Deut 19

₁Chik Lhawuk Dios itäyhthen wichi wet hiw'en amhohen laka honhates yämthilek lhen aka honhatesa, enayla haw'etesa hupuy lhäy'e lewukwey. ₂Mat is chik lew'enhat tres hupuy lhayis ₃wet lhenwethä n'äyhäy tä tiyäjehen. Häte honhat tä Lhawuk hiw'en amhohen yämthilek alewuhuy, tihila tres lhipey tä lew'enhat, häpkhilek elh chik häpek ilän elh ilethane hupuyna. ₄Hin'o tä ilän elh ilethanhiyela häpkhilek õkniläna, chik kalelhäj tä nhanahläk ilän häp elh tsi letayhfwahit'a.

₅Mälhyej hin'o tä ihoye tayhi tä t'ukwe lelhetes, tä ifwaj hal'ä wet nämhi hosan tä ihi lew'ut, wet taj elh lhetek wet y'il. Hin'otso häp tä is chik ilethane elh chik häpe häp hupuy tä n'oletnhawtes, häpkhilek õkniläna. ₆Tsi chik nimälhyayejtso, chik atofwe hupuy tä fwetaj ilethane wet pitaj len'äyij, elat häp hin'o tä lepuhfwa elh tä õ'län ihän elh tä fwetaj ilethan, wet ifwit tä ihi len'äyij, wet tä lhäy'e lhip tä lewäk ihi, ilän häp elh tä nit'uhawetayej chik õ'län, tsi tek hanläk ilän elh wet lhaletayhfwasit'a häp ifwalas tä tajyäme. ₇Häp tä tamenej tä one'tek letihi tres hupuy lhayis tä lew'enhat.

_8-9Is chik amel kaleyayej tä lhen achumyaja wet lewoye Lhawuk lhämtes tä ow'en amhohen ifwalana. Wok oyok, huminay Lhawuk Dios wet yej leyej tä lenukwe len'äyij. Chik mälhyej'attso m'ak tä lewoye, lham y'isiyeja lhip aka honhat wet hiw'enla amhohen imälhewek honhat tä ifwenho p'ante atetsel. Wet nech'ehilak äp lep'ajtej tres iyhäj hupuy lhayis yämthilek häpe n'oletnhawtes tä hap'akej iyhäj tä ichun, ₁₀häpkhilek newache elh chik õ'län tä letes newache tä ihi honhat tä Lhawuk Dios hiw'en amhohen yämthilek alewuhuy. Häte tamenhit'ala amejen n'olänek chik häpe.

₁₁Mat chik hin'o yen tayhfwaya elh wet ihän tä yik, wet inuye wet ilän, wet ilethane elh hupuy tä n'oletnhawtes, w'enha lhamej m'ak tä lewoyeje. ₁₂Is chik hin'ol tä thänhäy tä lew'et hupuy tä tälhe, ne'tek õ'tsoklhi hin'otso wet õyachaje hin'o tä lepuhfwa häp elh tä n'olänek, yämthilek ilän. ₁₃Yej p'altsen elh tä iwoye täja, häpkhilek nem õ'län elh tä letes newache tä iyej Israel lhayis. Wet chik mälhyejtso, isila nilhokej m'ayhay tä lewoye.

₁₄Honhat tä Lhawuk Dios hiw'enla amhohen, yej lanche tuntey tä pajche õ'tihi línea tä lepes aka honhat. Yej t'ayhte aelh tä haw'etfwa laka honhat.

₁₅Laha ihihit'a chik tefwajni hin'o chik yäme tä hiw'enej elh tä iwoye m'ak tä ni'isa. Tajlhamat chik iche dos wok tres tä yäme m'ak tä elh iwoye, häp tä laha ihi.

₁₆Chik iche elh tä kamatache lhämet, fwetaj t'isufwkane elh wet yäme tä iwoye m'ak tä ni'isa, ₁₇tä mälhyejtso, lham asufwkantsaj lhäy'e elh tä lham fwetaj t'isufwkane, is chik lhamel ihoho tä tatache Lhawuk lhäy'e sacerdotes, lhäy'e n'okalelhthayajwos tä ihi lechumet häp ifwalastso. ₁₈Wet is chik n'okalelhthayajwos wuj tä itetshan häp lewit'äyhyajna. Wet chik hiw'en tä kamatache m'ak tä elh yämeje elh, ₁₉tä mälhyejtso, is chik lham tä õ'woyeje n'otasnhayaj tä t'uhläk õ'woyeje elh. Chik lewoye täjtso, nofwila m'ak tä ni'isa tä i'amhihen. ₂₀Häpkhilek wichi ihanej wet nowayhiyela chik fwetaj itiyej lesufwkanyaj häp elh. ₂₁Yej tiyej hap'altsenyaj, wo haya. Chik elh isoyej n'ow'atshancheyaj, wet soyej lham lew'atshancheyaj. Chik elh ilanhi n'ottelho, wet lanhi lham tatelho. Chik elh ilanhi n'otsote, wet lanhi lham letsote. Chik elh inäk'äs n'otkwey, wet näk'äs lham takwey. Chik elh inäk'äs n'opach'o, wet näk'äs lham lepach'o.