N'olänek tä nikalelhäjach'oye elh tä ilän
1Chik lhehihila honhat tä Lhawuk Dios hiw'enla amhohen yämthilek alewuhuy, chik iche hin'o tä n'olänek tä ihi tayhi, mat nehit katsik ihanej elh tä häpe tä ilän, 2chik mälhyejtso, is chik hin'ol tä thänhäy lhäy'e n'okalelhthayajwos ihoye, wet itetshan häp metros tä tälhe lhip tä n'olänek ihi, pajtha nichäte hupuy lhayis tä n'op'itsek ihi lechowej. 3Wet hin'ol tä thänhäy tä ihi hupuy tä n'olänek ni'tofwayehlä, is chik tachuma w'asetaj lhäs tä kamaj kan'ochumyeneka, 4wet ihäne honhat lhip tä nehit katsik yen lelafweka wok tutcheyhi, tä iwhäye tewok n'äyij tä inät ihi. Wet chik nichäte, is chik inäk'äs lew'o.
5Wet nech'e Leví leles tä häpehen sacerdotes, is chik ihowhäye. Tsi lhamel tä Lhawuk Dios itshupyeneje yämthilek tach'ote lechumet wet takäpfwayeje lham lhey. Wet chik iche n'olänek, wok elh ipäjlhi elh, wok iyhäj lhay'ithatejwethä lhämtes tä äyteschehen, häp Leví lhayis lhamel t'at tä itetshan wet itshupyene m'ak tä is alhoho.
6Wet nech'e nilhokej hin'ol tä thänhäy tä lew'et hupuy tä n'olänek ni'tofwayehlä, is chik lhamel iti'pe w'asetaj lhäs tä õ'län häp takweyey tä ilejchehen, 7wet yok, “Olhamenhit'a chik olän häp hin'ona. Wet ow'enhiyejt'a elh tä häpe tä ilän. 8Iwuk, täyhtej letes aka wichi, häp lhamel tä letiyej lefwayhyaj. Yej lhen tesayej lhamel häp hin'o tä laj letesa tä õ'län.”
Chik lewoye täjtso, Dios tek yenla tesa amejen häp n'op'itsektso. 9Woyayela m'ak tä is alhoho tä lhehi tä Lhawuk tatache, wet yenhit'ala tesa amejen n'olänektso.
M'ak tä hin'o iwoyeje atsinha tä lakwenek tä yen lech'efwaya
10Chik lewo aka'tshayajayej atayhfwas, wet Lhawuk Dios tach'ot amehen yämthilek lekalhi lhamel wet letsokwethä, 11wet lew'en atsinha tä isilataj, wet lehumin wet letachuma yämthilek lhen hach'efwaya, 12is chik lehän haw'ete, wet lene'tek yisetche lew'ole wet yisthen lefwus t'ähes, 13wet ilanche lew'uyis tä pajche lew'uy tä õ'tsoklhi. Wet is chik ihi t'at haw'et wet iwo lhafwyhayaja tä yen tichunhayaja lajcha lhäy'e lako iwel'a weihalha. Chik tajyäme täjtso, nech'e lemäyej wet nech'e hach'efwa t'at, wet lham alech'efwa t'at. 14Mat chik kahumina atsinha, is chik leleyej. Mat isit'ak lewom wet lechäjej chinaj t'äj, wok lhen akawoya, tsi lhen w'et m'ayeka.
N'olhäs tä n'ochunkatsek häp tä lewuk lajcha lakäywet
15Chik elh amel lech'efwas täkwfwas, wet ihumin lech'efwa elh wet ihuminhit'a elh, wet lech'efwasna iwo lelesa, wet elh tä lech'efwa nhumina häp tä ichun tä iwo lhäsa, 16wet chik nichäte ifwala tä lajcha hiw'enhatejen lakäywet häp leles, is chik yen häpeya lechunkatsek häp lhäs tä ihihlä atsinha tä nhumina. Tsi chik nimälhyayejtso, yen w'et m'ayeka häp lhästso tä häpe lhäs tä matche tä lechunkatsek. 17Wet is chik ihanej tä lechunkatsek t'at, wet m'ak tä hiw'enho inuhatpe m'ak tä hiw'enhomche leles iyhäj. Tsi häpe lhäs tä lechunkatsek tä tälho lakhajyhayaj, wet t'uhawetej tä õhw'enho m'ak tä wuj.
N'otasnhayaj tä õ'woyeje mamse tä nitch'ahuyaye lajcha lhäy'e lako
18Chik elh amel, chik äs nitch'ahuya ame wet nitch'ahuyaye lako, mat ayen tayhfwasa wet niwoyaye m'ak tä amel lene'tek iwoye, wet tej chik amel letasin, mat iwohiyet'a ämet, 19tä mälhyejtso, is chik amel lehäne hin'ol tä thänhäy tä ihi hupuy tä amel haw'et, 20wet lefwenho tä lhok, “Olhamel olhäs tach'ahuhit'a n'oyehen, mat yen tayhfwasa olhamel. Tej chik ofwenho m'ak tä is chik iwoye, mat iwohiyet'a. Mat ihumin tä iwoye m'ak tä ni'isa wet w'oknaj t'at.”
21Tä mälhyejtso, nilhokej hin'ol tä ihi hupuy iwohiyet'ak nithatayejlhi tuntey yäk y'il. Chik lewoye täjtso, nofwila m'ak tä ni'isa tä i'amhihen. Wet chik iyhäj Israel lhayis ihanej, lhamel nowayhiyela.
M'ak tä is chik õ'woyeje n'olänek tä õ'fwuhatlhi
22Chik iche hin'o tä õ'fwuhatlhi tä õ'län tä iwoye m'ak tä lhäy'e lhip tä ni'isa, 23isit'ak lep'itsek kamaj ifwulhi t'at tä honatsi. Mat is chik õtjänlä tä kamaj kahonatsiya, tsi hin'o tä õ'fwuhthilhi hal'ä tä õ'län, Dios t'at tä takäpfwayeje lewit'äyhyaj. Wet chik õknitjänahlä tä kamaj ifwalayej, lekokyeneje m'ak tä ni'isa häp honhat tä Lhawuk Dios hiw'enla amhohen.
