhokej wichipej chik lechätaye. Wet lekalhihila wichi tä wujpey wet äp takhajayhen tä inu'pe amel. ₂₄Honhatlat chik häpek let'äsi haw'etla t'at, tälhiyela ts'anis tä tumej tapinhiye pajla'tha taje Líbano tä tumej tafwojhiye, wet tälhiyela tewokitaj Éufrates tä tumej hichä pajla'tha nichäte lewomekitaj tä tumej tä ifwala y'uy. ₂₅Ihichet'ala wichi chik tumhila ahilähen. Lhawuk Dios ichenhiyela lhamel lenowayhyaj, yämthilek wuj tä noway amehen chik lechätho lhamel laka honhat, mälhyej tä pajche lham ifwel amhohen.

₂₆Ifwalana ofwel amhohen Lhawuk Dios lakäpfwayajay tä isen, lhäy'e lakäpfwayajay tä ni'isahen. Wet tshupiye t'at elh tä lehuminay. ₂₇Chik lewoye lhämtes tä one'tek lewoyaye ifwalana, ihla amejen lakäpfwayajay tä isen. ₂₈Wet chik kawoyaye wet lehänlhi dios lhayis tä katäfwelayej, wet nemhit lenukwe len'äyij tä one'tek lenukwe ifwalana, ihla amejen lakäpfwayajay tä ni'isahen.

₂₉Wet chik Lhawuk Dios ihänla amhohen honhat tä lhenla haw'eta, is chik lehoyaype chenaj tä lhey Gerizim, wet lhenay asilätyaja Lhawuk lakäpfwayajay tä isen. Wet äp is chik lehoyaype chenaj tä lhey Ebal, wet lhenay asilätyaja Lhawuk lakäpfwayajay tä ni'isahen. ₃₀Chenhastso tumej tewok Jordán lhip elh, iw'echehi n'äyij tä tiyäjche tä tumej tä ifwala y'uy tä äp ihi Canaán lhayis kahonhat lhip tä ifwache Jordán, häp honhat tä tatayhlä Gilgal tä iwhäye hal'ätas tä ihi lhip tä lhey Moré.

₃₁Tatäy lhimphaj wet amel lhisthihola Jordán yämthilek letiyäjo honhat tä Lhawuk Dios hiw'enla amhohen. Wet chik amel lekalhi wet lhenay haw'eta, ₃₂achufwenejen wet en achumyaja nilhokej Lhawuk lhämtes tä ofwel amhohen ifwalana.