Deut 25

₁Chik iche hin'ol tä ifwelej lhamhomche m'ak tä ni'isa, is chik ihoye n'okalelhthayajw'et yämthilek lewos itetshan, wet kalelhäj elh tä letes ihi wet kalelhäj elh tä letes newahi. ₂Wet chik m'ak tä ni'isa tä elh iwoye w'awulhej chik õ'tasinlhi, is chik n'okalelhthayajwo ne'tek t'upey katsi tä ihi tä lham tatache, wet õ'tasinlhi'pe m'ak tä ni'isa tä iwoye. ₃Mat isit'ak inu'pe cuarenta tä õ'tasin hin'o. Tsi chik tafwaype täjtso, wet nech'e letamenej aelh tä nemhit laha ihi.

₄Yej wo t'aka lenhus häp weyis tä let'äsyenhi trigo.

₅Chik hin'ol tä lhalepuhfwas ihi lew'et, wet elh lhamel y'il wet newache leles, atsinha tä lech'efwa y'il isit'ak yen ch'efwaya hin'o tä w'enha lhamej. Mat häp hin'o tä lepuhfwa elh tä y'il, häp tä is chik yen ch'efwaya laka tesa yämthilek iwo lelesa. ₆Wet lhäs chik ichun tä iche, is chik õyen häpeya lech'efwa tä y'il lhäs, häpkhilek nittäya häp lhey tä iyej Israel lhayis.

₇Wet chik hin'o nit'uyahläk yen ch'efwaya laka tesa, wet lham tesa is chik ihoye hin'ol tä thänhäy tä ihi hupuy tä lew'et, wet ifwenhomche tä yok, “Och'efwanaj y'il lech'inij ihumin t'at chik tatäy lechila lhey tä iyej Israel lhayis. Tsi tek ihuminche chik yenn'o lech'efwaya.” ₈Wet hin'ol tä thänhäy nech'e is chik t'äne hin'o yämthilek tahuyej. Wet chik lham tujlhache tä yok, “Tek owatlä atsinha”, ₉wet tesatso is chik ihoye hin'o tä ihi tä tatache häp hin'ol tä thänhäy, wet ilanhi hin'o nisäj wet ifwats'unpe hin'ottey wet yok, “¡Häp täja m'ak tä õ'woyeje hin'o tä nit'uyahläk iche leles häp lepuhfwa tä y'il!” ₁₀Wet hin'otso leles õyenla lheya “Laj nisäja les” tä iyej Israel lhayis.

₁₁Chik hin'ol lhainhäpäjwethä, wet atsinha tä lech'efwa tä elh inhäpäjlhi ihoye wet itsoklä lechänsilis häp hin'o tä inhäpäjlhi lech'efwa, ₁₂yej p'altsen atsinhatso, iset takwey elh.

_13-14Yej kanej aelh tä lechäj m'ak tä lewuk wok m'ak tä am lewom. Äm w'awulhi m'ak tä lewo akaw'awlhanhatayej, ₁₅häpkhilek wujpey nekchämis tä lhehi honhat tä Lhawuk Dios hiw'enla amhohen. ₁₆Tsi lham n'äyiho wichi tä yen chumyaja tähestso wet iwoye m'ak tä ni'isachehen.

₁₇Tichunche m'ak tä Amalek lhayis iwoyejehte ajchalis tä lhamel nekche n'äyij tä tälhe Egipto. ₁₈Tichunche tä Amalek lhayis itihiyejt'a lenowayhyaj häp Dios wet inuyehen ajchalis tä ihi n'äyij. Wet tä lhamel wuj tä y'enhen, tälhche tä lew'echehi wet ilänhen iyhäj tä nitkhajayahen tä imälheche iyhäj n'äyij. ₁₉Tä mälhyejtso, chik Lhawuk Dios ifwayhat amejen nilhokej atayhfwas tä lhehi lechowej, wet atamsekis ihi tä lhehi honhat tä ayen lewuhuya, äma nofwej Amalek lhayis yämthilek tatäy tä i'pe honhat. ¡Yej p'ethatlä!