Deut 32

₁“Pule, ch'ahu n'oye tä oyämlhi.

Honhat, is chik letetshan olhämtes.

₂Ochufwenyaj nitsäyhlahchä,

hätehlat iwoye pelhay tä nitsäype hal'ä tälhes

wet khipyhitas tä nitsäype hup.

Olhämtes hätehlat iwoye ayas tä i'pe honhat.

₃“Oyenla lhämeta Lhawuk.

¡Wujyenay lhaka Dios!

₄Hip'oyejpe n'amel lakhajyhayaj,

wet wuj tä isen lechumtes,

wet ische alhoho m'ak tä iwoye.

Häpe Dios tä matche,

wet ihichet'a m'ak chik ni'isa chik ihi lham.

₅“Mat amel ahäpehen wichi tä ni'isa,

alekänchi t'at wet lewäkyhayen Dios,

wet t'uhawethiyejt'a chik ahäpehen leles.

₆Wichi tä ch'isukwis wet lehusek newahi,

¿hä häpe täjtso m'ak tä letiskanejpe Lhawuk

m'ak tä is tä iwoyej amehen?

¿Hä kahäpeya Ajcha wet äp alhenek?

Lham ayenlhi wet häp tä lheche.

₇“Lhek yahinyache häp han'äyij tä letälhche,

tichunche nekchämis tä oyämetso.

Y'ätshane ajcha wet ifwenla amho,

y'ätshane aka thänhäy wet ikalelhthila amho.

₈Pajche p'ante Dios tä N'owujtaj

hiw'enhatejen honhatil wichi,

wet yäm kalelhäjen lepesey laka honhatil,

wet elh weihalhapej Lhawuk y'uhyene ángel.

₉Mat m'ak tä Lewuk häp lham

häpe t'at laka wichi Israel.

₁₀Nilhoke lhamel tä ihi ts'anis,

häp honhat tä tamchäy

wet yafwthitas äytesiche tä ihi.

Wet tatsufwelej laka wichi wet ichufwen,

wet t'uye hätet iwoye hin'o tä t'uye lhäse.

₁₁Hätet iwoye iyhäjkottaj tä wey'ä wet i'pe lhup,

ikhajyenhen leles yämthilek wey'ähen.

Mälhyejtso Lhawuk, hich'enhi lhafwis

wet tachuma lhamel wet ihänpe tä atojphä.

₁₂“Ihichet'a elh chik yikchufwi lhamel, ts'ilak Lhawuk.

Ihichet'a dios elh chik tach'ote.

₁₃Wet ihänehen honhates

tä iche'pe chenhas wet ikalhiche.

Ichunnhejen lhay tä ihi tayhi,

lhäy'e akäyek tä ihi chenhas,

wet hiw'enho aceite tä olivo lhits'i

tä tälho honhat tä wuj tuntey.

₁₄Wet lhamel iyäyej t'os tä tälhe

leläy tson'atas lhäy'e kayla lhayis,

wet tufw lhip tä isop'anhi

tä tälhe leläy w'asetas.

Wet tufwen tson'atas leles tä yätajen,

lhäy'e ch'unak lhayis tä tälhe Basán,

lhäy'e kayla tä asnakis,

lhäy'e trigo tä wuj tä is,

wet iyäyej hat'es tä uvas t'i.

₁₅“Matkat tä yätaj Israel,

hätet iwoye itshäwet tä lakey ihi, t'äse lewuk.

¡Matche tä yätajentas,

itufwakejchehen t'alhä!

Wet ileyej Dios tä lhenek

wet yen w'et m'ayeka lham tä t'uyehen wet ifwayhthen.

₁₆Tä lhamel hip'ajtejlhi Lhawuk

häp dios lhayis tä w'enha lhamej tä lhamel n'okwiyej,

wet matche tä y'ulhan.

Wet tä lhamel iwoye m'ak tä lhäy'e lhip tä ni'isachehen,

tamenej tä lewäk ihi.

₁₇Wet ilänhen itshätäy

tä yen n'okhayajayej ahät lhayis,

wet n'okwiyej dios lhayis tä kamatachehen

tä lhamel nitäfwelayej,

dios lhayis tä nech'ehen t'at

wet nech'e t'at tä nämhen,

häp dios lhayis tä lajchalis niwoyayeje len'okhayaj.

₁₈Am, Israel, lep'ethatlä Ajcha tä t'u ame.

Lep'ethatlä Dios tä hiw'en amho haw'atshancheyaj.

_19-20“Lhawuk lewäk ihi tä hiw'en täjtso,

wet ileyej leles wet yok,

Nemla otetshan lhamel.

Ow'enla m'ak chik iyej lhamel chik lepese.

Matche tä ni'isa wichina,

häpe wichi tä nitiya n'oyej t'ifwtihyaj.

₂₁Tä lhamel hip'ajtitlhi n'oyej

m'ak tä kahäpeya dios,

wet matche tä oy'ulhan.

Wet tä lhamel n'okwiyej

n'ocheyälis tä lajit lahaya,

tamenej tä wuj tä owäk ihi.

Tä mälhyejtso, häte olham ow'enhihola lakhajyhayaj

häp wichi tä kahäpeya oka wichi,

wet lhamel t'ischenyaj ihihila.

Häp wichi tä laj lehuseya

tamenhiyeja lhamel chik lewäk ihi.

₂₂Owäk y'uho, hätet iwoye itäj,

wet nichäthiyela honhates tä atoschehchä.

Itäyhthila honhat lhäy'e yachuyaj tä ihi,

wet hip'ohla chenhas letetsel.

₂₃Ochätyenla'pe lhamel nilhokej m'ayhay tä ni'isachehen,

wet otiyäjiyela och'ähal.

₂₄Nehläs ilänhihena, lhäy'e telätaj,

wet n'otnhayaj tä wuj tä äytaj itäyhthila lhamel.

Ochenhiyela itshätäy tä fwitses

lhäy'e amlhätas tä n'ot'ilek.

₂₅Olänhihena leles chik lhamel inukwe hup kawayhil,

wet wuj lenowayhyaj chik ihiche lew'etes.

Y'inhihena hin'ol mamses lhäy'e lhutshay,

lhäy'e hin'ol tä lew'oley ipelaji,

lhäy'e nä'tshas tä kamaj tiphen.

₂₆“Olham oyen tichunhayaja chik ofwtsatkatla'pe honhat

wet otäyhat yämthilek wichi hip'ethatlä.

₂₇Mat tek ot'uhläk letayhfwas lhaichäjwethä wet yohlak,

Olhamel tä owoyeje lewit'äyhyaj,

häpkhit'a lhamel lewuk Dios,

tsi olhamel otkhajayhen.

₂₈“Israel lhayis häpe wichi tä laj lehuseya,

wet lehanyaj ihihit'a lhamel.

₂₉Chik häpkhi wichi tä lehusey ihi,

ihanhiyejn'e m'ak tä iwoye,

wet nitäfwenhiyejn'e m'ak chik lepese

häp m'ak tä iwoye.

₃₀¿Tsi chip iwoye tä hin'o tefwajni

yokwes mil wichi?

¿Wet chip iwoye tä täkwfwas hin'ol

yokwes diez mil wichi?

Mälhhiyejt'an'etso, chik Lhawuk niwomhiye lhamel

wet nachajiye letayhfwas, mälhhiyejt'an'etso.

₃₁“Tsi lhatayhfwas ihanej

tä lhamel laka dios lakhajyhayaj ihihit'a,

tek häte iwoye n'amel lhaka Dios.

₃₂Lhamel hätet iwoye uva lhiley tä ni'isa

tä tälhe Sodoma lhäy'e Gomorra.

Uvas tä ihiche tapay wet äp n'ot'ilek,

₃₃wet laka hat'es häpe n'ot'ilek

tä tälho amlhätas.

₃₄Lhawuk yok, Tek op'ethatlä

m'ak tä otayhfwasna iwoye.

Ottaye t'at ifwala chik otiyej otasnhayaj lhamel.

₃₅Olham t'at tä owohla lahayayej

m'ak tä ni'isa tä iwoye

chik nichäte lewhäy chik nichät katsi.

Tott'aye t'at ifwala tä letäyhyaj,

nek t'at, nämla'thahya.

₃₆“Lhawuk tach'othiyela laka wichi

chik hiw'en chik nem takhajayhen.

Hip'altsenla lakawos

chik hiw'en chik noj lakhajyhayaj

wet niwohit elh chik imälhehi.

₃₇Wet Lhawuk yohlak,

¿Chip ihitso aka dios lhayis

tä lhäme tä tach'ot amehen wet let'ekhaye?

₃₈¿Chip ihitso lhamel tä tufw t'alhä

häp itshätäy tä lelänhen tä lhen han'okhayajayej

wet iyäyej hat'es tä lhen t'awayhata?

¡Is chik nechephä wet tach'ot amehen!

¡Is chik nämhen wet t'u amehen!

₃₉Lew'en tä tajlhamat olham tä ohäpe Dios.

Ihichet'a dios elh tä matche.

Olham tä ow'enho lew'atshancheyaj hin'o,

wet olham tä äp osoyej.

Owo lelätseka wet äp ochesat.

Nehit katsik okhajyhayaj kalhäytseka.

₄₀Opiyen puleye otkwey

wet ot'unhatche olhämet tä oyok,

Ohäpe Elh tä n'ilataj,

₄₁wet chik ofwut ofwajnhat tä isi,

wet owo tesa tä owoyeje wichi m'ak tä t'uhawetej,

owohla ohayahlä otayhfwas,

owohiyejela laha tä t'uhawetej

häp wichi tä n'äyi n'oho.

₄₂Ofwajnhat ihämthiyeja lhamel

wet och'ähal w'oknhasiyejawethä lew'oyis

häp wichi tä tajen

lhäy'e iyhäj tä õ'tsokwethä,

häp lhamel tä lhayen otayhfwas lhetheya.

₄₃“¡Amel tä ahäpehen wichi tä i'pe honhat,

woyay akäjyaja, lhäy'e Dios laka wichi!

Tsi lham iwohla lahaya lakawos tä õ'länhen,

iwohla hayahlä letayhfwas,

wet itäyhthila letes häp laka wichi

häpkhilek laka honhat nemhit lakokhayaj ihi.”