Moisés ne'tek õ'lesayen ley tä õ'ti'pe tuntey tä i'pe chenaj
1Moisés lhäy'e Israel lhayis tä thänhäy tahuyej wichi wet yok:
–Ifwalana woyaye nilhokej m'ayhay tä one'tek amel lewoyaye. 2Chik lhistho tewok Jordán wet letiyäjo honhat tä Lhawuk Dios hiw'enla amhohen, wet kasthaynhena tuntey tä wus wet pelnhathena, 3wet lesayena'pe nilhokej Lhawuk lhämtes tä ne'tek lewoyaye. Woyayela täjtso chik letiyäjo honhattso tä t'os lhäy'e akäyek iläfwelchehen tä ihi, tet iwoye inät, häp honhat tä Lhawuk Dios hiw'enla amhohen, mälhyej tä ifwenho p'ante amel atetsel.
4“Tä mälhyejtso, chik letafwayej tewok Jordán tä lhistho, wet chik lechäte chenaj Ebal, kasthaynhena tuntey tä oyämetso wet pelnhathena. 5-6Häte tichela letape tuntey tä lhen häpeya Lhawuk Dios laka altar. Mat is chik imälhechewek tuntey, häpkhit'a m'ak tä enhay. Häpkhilek leti'pe itshätäy tä lewunhomche tä lhen han'okhayajayej Lhawuk Dios, 7lhäy'e itshätäy tä lelänhen tä lhen t'awayhata yämthilek ale'isyene. Wet is chik let'ekhen wet lewo akäjyaja tä lhehi tä Lhawuk Dios tatache.
8“Wet tunteyne oyäme tä lepelnhathen, äma kalelhäj alesaynhay chik leti'pe. Lesayena nilhokej m'ayhay tä Dios ne'tek lewoyaye.”
9Tä tajyäme täjtso, Moisés lhäy'e Leví leles tä häpehen sacerdotes, lhamel tahuyej Israel lhayis wet yok:
–Oyay tam, Israel lhayis, ch'ahuyay n'oye. Ifwalana Lhawuk Dios ayen laka wichiya. 10Tä mälhyejtso, woyaye nilhokej lhämtes tä one'tek lewoyaye ifwalana, wet enay achumyaja.
N'okäpfwayajay tä ni'isa
11Ifwalatso Moisés tahuyej wichi wet yok:
12–Chik amel letafwayej tewok Jordán tä lhistho, wet wichi tä tälhehen letetsel Simeón, Leví, Judá, Isacar, José, lhäy'e Benjamín, is chik lhamel i'pe chenaj Gerizim wet ifwenho wichi tä yok, “Chik lewoyaye Lhawuk lhämet, itihla amej lakäpfwayaj tä is.” 13Wet wichi iyhäj tä tälhehen letetsel Rubén, Gad, Aser, Zabulón, Dan, lhäy'e Neftalí, is chik lhamel i'pe chenaj Ebal wet ifwenho wichi tä yok, “Chik kawoyaye Lhawuk lhämet, awit'äyhyaj ihihila.”
14“Wet Leví lhayis is chik ifwitsenej lechos tä tahuyej wichi wet yok,
15“Lewit'äyhyaj ihi elh chik yenlhi tunte wok chinaj tä yen lecheyäya, wet iskat yämthilek n'okwiyej. Tsi häpe t'at m'ak tä iwäkyhayen Lhawuk. Wet nilhokej wichi, tä iläte, is chik nichulho wet yok, Amén.
16“Lewit'äyhyaj ihi elh chik yen w'et m'ayeka lajcha wok lako. Wet nilhokej wichi, tä iläte, is chik nichulho wet yok, Amén.
17“Lewit'äyhyaj ihi elh chik ilanche tuntey tä pajche õ'tihi línea tä lepes laka honhat wet y'ayhte elh laka honhat lhip. Wet nilhokej wichi, tä iläte, is chik nichulho wet yok, Amén.
18“Lewit'äyhyaj ihi elh chik iwetahatej len'äyij häp elh tä asnam. Wet nilhokej wichi, tä iläte, is chik nichulho wet yok, Amén.
19“Lewit'äyhyaj ihi elh chik itiyej lakalelhthayaj tä ni'isa häp hin'o tä kahäpeya Israel, wok chipenaj, wok tesa. Wet nilhokej wichi, tä iläte, is chik nichulho wet yok, Amén.
20“Lewit'äyhyaj ihi elh chik imäyej atsinha tä lajcha ch'efwa, tsi iläkwlhi lajcha. Wet nilhokej wichi, tä iläte, is chik nichulho wet yok, Amén.
21“Lewit'äyhyaj ihi elh chik yen ch'efwaya itshäwet. Wet nilhokej wichi, tä iläte, is chik nichulho wet yok, Amén.
22“Lewit'äyhyaj ihi elh chik imäyej atsinha tä lepuhfwa tä lajcha lhäse wok lako lhäse. Wet nilhokej wichi, tä iläte, is chik nichulho wet yok, Amén.
23“Lewit'äyhyaj ihi elh chik imäyej atsinha tä lech'efwa ko. Wet nilhokej wichi, tä iläte, is chik nichulho wet yok, Amén.
24“Lewit'äyhyaj ihi elh chik hich'amkat elh wet ilän. Wet nilhokej wichi, tä iläte, is chik nichulho wet yok, Amén.
25“Lewit'äyhyaj ihi elh chik tachumlä m'ak tä õ'käntejlhi yämthilek ilän elh tä laj letesa. Wet nilhokej wichi, tä iläte, is chik nichulho wet yok, Amén.
26“Lewit'äyhyaj ihi elh chik niwoya lahaya häp n'ochufwenyajayna wet tek t'uhläk iwoye. Wet nilhokej wichi, tä iläte, is chik nichulho wet yok, Amén.”
